'വിദ്യാർഥികൾക്കെതിരെ UAPA ചുമത്തിയത് പൊലീസ്'; പി.ബിയിൽ വിശദീകരണവുമായി മുഖ്യമന്ത്രി

ന്യൂഡൽഹി: കോഴിക്കോട്ടെ യുഎപിഎ അറസ്റ്റിൽ പൊളിറ്റ് ബ്യൂറോയിൽ വിശദീകരണം നൽകി മുഖ്യമന്ത്രി പിണറായി വിജയൻ. പൊലീസാണ് വിദ്യാർത്ഥികൾക്കെതിരെ യു എ പി എ ചുമത്തിയതെന്ന് മുഖ്യമന്ത്രി പറഞ്ഞു. വിഷയം നിയമപരമായി സർക്കാരിന് മുന്നിലെത്തുമ്പോൾ ഉചിതമായ തീരുമാനമെടുക്കും. യു എ പി എ കരിനിയമമാണെന്ന് പി.ബിയിലെ ഭൂരിപക്ഷ അംഗങ്ങളും പറഞ്ഞു. രണ്ട് ദിവസത്തെ സിപിഎം പൊളിറ്റ് ബ്യൂറോ യോഗം ഡൽഹിയിൽ സമാപിച്ചു.

പൊതു തിരഞ്ഞെടുപ്പിന് ശേഷമുള്ള നിലവിലെ രാഷ്ട്രീയ സാഹചര്യത്തിന് പുറമെ അയോധ്യ, ശബരിമല യുവതീപ്രവേശ വിഷയങ്ങളിലെ സുപ്രീംകോടതി തീരുമാനവും ചർച്ചയായി. ശബരിമല നിലപാടിൽ പിന്നോട്ടില്ലെന്നാണ് പി.ബി നിലപാട്.

ലിംഗസമത്വം ഉയർത്തിപ്പിടിക്കുന്ന നിലപാടിൽ മാറ്റമില്ല. സംസ്ഥാന സർക്കാരിനും മറിച്ചൊരു നിലപാടില്ല. സുപ്രീം കോടതി വിധിയിൽ വ്യക്തത വേണം. നിയമോപദേശം തേടണമെന്നും പി.ബി വിലയിരുത്തി.

മഹാരാഷ്ട്ര, ഹരിയാന നിയമസഭാ തിരഞ്ഞെടുപ്പ്, വിവിധ സംസ്ഥാനങ്ങളിലെ ഉപതിരഞ്ഞെടുപ്പ് ഫലം എന്നീ വിഷയങ്ങളും പൊളിറ്റ് ബ്യൂറോ യോഗം ചര്‍ച്ച ചെയ്തു.