Actor Vijay| 8 കോടിയുടെ കാറിന് വിജയ് 1.6 കോടി നികുതി അടച്ചിരുന്നു: നടി കസ്തൂരി ശങ്കർ

വിദേശത്തു നിന്ന് ഇറക്കുമതി ചെയ്ത ആഢംബര കാറിന് പിഴ ചുമത്തിയ സംഭവത്തിൽ നടൻ വിജയ്ക്ക് പിഴ വിധിച്ച സംഭവത്തിൽ പ്രതികരണവുമായി നടി കസ്തൂരി ശങ്കർ. ഇംഗ്ലണ്ടിൽ നിന്ന് ഇറക്കുമതി ചെയ്ത എട്ട് കോടിയുടെ റോൾസ് റോയസ് ഗോസ്റ്റ് കാർ ആണ് വിജയ് വാങ്ങിയത്.

കാറിന് പ്രവേശന നികുതി ചുമത്തിയത് ചോദ്യം ചെയ്ത് വിജയ് സമർപ്പിച്ച ഹർജി തള്ളിയാണ് മദ്രാസ് ഹൈക്കോടതി ഒരുലക്ഷം രൂപ പിഴ ചുമത്തിയത്. രണ്ടാഴ്ച്ചക്കുള്ളിൽ തുക തമിഴ്നാട് മുഖ്യമന്ത്രിയുടെ ദുരിതാശ്വാസനിധിയിലേക്ക് അടക്കാനാണ് ഉത്തരവ്.

കഴിഞ്ഞ ദിവസത്തെ പ്രധാന വാർത്തകളിൽ ഒന്നായിരുന്നു ഇത്. വിജയിയുടെ വിവാദ കാറിന്റെ ചിത്രം പങ്കുവെച്ചാണ് കസ്തൂരി പ്രതികരണം നടത്തിയിരിക്കുന്നത്. എട്ട് കോടി മുടക്കി വാങ്ങിയ കാറിന് വിജയ് 1.6 കോടി നികുതിയായി നൽകിയെന്ന് കസ്തൂരി തന്റെ ട്വീറ്റിൽ പറയുന്നു.

നടനെതിരെ രൂക്ഷമായ വിമർശനമാണ് കോടതിയുടെ ഭാഗത്തു നിന്ന് ഉണ്ടായത്. അഴിമതിക്കെതിരായ പോരാട്ടമൊക്കെ സിനിമയില്‍ മാത്രം മതിയോ എന്നായിരുന്നു പിഴ വിധിച്ചതിനു ശേഷം ജസ്റ്റിസ് എം സുബ്രഹ്മണ്യന്റെ ചോദ്യം.

വിജയിയെ പോലെ നിരവധി ആരാധകരുള്ള നടൻമാർ വെറും 'റീൽസ് ഹീറോസ്' മാത്രമാകരുതെന്ന് കോടതി വ്യക്തമാക്കി. 2012 ലാണ് വിജയ് ഹർജി സമർപ്പിച്ചത്. കാർ വാങ്ങിയ സമയത്ത് കസ്റ്റംസ് ആക്ട് പ്രകാരം വിജയ് ഇറക്കുമതി നികുതിയും നൽകിയിരുന്നു.

വാഹനം ചെന്നൈ സൗത്തിലെ റീജിയണൽ ട്രാൻസ്‌പോർട്ട് ഓഫീസറുടെ ഓഫീസിൽ രജിസ്റ്റർ ചെയ്യേണ്ടതുണ്ടായിരുന്നു. പുതിയ രജിസ്ട്രേഷൻ ലഭിക്കുന്നതിന് വിജയ് റീജിയണൽ ട്രാൻസ്പോർട്ട് ഓഫീസറെയും വെഹിക്കിൾ ഇൻസ്പെക്ടറെയും സമീപിച്ചപ്പോൾ, ചെന്നൈയിലെ അസിസ്റ്റന്റ് കമ്മീഷണർ, അസസ്മെന്റ് സർക്കിളിൽ എന്നിവരിൽ നിന്ന് എൻട്രി ടാക്സ് നൽകേണ്ടതില്ലെന്ന സർട്ടിഫിക്കറ്റ് വേണമെന്ന് ആവശ്യപ്പെട്ടു.

എന്നാൽ പ്രവേശന നികുതി നിർബന്ധമായും അടക്കണമെന്നും ഇതിനു ശേഷം മാത്രമേ രജസിട്രേഷൻ സർട്ടിഫിക്കറ്റ് നൽകാനാകൂ എന്നായിരുന്നു നടന് ലഭിച്ച അറിയിപ്പ്. ഇതേ തുടർന്നാണ് വിജയ് കോടതിയെ സമീപിച്ചത്. ഇറക്കുമതി ചെയ്ത വാഹനത്തിന് അതീഭീമമായ പ്രവേശന നികുതി ചുമത്തിയതിനെതിരെ വിജയ് കോടതിയെ സമീപിക്കുകയായിരുന്നു.

രജിസ്ട്രേഷൻ ലഭിക്കാത്തിനാൽ കാർ ഉപയോഗിക്കാനും താരത്തിന് കഴിഞ്ഞിരുന്നില്ല. പ്രവേശന നികുതിയിൽ നിന്ന് ഒഴിവാക്കണമെന്ന് ആവശ്യപ്പെട്ടായിരുന്നു അദ്ദേഹം കോടതിയെ സമീപിച്ചത്.

നികുതി അടക്കാനുള്ള ബാധ്യത എല്ലാ പൗരന്മാർക്കുണ്ടെന്നായിരുന്നു കോടതി പരാമർശം. കൂടാതെ ഒമ്പത് വർഷം മുമ്പ് സമർപ്പിച്ച ഹർജി ഇത്രയും നാൾ പരിഗണിക്കാതിരുന്നതും കോടതി വിമർശിച്ചു.

അതേസമയം, നടി കസ്തൂരിയുടെ ട്വീറ്റിന് താഴെ നിരവധി പേർ വിജയിക്ക് പിന്തുണയുമായി എത്തിയിട്ടുണ്ട്.