Manoharam movie review: വർണ്ണ വസന്തങ്ങളുടെ മനോഹാരിത നിറഞ്ഞൊരു ചിത്രം

ജീവൻ തുടിക്കുന്ന മുഖങ്ങളും ചിത്രങ്ങളും കളങ്ങൾക്കുള്ളിലെ വരകളിലൂടെ, ചായം ചാലിച്ച്, വഴിയോരങ്ങളിലെ പടുകൂറ്റൻ ക്യാൻവാസ് പരസ്യ ബോർഡുകളിൽ ക്ഷമയോടെയും കൃത്യതയോടെയും വരച്ച് പൂർത്തിയാക്കുന്ന കലാകാരന്മാർ ഒരു കാലത്തെ കാഴ്ചയായിരുന്നു. അവരുടെ കൈകളിലെ ബ്രഷിനും പെയ്ന്റിനും മാസ്മരികതയുണ്ടോ എന്ന് ചിന്തിക്കാത്തവർ വിരളം. ഒരു സുപ്രഭാതത്തിൽ ഒറ്റ ക്ലിക്കിലൂടെ ഈ പറയുന്നവയൊക്കെ ഞൊടിയിടയിൽ പ്രിന്റ് ചെയ്ത് കിട്ടുന്ന ഫ്ലെക്സുകൾ വിപണിയിൽ ഒഴുകാൻ തുടങ്ങിയതോടു കൂടി വറുതിയുടെ കഥ മാത്രം ബാക്കിയായ ജീവിതങ്ങൾ മാത്രമായി അവർ മാറി. സാമ്പത്തിക മുതൽമുടക്ക് നടത്തി ടെക്നോളജിയുടെ വഴിയേ ചുവടു പിടിക്കാൻ അവരിൽ എല്ലാവർക്കും കഴിഞ്ഞില്ല എന്നത് തന്നെ കാരണം.

മനോഹരൻ അഥവാ മനു (വിനീത് ശ്രീനിവാസൻ) എന്ന ചെറുപ്പക്കാരനായ കലാകാരൻ സാങ്കേതികതയുടെ കുത്തൊഴുക്കിൽ പിടിച്ചു നില്ക്കാൻ നടത്തുന്ന തത്രപ്പാടുകളുടെ കഥയുമായി തിയേറ്ററിൽ എത്തിയിരിക്കുന്ന ചിത്രമാണ് മനോഹരം. ആരെയും അത്ഭുതപ്പെടുത്തുന്ന ഡിസൈനുകൾ ഒരുക്കാനുള്ള കഴിവാണ് അയാളുടെ സർവ്വസ്വം. അച്ഛനിൽ നിന്നും സ്വായത്തമാക്കിയ വിദ്യ. പക്ഷെ നിലനിൽപ്പിനായി മനുവിന്റെ മുന്നോട്ടുള്ള യാത്രയിൽ ടെക്‌നോളജിയുടെ സഹായത്തോടുകൂടിയുള്ള ബിസിനസ്സിൽ പയറ്റി തെളിഞ്ഞേ പറ്റൂ. അങ്ങനെ മികച്ച പെയ്ന്റ്ററായ മനു ഫ്ലെക്സ് നിർമ്മാണ യൂണിറ്റ് തുറക്കുക എന്ന ലക്ഷ്യത്തിലേക്ക്‌ ശ്രദ്ധ കേന്ദ്രീകരിക്കുന്നു.