19-ാം വയസ്സിൽ സിനിമാ നടിയായി; കാൻസറിനെ പൊരുതി തോൽപിച്ച 250 കോടി ആസ്തിയുള്ള 51കാരി!

തൊണ്ണൂറുകളിൽ ഇന്ത്യൻ സിനിമയിൽ തരംഗമായി മാറിയ നടി സോണാലി ബേന്ദ്രെ (Sonali Bendre) വെറുമൊരു നടിയല്ല, മറിച്ച് തളരാത്ത പോരാട്ടവീര്യത്തിന്റെ പ്രതീകം കൂടിയാണ്. മോഡലിംഗിൽ നിന്ന് തുടങ്ങി ബോളിവുഡും ടോളിവുഡും കീഴടക്കി ഒടുവിൽ മാരകമായ കാൻസർ രോഗത്തെയും പൊരുതി തോൽപ്പിച്ച ഈ 51-കാരിയുടെ ജീവിതം ഏതൊരു സിനിമാക്കഥയെക്കാളും നാടകീയമാണ്.

1975 ജനുവരി 1-ന് മുംബൈയിൽ ഒരു സിവിൽ സർവീസ് ഉദ്യോഗസ്ഥന്റെ മകളായി ജനിച്ച സോണാലി തന്റെ 19-ാം വയസ്സിലാണ് സിനിമാ രംഗത്തേക്ക് ചുവടുവെക്കുന്നത്. 1994-ൽ പുറത്തിറങ്ങിയ 'ആഗ്' എന്ന ചിത്രത്തിലൂടെയായിരുന്നു അരങ്ങേറ്റം. ആ വർഷത്തെ മികച്ച പുതുമുഖത്തിനുള്ള ഫിലിംഫെയർ അവാർഡ് നേടിയ സോണാലിക്ക് പിന്നീട് തിരിഞ്ഞു നോക്കേണ്ടി വന്നിട്ടില്ല. 'ഹം സാത്ത് സാത്ത് ഹെയ്ൻ', 'സർബരോഷ്', 'മേജർ സാബ്' തുടങ്ങിയ ചിത്രങ്ങൾ സോണാലിയെ ബോളിവുഡിലെ മുൻനിര നായികയാക്കി.

തെലുങ്ക് സിനിമയിൽ മഹേഷ് ബാബുവിന്റെ 'മുരാരി'യിലൂടെ ആരാധകരുടെ പ്രിയങ്കരിയായി മാറിയ താരം, ചിരഞ്ജീവിക്കൊപ്പം 'ഇന്ദിര', 'ശങ്കർ ദാദ എംബിബിഎസ്' എന്നീ സൂപ്പർഹിറ്റുകളിലും അഭിനയിച്ചു. നാഗാർജുനയ്ക്കൊപ്പം 'മൻമധുഡു' എന്ന കൾട്ട് ക്ലാസിക് സിനിമയിലും സോണാലി വേഷമിട്ടു. തമിഴിൽ 'വാലന്റൈൻസ് ഡേ' എന്ന ചിത്രത്തിലൂടെ തെന്നിന്ത്യൻ പ്രേക്ഷകരുടെ മനസ്സിലും താരം ഇടംനേടി.

സോണാലിയുടെ ജീവിതത്തിലെ ഏറ്റവും പ്രശസ്തമായ നിമിഷങ്ങളിലൊന്ന് 1996-ൽ പോപ്പ് ഇതിഹാസം മൈക്കൽ ജാക്‌സൺ ഇന്ത്യയിലെത്തിയപ്പോഴായിരുന്നു. മുംബൈ വിമാനത്താവളത്തിൽ പരമ്പരാഗത ഇന്ത്യൻ ശൈലിയിൽ ആരതി ഉഴിഞ്ഞും തിലകം ചാർത്തിയും ജാക്‌സണെ സ്വീകരിക്കാൻ അവസരം ലഭിച്ചത് സോണാലിക്കായിരുന്നു. ലോകമെമ്പാടും വൈറലായ ആ ചിത്രം ഇന്നും ബോളിവുഡ് ചരിത്രത്തിലെ ഒരു സുപ്രധാന ഏടാണ്.

1999-ൽ പുറത്തിറങ്ങിയ ഹം സാത്ത് സാത്ത് ഹെ എന്ന സിനിമയുടെ ചിത്രീകരണത്തിനിടെ, സൽമാൻ ഖാന്റെ ചില പെരുമാറ്റങ്ങൾ കാരണം സൊണാലി അദ്ദേഹത്തിൽ നിന്ന് അകന്നു നിന്നതായി റിപ്പോർട്ടുണ്ട്. എന്നാൽ വർഷങ്ങൾക്ക് ശേഷം, 2018-ൽ അവർ ക്യാൻസറുമായി പോരാടുമ്പോൾ, സൽമാൻ അവർക്കൊപ്പം നിന്നു. ജീവിതത്തിലെ വളരെ പ്രയാസകരമായ ഒരു കാലഘട്ടത്തിൽ സൽമാൻ നൽകിയ പിന്തുണ അവരുടെ ബന്ധത്തിലെ പഴയ വ്യത്യാസങ്ങളെ ആഴമായ ബഹുമാനവും സൗഹൃദവുമാക്കി മാറ്റി.

2018 ജൂലൈയിലാണ് സോണാലിക്ക് മെറ്റാസ്റ്റാറ്റിക് കാൻസർ (Metastatic Cancer) സ്ഥിരീകരിക്കുന്നത്. ന്യൂയോർക്കിലെ ചികിത്സാ കാലഘട്ടത്തിൽ തന്റെ ആത്മവിശ്വാസം ഒട്ടും ചോരാതെ തല മൊട്ടയടിച്ച ചിത്രങ്ങൾ ഉൾപ്പെടെ താരം പങ്കുവെച്ചിരുന്നു. വേദനാജനകമായ കീമോതെറാപ്പി സമയത്തും പുഞ്ചിരിയോടെ ആരാധകർക്ക് മുന്നിലെത്തിയ താരം ലക്ഷക്കണക്കിന് ആളുകൾക്ക് പ്രചോദനമായി. 2018 അവസാനത്തോടെ രോഗമുക്തയായി താരം ഇന്ത്യയിലേക്ക് മടങ്ങിയെത്തി.

ചലച്ചിത്ര നിർമ്മാതാവ് ഗോൾഡി ബെഹലിനെയാണ് സോണാലി വിവാഹം കഴിച്ചത്. രൺവീർ എന്നൊരു മകനുണ്ട്. കാൻസർ ചികിത്സയ്ക്ക് ശേഷം വീണ്ടും അഭിനയരംഗത്ത് സജീവമായ താരം 2022-ൽ 'ദി ബ്രോക്കൺ ന്യൂസ്' എന്ന വെബ് സീരീസിലൂടെ അതിശക്തമായ തിരിച്ചുവരവ് നടത്തി. അഭിനയത്തിന് പുറമെ എഴുത്തുകാരിയായും റിയാലിറ്റി ഷോ വിധികർത്താവായും അവർ തന്റെ വ്യക്തിമുദ്ര പതിപ്പിച്ചു.