Salaar | പ്രഭാസിന്‍റെ സലാറിനായി കേരളത്തിലൊരുങ്ങുന്നത് വമ്പന്‍ റിലീസ്; എത്ര സ്ക്രീനുകള്‍ ? ആദ്യ ഷോ എപ്പോള്‍ ?

തെലുങ്ക് സൂപ്പര്‍ താരം പ്രഭാസിനൊപ്പം മലയാളത്തിന്‍റെ സ്വന്തം പൃഥ്വിരാജ് സുകുമാരനും ഒന്നിക്കുന്ന ബ്രഹ്മാണ്ഡ ചിത്രം സലാര്‍ പാര്‍ട്ട് വണ്‍ സീസ് ഫയറിനെ വരവേല്‍ക്കാന്‍ ഒരുങ്ങിയിരിക്കുകയാണ് ഇന്ത്യയൊട്ടാകെയുള്ള പ്രേക്ഷകര്‍.

കെജിഎഫ് എന്ന ഒറ്റ സിനിമയിലൂടെ ലോകമെമ്പാടുമുള്ള സിനിമ പ്രേമികളുടെ പ്രശംസ പിടിച്ചുപറ്റിയ പ്രശാന്ത് നീലാണ് സലാറിന്‍റെ സംവിധായകന്‍.

ഡിസംബര്‍ 22ന് റിലീസ് ചെയ്യുന്ന ചിത്രത്തിനായി വമ്പന്‍ പ്രോമൊഷന്‍ പരിപാടികളാണ് കേരളത്തിലുടനീളം പ്ലാന്‍ ചെയ്യുന്നത്.

സംസ്ഥാനത്തെ പ്രധാന നഗരങ്ങളിലെല്ലാം പ്രഭാസിന്‍റെയും പൃഥ്വിരാജിന്‍റെയും ചിത്രങ്ങളോട് കൂടിയ ഹോര്‍ഡിങ്ങുകളും പോസ്റ്ററുകളും നിരന്നു കഴിഞ്ഞു.

ഹോംബാലെ ഫിലിംസ് നിര്‍മ്മിക്കുന്ന ചിത്രം പൃഥ്വിരാജ് പ്രൊഡക്ഷന്‍സാണ് കേരളത്തില്‍ വിതരണത്തിന് എത്തിക്കുന്നത്. റിപ്പോര്‍ട്ടുകള്‍ പ്രകാരം മുന്നൂറിലധികം സ്ക്രീനുകളിലാണ് സലാര്‍ കേരളത്തില്‍ റിലീസ് ചെയ്യുന്നത്.

അഡ്വാന്‍സ്ഡ് ബുക്കിങ്ങിലും മികച്ച പ്രതികരണമാണ് സിനിമയ്ക്ക് ലഭിക്കുന്നത്. സംസ്ഥാന പ്രമുഖ തിയേറ്ററുകളില്‍ മിക്കയിടത്തും പുലര്‍ച്ചെ 6 മണിക്ക് ഫാന്‍സ് ഷോകള്‍ അടക്കം സംഘടിപ്പിച്ചിട്ടുണ്ടെന്നാണ് വിവരം.

ഖന്‍സാര്‍ എന്ന നഗരം പശ്ചാത്തലമാക്കി ഒരുക്കിയിരിക്കുന്ന സിനിമയുടെ ട്രെയിലറിന് പ്രേക്ഷകര്‍ക്കിടയില്‍ വലിയ പ്രശംസയാണ് ലഭിച്ചത്.

പ്രഭാസ് - ദേവ, പൃഥ്വിരാജ് - വരദരാജ മന്നാര്‍ എന്നീ കഥാപാത്രങ്ങളെയാണ് ചിത്രത്തില്‍ അവതരിപ്പിക്കുന്നത്. ശ്രുതി ഹാസനാണ് നായിക. ഗജപതി ബാബു, ബോബി സിംഹ, ഈശ്വരി റാവു, ശ്രിയ റെഡ്ഡി തുടങ്ങിയവരാണ് മറ്റ് താരങ്ങള്‍.