നടി ആത്മഹത്യ ചെയ്തു; പക്ഷെ ഗൂഗിൾ ട്രെൻഡ്‌സിൽ കാണുന്ന പേര് നടി അനുപമ പരമേശ്വരന്റേത്

നടി ആത്മഹത്യ ചെയ്ത വാർത്തയുമായി ബന്ധപ്പെട്ട് മലയാളി നടി അനുപമ പരമേശ്വരന്റെ പേര് ഗൂഗിൾ ട്രെൻഡ്‌സിന്റെ ട്രെൻഡിംഗ് പട്ടികയിൽ. കഴിഞ്ഞ ദിവസം മുതൽ അനുപമയുടെ പേര് ഈ പട്ടികയിലുണ്ട്

ഗൂഗിൾ ട്രെൻഡ്‌സിന്റെ പട്ടികയിൽ നോക്കിയാൽ അനുപമ പരമേശ്വരൻ എന്ന പേര് കാണാം. ഒരേ പേരിൽ മറ്റൊരു നടി കൂടി ഉണ്ടായതാണ് വിഷയം

ഭോജ്പുരി നടി അനുപമ പഥകിനെ വീടിനുള്ളിൽ ആത്മഹത്യ ചെയ്ത നിലയിൽ കാണുകയായിരുന്നു. ഓഗസ്റ്റ് രണ്ടിനാണ് അനുപമയുടെ മരണം നടന്നതായി റിപ്പോർട്ട് വരുന്നത്

എന്നാൽ ഈ താരത്തിന്റെ പേരിന് പകരമാണ് അനുപമ പരമേശ്വരന്റെ പേര് ഗൂഗിൾ ട്രെൻഡിൽ പൊന്തിവരുന്നത്. സെർച്ച് ഫലങ്ങളുടെ അടിസ്ഥാനത്തിലാണ് ട്രെൻഡിംഗ് പട്ടികയിൽ വിഷയങ്ങൾ ഇടംപിടിക്കുക

എന്നാൽ അനുപമ പരമേശ്വരനാകട്ടെ നീണ്ട ഇടവേളയ്ക്കു ശേഷം 'മണിയറയിലെ അശോകൻ' എന്ന സിനിമയിലൂടെ മലയാളത്തിലേക്ക് മടങ്ങി വരവിനു ഒരുങ്ങുകയാണ്

പ്രേമത്തിലെ മേരിയായി അഭിനയ ജീവിതം തുടങ്ങിയ അനുപമ കേവലം മൂന്ന് മലയാള ചിത്രങ്ങളിലാണ് വേഷമിട്ടിട്ടുള്ളത്. മലയാളത്തിൽ നിന്നും മാറിനിൽക്കാൻ കാരണം ട്രോൾ ആക്രമണമാണെന്നും അനുപമ ഒരു അഭിമുഖത്തിൽ വെളിപ്പെടുത്തിയിരുന്നു

'മണിയറയിലെ അശോകൻ' സിനിമയിൽ അസിസ്റ്റന്റ് ഡയറക്‌ടറുടെ വേഷവും അനുപമയ്ക്കുണ്ട്. ആദ്യമായാണ് അത്തരമൊരു ചുമതല അനുപമ ഏറ്റെടുക്കുന്നത്

മലയാളത്തിൽ നിന്നും മാറി നിന്നെങ്കിലും തമിഴ്, തെലുങ്ക്, കന്നഡ സിനിമകളിൽ അനുപമ സജീവമാണ്