സംവിധായകനായി അരങ്ങേറ്റം കുറിക്കാന്‍ ആര്യന്‍ ഖാന്‍; വെബ് സീരീസ് 'സ്റ്റാര്‍ഡത്തി'ലൂടെ

ഷാരൂഖ് ഖാന്റെ മകൻ ആര്യൻ ഖാൻ തന്റെ വെബ് സീരീസായ ''സ്റ്റാർഡമി''ലൂടെ സംവിധായകനായി അരങ്ങേറ്റം കുറിക്കാനൊരുങ്ങുകയാണ്. ബോളിവുഡ് താരങ്ങളെ അവരായിട്ടു തന്നെ അവതരിപ്പിക്കുന്ന ഈ പരമ്പര ടിൻസെൽ ടൌണിൽ തങ്ങളുടെ ഭാഗ്യം പരീക്ഷിക്കാൻ എത്തുന്ന ഒരു കൂട്ടം ആളുടെ പോരാട്ടത്തിന്റെയും നിലനില്പിന്റെയും കഥയാണ്.

ഏറ്റവും പുതിയ റിപ്പോർട്ട് അനുസരിച്ച് വളരെ ഹാസ്യാത്മകമായ ഒരു പരമ്പരയായിരിക്കും ഇതെന്നാണ് വിവരം.രാമൻ രാഘവ് 2.0 പോലെ ഒരു സിനിമയാണ് ഞങ്ങൾ ലക്ഷ്യമിടുന്നതെന്ന് ഛായാഗ്രഹകൻ ജയ് ഓസ ഫിലിം കമ്പാനിയനോട് പറഞ്ഞു .

കഥയുടെ സ്വഭാവം അതാണ്. എന്നാൽ ആര്യനോടൊപ്പം ഞാൻ ചെയ്യുന്ന ഷോയിൽ എനിക്ക് ആ സമീപനം സ്വീകരിക്കാൻ കഴിയില്ല, കാരണം അതിൽ ആവശ്യത്തിനു ഹാസ്യവും എന്റർടെയ്ൻമെന്റുമുണ്ട്. അത് ആര്യന്റെ താൽപര്യങ്ങൾക്കു അനുസരിച്ചു ചെയ്യുന്നതാണ്,അതിനാൽ ഞാൻ കാര്യങ്ങൾ ആര്യന് വിട്ടുകൊടുക്കുന്നു.

അരങ്ങേറ്റ പരമ്പരയുടെ ചിത്രീകരണം പൂർത്തിയാക്കിയ ആര്യൻ ഖാൻ അടുത്തിടെ തൻ്റെ അഭിനേതാക്കളെയും അണിയറപ്രവർത്തകരെയും അണിനിരത്തി ഒരു വലിയ റാപ് പാർട്ടി സംഘടിപ്പിച്ചിരുന്നു.

പരമ്പരയിലൂടെ സംവിധായകനായി അരങ്ങേറ്റം കുറിക്കുന്ന ആര്യൻ സഹപ്രവർത്തകർക്കൊപ്പം കേക്ക് മുറിച്ച് ആഘോഷിക്കുന്നത് വീഡിയോകളിൽ കാണാം. പരമ്പരയുടെ ഭാഗമാകാൻ പോകുന്ന ബോബി ഡിയോളും പാർട്ടിയിൽ പങ്കെടുത്തിരുന്നു.

മറ്റൊരു വീഡിയോയിൽ, പരമ്പരയുടെ ചിത്രീകരണം പൂർത്തിയാക്കാൻ സഹായിച്ച ക്രൂ അംഗങ്ങളെ ആര്യൻ പ്രശംസിക്കുന്നത് കാണാം. രൺബീർ കപൂറിൻ്റെ രാമായണത്തിൻ്റെ ഭാഗമാകാൻ പോകുന്ന അണിയറപ്രവർത്തകരിൽ ഒരാൾക്ക് അദ്ദേഹം ആശംസകൾ അറിയിക്കുന്നതും കേൾക്കാം.

റെഡ് ചില്ലീസ് മൂവീസ് നിർമിച്ച മികച്ച ചിത്രങ്ങളായ ഓം ശാന്തി ഓം, സീറോ, മേ ഹൂൻ നാ എന്നിവയുടെ പോസ്റ്ററുകൾ കോർത്തിണക്കിയ ഒരു വലിയ പശ്ചാത്തല പോസ്റ്റർ വേദിയിൽ പ്രദർശിപ്പിച്ചിരുന്നു.

ആര്യൻ ഖാന്റെ ആദ്യ പരമ്പരയാണ് സ്റ്റാർഡം. അന്ധേരി ഈസ്റ്റിലെ ഒരു സ്റ്റുഡിയോ മുതൽ മാധ് ദ്വീപ് വരെയുള്ള സ്ഥലങ്ങളിൽ ഏപ്രിലിൽ മുഴുവൻ ആര്യൻ സ്റ്റാർഡമിന്റെ ഷൂട്ടിംഗ് തിരക്കിലായിരുന്നുവെന്ന് മിഡ്-ഡേ റിപ്പോർട്ട് ചെയ്തു. ഈ മാസമാദ്യം പരമ്പരയുടെ അഞ്ച് ദിവസത്തെ ചിത്രീകരണത്തിനായി അദ്ദേഹം ഗോരേഗാവിലും പോയിരുന്നു.

സ്റ്റാർഡം ആര്യന്റെ ആദ്യ പരമ്പര ആണെങ്കിലും, കഴിഞ്ഞ വർഷം അദ്ദേഹം തന്റെ പിതാവായ ബോളിവുഡ് സൂപ്പർസ്റ്റാർ ഷാരൂഖ് ഖാനെ വച്ച് ഒരു പരസ്യം സംവിധാനം ചെയ്തിരുന്നു.