ഒരു ഹൃദയത്തിന് വലിയ വില നൽകേണ്ടി വരും; പെൺകുട്ടികൾക്ക് വാട്സ്ആപ്പിൽ ഹാർട്ട് ഇമോജി അയക്കുന്നത് കുറ്റകരമാക്കി സൗദിയും കുവൈറ്റും

പെൺകുട്ടികൾക്ക് വാട്സ്ആപ്പിലോ മറ്റേതെങ്കിലും സോഷ്യൽമീഡിയ പ്ലാറ്റ്ഫോമിലോ ഹാർട്ട് ഇമോജി അയക്കുന്നത് നിയമപ്രകാരം കുറ്റകരമാക്കി കുവൈറ്റും സൗദിയും.

ഹാർട്ട് ഇമോജി അയച്ചു എന്ന കുറ്റത്തിന് കടുത്ത ശിക്ഷാനടപടികൾ നേരിടേണ്ടി വരുമെന്ന് കുവൈറ്റിലെ അഭിഭാഷകനായ ഹല അൽ ഷലാഹിയെ ഉദ്ധരിച്ച് വിവിധ മാധ്യമങ്ങൾ റിപ്പോർട്ട് ചെയ്യുന്നു.

കുവൈറ്റിൽ ഹാർട്ട് ഇമോജി അയച്ചാൽ, രണ്ട് വർഷം വരെ തടവ് ശിക്ഷയും 2,000 കുവൈറ്റഅ ദിനാർ പിഴയായും നൽകേണ്ടി വരും.

കുവൈറ്റിന് പുറമേ, സൗദിയിലും സോഷ്യൽമീഡിയയിൽ ഹാർട്ട് ഇമോജി അയക്കുന്നത് കുറ്റകരമാണെന്നാണ് റിപ്പോർട്ടുകൾ. ചുവന്ന ഹാർട്ട് ഇമോജി അയക്കുന്നത് സൗദിയിൽ തടവ് ശിക്ഷ ലഭിക്കുന്ന കുറ്റമാണ്.

സൗദി നിയമം അനുസരിച്ച്, കുറ്റക്കാരനാണെന്ന് കണ്ടെത്തിയാൽ, രണ്ട് വർഷം മുതൽ അഞ്ച് വർഷം വരെ ജയിൽ ശിക്ഷ ലഭിച്ചേക്കാം. കൂടാതെ, 100,000 ലക്ഷം സൗദി റിയാൽ പിഴയായും നൽകേണ്ടി വരും.

ചാറ്റിൽ ഉപയോഗിക്കുന്ന ഇമോജികൾക്കും പദപ്രയോഗങ്ങൾക്കും എതിരെ ആരെങ്കിലും പരാതി നൽകിയാൽ അത് പീഡന പരാതിയില്‍ ഉള്‍പ്പെടുമെന്ന് സൗദി അറേബ്യയിലെ ആന്റി ഫ്രോഡ് അസോസിയേഷന്‍ അംഗം അല്‍ മൊതാസ് കുത്ബി ചൂണ്ടിക്കാട്ടി.

ആവർത്തിച്ച് നിയമലംഘനമുണ്ടായാൽ 300,000 സൗദി റിയാലായി പിഴ ഉയർന്നേക്കാം. കൂടാതെ പരമാവധി അഞ്ച് വർഷം വരെ തടവും ലഭിച്ചേക്കാം.