കൂട്ടുകാർക്കൊപ്പം നിൽക്കുന്ന ഈ സൂപ്പർ നായികയെ തിരിച്ചറിയാനാകുന്നുണ്ടോ? ത്രോബാക്ക് ചിത്രങ്ങൾ വൈറൽ

ത്രോബാക്ക് ചിത്രങ്ങളുടെ കാലമാണ്. സമൂഹമാധ്യമങ്ങളിലൂടെ പഴയകാല ചിത്രങ്ങൾ പങ്കുവെച്ച് ലോക്ക്ഡൗണിന്റെ വിരസത തീർക്കുന്നവർ കുറവല്ല. നിരവധി സിനിമാ താരങ്ങളുടെ ത്രോബാക്ക് ചിത്രങ്ങൾ ഇതിനോടകം വൈറലായിട്ടുണ്ട്.

ഇപ്പോഴിതാ മറ്റൊരു സൂപ്പർ നായികയുടെ ത്രോബാക്ക് ചിത്രങ്ങൾ സമൂഹമാധ്യമങ്ങളിൽ വൈറലായിരിക്കുകയാണ്. രണ്ട് കുട്ടിക്കാല ചിത്രങ്ങൾ ചേർത്തുവെച്ച കൊളാഷാണിത്.

സുഹൃത്തുക്കൾക്കൊപ്പം മറ്റൊരു സുഹൃത്തിന്റെ ജന്മദിനാഘോഷത്തിൽ പങ്കെടുക്കുന്നതിന്റെ ചിത്രങ്ങളാണിത്. തെന്നിന്ത്യയിലും ബോളിവുഡിലും ഒരു പോലെ തിളങ്ങിയ സൂപ്പർ നായികയുടേതാണ് ചിത്രങ്ങൾ.

മറ്റാരുമല്ല, മുൻ ലോക സുന്ദരി ഐശ്വര്യ റായി ബച്ചന്റേതാമ് ഈ ചിത്രങ്ങൾ. ഐശ്വര്യ സിനിമയിലെത്തുന്നതിന് ഏറെ മുമ്പുള്ളതാണ് ചിത്രങ്ങൾ.

ഒരു ചിത്രത്തിൽ വലത്തേ അറ്റത്താണ് ഐശ്വര്യ നിൽക്കുന്നത്. വെളുത്ത വസ്ത്രമാണ് വേഷം. രണ്ടാമത്തെ ചിത്രത്തിൽ ഏറ്റവും പിന്നിൽ വലത്തു നിന്ന് രണ്ടാമതായി ഐശ്വര്യ നിൽക്കുന്നു. ആരാധകരാണ് ഐശ്വര്യയുടെ ത്രോബാക്ക് ചിത്രങ്ങൾ പങ്കുവെച്ചിരിക്കുന്നത്.

ഇതാദ്യമായിട്ടല്ല ഐശ്വര്യയുടെ ത്രോബാക്ക് ചിത്രങ്ങൾ പുറത്തു വരുന്നത്. അടുത്തിടെ രൺബീർ കപൂറിനൊപ്പം ഐശ്വര്യ നിൽക്കുന്ന രണ്ട് ചിത്രങ്ങൾ ഫിലിം ഫെയർ പങ്കുവെച്ചിരുന്നു. ആദ്യ ചിത്രം ഇരുവരുടെയും കൗമാരകാലത്തേതാണ്. രണ്ടാമത്തേത് യേ ദിൽ ഹെ മുശ്കിൽ എന്ന ചിത്രത്തിലേതും.

2018 ൽ പുറത്തിറങ്ങിയ ഫണ്ണി ഖാൻ ആണ് ഐശ്വര്യ ഒടുവിൽ അഭിനയിച്ച ചിത്രം. അനിൽ കപൂർ, രാജ്കുമാർ റാവു എന്നിവരും ചിത്രത്തിൽ പ്രധാന വേഷത്തിലെത്തിയിരുന്നു. മണിരത്നം ചിത്രമാണ് ഇനി വരാനുള്ളത്.