Parvathy Thiruvothu| മലയാളത്തനിമ തുളുമ്പുന്ന ചിത്രങ്ങളുമായി പാർവ്വതി തിരുവോത്ത്; ആരാധകർ സംത‍ൃപ്തരാണ്

മലയാള മങ്കയായി ഒരുങ്ങി പുഞ്ചിരിതൂകി ഇരിക്കുന്ന പാർവ്വതി തിരുവോത്തിന്റെ ചിത്രമാണ് ഇന്ന് സോഷ്യൽ മീഡിയയിൽ ശ്രദ്ധയാകുന്നത്. കസവ് സാരി ചുറ്റി സിമ്പിൾ മേക്കപ്പിലെത്തിയ പാർവ്വതിയുടെ ചിത്രങ്ങൾ ആരാധകരുടെ മനം കവർന്നു.

തങ്കലാന്‍ സിനിമയുടെ റിലീസിന്റെ ഭാഗമായി എടുത്ത ചിത്രമാണ് പാർവ്വതി പങ്കുവെച്ചത്. ഫോട്ടോകളിൽ പാർവ്വതിക്കൊപ്പം വിക്രം, മാളവിക മോഹനൻ എന്നിവരേയും കാണാം.

പാ രഞ്ജിത്ത് സംവിധാനം ചെയ്യുന്ന തങ്കലാന്‍ തമിഴില്‍ നിന്ന് ഈ വര്‍ഷമെത്തുന്ന ശ്രദ്ധേയമായ സിനിമകളിൽ ഒന്നാണ്. വിക്രം ടൈറ്റില്‍ കഥാപാത്രത്തെ അവതരിപ്പിക്കുന്ന ചിത്രം ആക്ഷന്‍ അഡ്വഞ്ചര്‍ വിഭാഗത്തില്‍ ഉള്ളതാണ്.

ഓഗസ്റ്റ് 15 ന് റിലീസ് ചെയ്യുന്ന തങ്കലാന്റെ പ്രൊമോഷണല്‍ തിരക്കുകളിലാണ് താരങ്ങളും മറ്റ് അണിയറക്കാരും. ഇതുമായി ബന്ധപ്പെട്ട നിരവധി ചിത്രങ്ങൾ ഇതിനോടകം ശ്രദ്ധ നേടിക്കഴിഞ്ഞു.

പാ രഞ്ജിത്ത് തമിഴ് പ്രഭ, അഴകിയ പെരിയവന്‍ എന്നിവര്‍ ചേര്‍ന്നാണ് ചിത്രത്തിന്‍റെ തിരക്കഥാ രചന നിര്‍വ്വഹിച്ചിരിക്കുന്നത്. പാ രഞ്ജിത്തും തമിഴ് പ്രഭയും ചേര്‍ന്നാണ് കഥ രചിച്ചത്.

സ്റ്റുഡിയോ ​ഗ്രീന്‍ നീലം പ്രൊഡക്ഷന്‍സ്, ജിയോ സ്റ്റുഡിയോസ് എന്നീ ബാനറുകളില്‍ കെ ഇ ജ്ഞാനവേല്‍ രാജ, പാ രഞ്ജിത്ത്, ജ്യോതി ദേശ്പാണ്ഡെ എന്നിവരാണ് ഈ ചിത്രത്തിന്‍റെ നിര്‍മ്മാണം. ജി വി പ്രകാശ് കുമാറിന്‍റേതാണ് സം​ഗീതം.