'കൊടുമൺ പോറ്റിയും പിള്ളേരും പൊളിച്ചു'; വാപ്പച്ചിക്ക് സ്നേഹ ചുംബനം നല്‍കി ദുൽഖർ സൽമാൻ

ആരാധകരെ ഞെട്ടിച്ച് മുന്നേറുകയാണ് രാഹുൽ സദാശിവൻ സംവിധാനം ചെയ്യുന്ന ‘ഭ്രമയുഗം'. തീയറ്ററിൽ നിന്ന് പുറത്തിറങ്ങുന്ന ഓരോ ആരാധകനും പറയാനുള്ളത് കൊടുമൺ പോറ്റിയും പിള്ളേരും പൊളിച്ചുവെന്നാണ്. സോഷ്യൽ മീഡിയയിലും മമ്മൂട്ടിയാണ് തരംഗം.

നിരവധി ആരാധകരാണ് താരത്തിനെ പ്രശംസിച്ച് എത്തുന്നത്. ഇതിനിടെയിൽ വാപ്പച്ചിക്ക് സ്നേഹ ചുംബനം നല്‍കി ദുൽഖർ സൽമാൻ. മമ്മൂട്ടി ഇൻസ്റ്റഗ്രാമിൽ പങ്കുവച്ച കൊടുമൺ പോറ്റിയുടെ ചിത്രത്തിനു താഴെയാണ് ‘മുത്ത’വുമായി ദുൽഖർ എത്തിയത്.

'ഭ്രമയു​ഗം' ക്യാരക്ടർ ലുക്കിൽ വളരെ കൂളായി ഇരിക്കുന്ന മമ്മൂട്ടിയെയാണ് ഫോട്ടോയാണ് താരം സോഷ്യൽ മീഡിയയിൽ പങ്കുവച്ചത്. ഭ്രമയു​ഗം എന്ന ഹാഷ്ടാ​ഗോട് ആണ് മമ്മൂട്ടി തന്റെ സോഷ്യൽ മീഡിയ അക്കൗണ്ടുകളിൽ ഫോട്ടോ പങ്കുവച്ചിരിക്കുന്നത്.

ഇതിനു പിന്നാലെ മമ്മൂട്ടിക്ക് എങ്ങും പ്രശംസാ പ്രവാഹം ആണ്. നിരവധി താരങ്ങളും പോസ്റ്റിനു കമന്റുമായി എത്തുന്നുണ്ട്.

'ഇത്രേം ചെയ്ത് വെച്ചിട്ട് ഒന്നും അറിയാത്ത പോലെ ആ ഇരുപ്പ് കണ്ടില്ലേ, ഇത് അയാളുടെ കാലം ആണ്. ആരും വട്ടം നിൽക്കണ്ട. രാക്ഷസനടികർ, ഒത്തിരി അഭിമാനിക്കുന്നു ഈ മഹാനടന്റെ ആരാധകൻ ആയതിൽ, നിങ്ങളുടെ ആരാധകർ ആയതിൽ എന്നും നെഞ്ചും വിരിച്ചേ നിന്നിട്ടെ ഒള്ളു. മമ്മൂക്ക..വീണ്ടും നന്ദി മമ്മൂക്ക', എന്നിങ്ങനെ പോകുന്നു കമന്റുകൾ.

റിലീസിന് മുൻപ് ഏറെ ശ്രദ്ധിക്കപ്പെട്ട ചിത്രത്തിൽ അർജുൻ അശോകൻ, സിദ്ധാർത്ഥ് ഭരതൻ, അമാൽഡ ലിസ്, മണികണ്ഠൻ അചാരി തുടങ്ങിവർ പ്രധാന വേഷത്തിൽ എത്തിയിരിക്കുന്നു.