Covid Vaccination | 200 കോടി ഡോസ് വാക്സിനേഷന്‍ പൂര്‍ത്തിയാക്കി രാജ്യം; അഭിനന്ദനവുമായി പ്രധാനമന്ത്രി നരേന്ദ്ര മോദി

ന്യൂഡല്‍ഹി: രാജ്യത്ത് 200 കോടി ഡോസ് കോവിഡ് വാക്‌സിനേഷന്‍ പൂര്‍ത്തിയായതായി കേന്ദ്ര ആരോഗ്യമന്ത്രാലയം. രാജ്യത്തെ പ്രായപൂര്‍ത്തിയായ 98 ശതമാനം ആളുകളും രണ്ട് ഡോസ് വാക്സിനും സ്വീകരിച്ചവരാണെന്നും 90 ശതമാനം ഒരു ഡോസ് സ്വീകരിച്ചവരാണെന്നും ആരോഗ്യമന്ത്രാലയം പുറത്തുവിട്ട കണക്കില്‍ പറയുന്നു.

രാജ്യത്തെ സംബന്ധിച്ച് ചരിത്ര സംഭവമാണെന്ന് പ്രധാനമന്ത്രി നരേന്ദ്ര മോദി ട്വീറ്റി ചെയ്തു. ഇതിന് പിന്നില്‍ പ്രവര്‍ത്തിച്ചവരെയും ഓരോ പൗരന്മാരെയും അനുമോദിക്കുകയാണെന്നും പ്രധാനമന്ത്രി ട്വീറ്റില്‍ കുറിച്ചു.

15-18 പ്രായപരിധിയിലുള്ളവരുടെ വാക്സിനേഷനില്‍ 82 ശതമാനം പേര്‍ ഒരു ഡോസും 68 ശതമാനം പേര്‍ രണ്ട് ഡോസും സ്വീകരിച്ചുവെന്നും മന്ത്രാലയം വ്യക്തമാക്കി. 15 വയസ്സിന് മുകളിലുള്ളവരുടെ വാക്‌സിനേഷന്‍ ഈ വര്‍ഷമാദ്യമാണ് ആരംഭിച്ചത്.

ഏറ്റവും കൂടുതല്‍ ഡോസുകള്‍ നല്‍കിയ ആദ്യ അഞ്ച് സംസ്ഥാനങ്ങള്‍ ഉത്തര്‍പ്രദേശ് (34,41,93,641), മഹാരാഷ്ട്ര (17,05,59,447), പശ്ചിമ ബംഗാള്‍ (14,40,33,794), ബിഹാര്‍ (13,98,52,042) മധ്യപ്രദേശ് (12,13,15,911) എന്നിവയാണ്. യോഗ്യരായ 5,63,67,888 മുന്‍കരുതല്‍ ഡോസുകള്‍ നല്‍കിയിട്ടുണ്ട്.

രാജ്യത്ത് കൊവിഡ് വാക്‌സിന്‍ ഡോസുകള്‍ കഴിഞ്ഞ വര്‍ഷം ഒക്ടോബര്‍ 21 ന് 100 കോടിയും ഈ വര്‍ഷം ജനുവരി 7 ന് 150 കോടിയും കടന്നിരുന്നു. ബിജെപി നേതാവ് ജെപി നദ്ദ, ആരോഗ്യമന്ത്രി മന്‍സൂഖ് മാണ്ഡവ്യയും വിദേശകാര്യ മന്ത്രി എസ് ജയശങ്കര്‍ എന്നിവരും ഈ നേട്ടത്തില്‍ രാജ്യത്തെ അഭിനന്ദിച്ചു.