റീൽസെടുക്കുന്നതിനിടെ 300 അടി താഴ്ചയുള്ള വെള്ളച്ചാട്ടത്തിലേക്ക് വീണ് ഇൻഫ്ലുവൻസർ മരിച്ചു

മുംബൈ: റീൽസ് ചിത്രീകരിക്കുന്നതിനിടെയിൽ 300 അടി താഴ്ചയുള്ള വെള്ളച്ചാട്ടത്തിലേക്ക് വീണ് ഇൻഫ്ലുവൻസർ മരിച്ചു. ട്രാവൽ വ്ലോഗറായ ആൻവി കാംദാറാണ് (27) മരിച്ചത്. മഹാരാഷ്ട്രയിലെ റായ്ഗഡിലെ കുംഭെ വെള്ളച്ചാട്ടത്തിലാണ് സംഭവം.

ചൊവാഴ്ച രാവിലെ പത്തരയോടെയായിരുന്നു അപകടം. മഹാരാഷ്ട്രയിലെ റായ്ഗഡിലുള്ള കുംഭെ വെള്ളച്ചാട്ടത്തിന്റെ റീൽസ് ചിത്രീകരിക്കാൻ 7 സുഹൃത്തുക്കളുമായെത്തിയതാണ് ആൻവി.

തുടർന്ന് വീഡിയോ എടുക്കുന്നതിനിടെയിൽ 300 അടി താഴ്ചയുള്ള വെള്ളച്ചാട്ടത്തിനരികിലെ കുഴിയിലേക്ക് വീഴുകയായിരുന്നു. പോലീസും പ്രാദേശിക രക്ഷാപ്രവർത്തകരും ചേർന്ന് ഉടൻ തന്നെ സംഭവസ്ഥലത്തെത്തി രക്ഷാപ്രവർത്തനം നടത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ആറ് മണിക്കൂറോളം നീണ്ട രക്ഷാപ്രവർത്തനത്തിനൊടുവിലാണ് ആൻവിയെ കണ്ടെത്തുന്നത്. വെള്ളച്ചാട്ടത്തിനിടയിലെ വിള്ളലിനുള്ളിൽ നിന്നാണ് കണ്ടെത്തിയത്.ഉടൻ തന്നെ ആശുപത്രിയിൽ എത്തിച്ച ആൻവി ചികിത്സയ്ക്കിടെയാണ് മരണപ്പെട്ടത്.

ചാർട്ടേഡ് അക്കൗണ്ടന്റായിരുന്നു ആൻവി. ഐടി–ടെക്നോളജി കൺസൾട്ടിങ് കമ്പനിയിലും ജോലി ചെയ്തിരുന്നത്. ഇസ്റ്റഗ്രാമിൽ രണ്ടര ലക്ഷത്തിലേറെ പേർ ഫോളോ ചെയ്യുന്ന ഇൻഫ്ലുവൻസറാണ് ആൻവി.

നിരവധി ട്രാവൽ വ്ലോഗുകളും സോഷ്യൽ മീഡിയയിൽ പങ്കുവെക്കാറുണ്ടായിരുന്നു. 'ട്രാവൽ ഡിക്റ്റിവ്' എന്നാണ് സമൂഹമാധ്യമത്തിൽ ആൻവി സ്വയം വിശേഷപ്പിച്ചിരുന്നത്.