Leo| ലിയോ ആയി ആദ്യം മനസ്സിലുണ്ടായിരുന്നത് വിജയ് ആയിരുന്നില്ല: ലോകേഷ് കനകരാജ്

ലോകേഷ് കനകരാജും ദളപതി വിജയിയും ഒന്നിച്ച ലിയോ തീർത്ത ഓളം ഇതുവരെ അവസാനിച്ചിട്ടില്ല. കഴിഞ്ഞ ദിവസം ചെന്നൈയിൽ ചിത്രത്തിന്റെ വിജയാഘോഷവും വിജയ് നടത്തിയിരുന്നു.

ചെന്നൈ നെഹ്രു സ്റ്റേഡിയത്തിൽ ലോകേഷ് കനകരാജിനൊപ്പം തൃഷ അടക്കമുള്ള പ്രധാന താരങ്ങളെല്ലാം പങ്കെടുത്തിരുന്നു. ആയിരക്കണക്കിന് ആരാധകരാണ് വിജയിയെ കാണാൻ എത്തിയത്. ഇതിന്റെ ദൃശ്യങ്ങൾ സോഷ്യൽമീഡയയിൽ വൈറലാണ്.

12 ദിവസം കൊണ്ട് 540 കോടിയിലധികം രൂപയാണ് ലിയോ തിയേറ്ററുകളില്‍ നിന്ന് നേടിയത്. ലോകേഷ് കനകരാജ്- രത്നകുമാര്‍ എന്നിവര്‍ ചേര്‍ന്ന് തിരക്കഥയൊരുക്കിയ ചിത്രം ലോകേഷ് സിനിമാറ്റിക് യൂണിവേഴ്സില്‍ ഉള്‍പ്പെടുന്ന ചിത്രമാണ്.

പതിവ് വിജയ് ശൈലിയിൽ നിന്ന് മാറിയുള്ള ചിത്രത്തിന് സമ്മിശ്ര പ്രതികരണമായിരുന്നു ആരാധകർക്കിടയിൽ നിന്ന് ലഭിച്ചത്. പക്ഷേ, പാർത്ഥി എന്ന ലിയോ ആയി വിജയ് തകർത്താടി എന്ന് ആരാധകർ പറയുന്നു.

എന്നാൽ, ലിയോ ആയി ആദ്യം മനസ്സിൽ കണ്ടിരുന്നത് മറ്റൊരു താരത്തെയാണെന്നാണ് സംവിധായകൻ ലോകേഷ് കനകരാജ് പറയുന്നത്. ഒരു അഭിമുഖത്തിലാണ് ലോകേഷ് ഇക്കാര്യം പറഞ്ഞത്.

അഞ്ച് വർഷങ്ങൾക്ക് മുമ്പാണ് ലിയോയുടെ കഥ രൂപപ്പെടുത്തിയതെന്നാണ് ലോകേഷ് പറയുന്നത്. അന്ന് വിജയ് ആയിരുന്നില്ല, പ്രധാന കഥാപാത്രമായി മറ്റൊരു താരത്തെയാണ് മനസ്സിൽ കണ്ടിരുന്നത്.

പക്ഷേ, മനസ്സിൽ കരുതിയത് പോലെ ആ കാസ്റ്റിങ് നടന്നില്ല. മാസ്റ്റർ എന്ന ചിത്രത്തിൽ വിജയിക്കൊപ്പം ജോലി ചെയ്തതോടെയാണ് തന്റെ തീരുമാനം മാറിയതെന്ന് ലോകേഷ് പറയുന്നത്.

ലിയോ ആയി വിജയിയെ അവതരിപ്പിക്കാം എന്ന തീരുമാനത്തിലെത്തുന്ന് മാസ്റ്ററിന് ശേഷമാണ്. എന്നാൽ, ഏത് താരത്തെയാണ് ലിയോ ആയി ആദ്യം മനസ്സിൽ കണ്ടതെന്ന് വെളിപ്പെടുത്താൻ ൻ ലോകേഷ് തയ്യാറായില്ല.