' ചിത്രം കണ്ടു, തികച്ചും പുതിയൊരു സിനിമാനുഭവം'; 'ഭ്രമയുഗ'ത്തെ പ്രശംസിച്ച് ജീത്തു ജോസഫ്

രാഹുൽ സദാശിവൻ സംവിധാനം ചെയ്ത ‘ഭ്രമയുഗം' ആരാധകരെ ഞെട്ടിച്ച് മുന്നേറുകയാണ്. തീയറ്ററിൽ നിന്ന് പുറത്തിറങ്ങുന്ന ഓരോ ആരാധകനും പറയാനുള്ളത് കൊടുമൺ പോറ്റിയും പിള്ളേരും പൊളിച്ചുവെന്നാണ്. സോഷ്യൽ മീഡിയയിലും മമ്മൂട്ടിയാണ് തരംഗം.

മിസ്റ്ററി- ഹൊറർ ത്രില്ലർ ഴോണറിൽ പുറത്തിറങ്ങിയ ചിത്രം മനുഷ്യന്റെ അധികാരത്തെയും അത്യാർത്തിയെയും ഹൊറർ എലമെന്റുകൾ ചേർത്ത് ചിത്രീകരിക്കുന്നു.

ഇപ്പോഴിതാ ചിത്രത്തെ പ്രശംസിച്ച് സംവിധായകൻ ജീത്തു ജോസഫ് രംഗത്തെത്തിയിരിക്കുകയാണ്. ഭ്രമയുഗം കണ്ടു, തികച്ചും പുതിയൊരു സിനിമാനുഭവമാണ് സിനിമ തന്നത്.

തിയേറ്ററിൽ തന്നെ കണ്ട് ആസ്വദിക്കേണ്ട സിനിമായാണ് ഭ്രമയുഗമെന്നും ജീത്തു ജോസഫ് പറയുന്നത്. കൂടാതെ സംവിധായകൻ രാഹുൽ സദാശിവനും അണിയറപ്രവർത്തകർക്കും ആശംസകളും ജീത്തു ജോസഫ് അറിയിച്ചു.

റിലീസിന് മുൻപ് ഏറെ ശ്രദ്ധിക്കപ്പെട്ട ചിത്രത്തിൽ അർജുൻ അശോകൻ, സിദ്ധാർത്ഥ് ഭരതൻ, അമാൽഡ ലിസ്, മണികണ്ഠൻ അചാരി തുടങ്ങിവർ പ്രധാന വേഷത്തിൽ എത്തിയിരിക്കുന്നു.