ട്രെയിനിൽ ടിക്കറ്റില്ലാതെ യാത്ര ചെയ്തതിന് പിഴ അടയ്ക്കാതിരുന്ന യാത്രക്കാരന് 15 ദിവസം തടവ്

കോഴിക്കോട്: ട്രെയിനിൽ ടിക്കറ്റില്ലാതെ യാത്ര ചെയ്ത യുവാവിന് 15 ദിവസം ജയിൽ ശിക്ഷ. കുറ്റിപ്പുറം വല്ലപ്പുഴ സ്വദേശിയായ മുഹമ്മദ് ഷാഫി(30) എന്നയാൾക്കാണ് ശിക്ഷ ലഭിച്ചത്. പിഴ അടയ്ക്കാതിരുന്നതോടെയാണ് ഇയാൾക്ക് ജയിൽശിക്ഷ ലഭിച്ചത്.

ഇക്കഴിഞ്ഞ ഏപ്രിൽ 27ന് മംഗളുരു-കോയമ്പത്തൂർ എക്സ്പ്രസ് ട്രെയിനിലാണ് മുഹമ്മദ് ഷാഫി ടിക്കറ്റില്ലാതെ യാത്ര ചെയ്തത്. പരിശോധനയ്ക്കായി എത്തിയ പ്രത്യേക സ്ക്വാഡാണ് മുഹമ്മദ് ഷാഫിയെ പിടികൂടിയത്. ഇതോടെ ഇയാൾക്ക് ടിക്കറ്റ് നിരക്ക് ഉൾപ്പടെ ആയിരം രൂപ പിഴയും ഈടാക്കി. എന്നാൽ പിഴ അടയ്ക്കാൻ ഇയാൾ തയ്യാറായില്ല.

ഇതോടെ കോഴിക്കോട് ടിക്കറ്റ് പരിശോധനവിഭാഗം മുഹമ്മദ് ഷാഫിയെ ഷൊർണൂർ ആർപിഎഫിന് കൈമാറി. കേസെടുത്ത ആർപിഎഫ് പിന്നീട് ഇയാളെ ജാമ്യത്തിൽ വിട്ടു. ആറുമാസത്തിനകം പിഴത്തുക ഷൊർണൂർ റെയിൽവേ കോടതിയിൽ ഒടുക്കണമെന്നതായിരുന്നു ജാമ്യവ്യവസ്ഥ.

എന്നാൽ ആറുമാസമായിട്ടും പിഴ അടയ്ക്കാത്തതിനെ തുടർന്ന് കോടതി സമൻസ് അയച്ചു. ഇതിനുശേഷവും യുവാവ് ഹാജരായില്ല. ഇതോടെ കോടതി അറസ്റ്റ് വാറണ്ട് പുറപ്പെടുവിക്കുകയായിരുന്നു.

ഷൊർണൂർ ആർപിഎഫ് സബ് ഇൻസ്പെക്ടർ ഹരികുമാറിന്‍റെ നേതൃത്വത്തിലുള്ള സംഘം വല്ലപ്പുഴയിലെ വീട്ടിൽനിന്ന് മുഹമ്മദ് ഷാഫിയെ അറസ്റ്റ് ചെയ്യുകയായിരുന്നു. കോടതിയിൽ ഹാജരാക്കിയ ഇദ്ദേഹത്തെ 15 ദിവസത്തേക്ക് റിമാൻഡ് ചെയ്യുകയായിരുന്നു.