Local Body Elections 2020 | തദ്ദേശ തെരഞ്ഞെടുപ്പിൽ കോവിഡ് രോഗികൾക്കും വോട്ട് ചെയ്യാം

തിരുവനന്തപുരം: സംസ്ഥാനത്ത് മൂന്നു ഘട്ടമായി നടക്കുന്ന തദ്ദേശ തെരഞ്ഞെടുപ്പിൽ കോവിഡ് ബാധിതർക്കും വോട്ട് ചെയ്യാം. ക്വാറന്റീനിൽ കഴിയുന്നവർക്കും വോട്ട് ചെയ്യാവുന്നതാണ്. കോവിഡ് ബാധിതർക്കും ക്വാറന്റീനിൽ കഴിയുന്നവർക്കും പോസ്റ്റൽ വോട്ട് മുഖേന വോട്ട് ചെയ്യാവുന്നതാണ്. പോളിങ്ങിന് മുന്ന് ദിവസം മുമ്പ് പോസ്റ്റൽ വോട്ടിന് അപേക്ഷിക്കണം.

അതേസമയം, പോസ്റ്റൽ വോട്ടിന് അപേക്ഷിക്കാൻ കഴിഞ്ഞില്ലെങ്കിൽ പി പി ഇ കിറ്റ് ധരിച്ച് വോട്ട് ചെയ്യാനാകുമോ എന്ന കാര്യവും പരിശോധിക്കുമെന്ന് സംസ്ഥാന തെരഞ്ഞെടുപ്പ് കമ്മീഷണർ വി. ഭാസ്ക്കരൻ അറിയിച്ചു. കോവിഡ് പ്രോട്ടോക്കോൾ പാലിച്ചായിരിക്കും തെരഞ്ഞെടുപ്പ് നടക്കുക.

പോളിങ്ങ് സ്റ്റേഷനുകളിൽ സാനിറ്റൈസർ നിർബന്ധമാക്കും. മാസ്ക്, ഗ്ലൗസ്, ശാരീരിക അകലം എന്നിവ നിർബന്ധമാണ്. അതേസമയം, തെരഞ്ഞെടുപ്പ് പ്രചാരണത്തിനിടെ സ്ഥാനാർത്ഥിക്ക് കോവിഡ് 19 പോസിറ്റീവ് ആണെന്ന് സ്ഥിരീകരിച്ചാൽ പ്രചാരണത്തിൽ നിന്നും മാറി നിൽക്കേണ്ടി വരുമെന്നും തെരഞ്ഞെടുപ്പ് കമ്മീഷണർ അറിയിച്ചു.

സംസ്ഥാനത്ത് മൂന്ന് ഘട്ടമായാണ് ഇത്തവണ തദ്ദേശ സ്വയംഭരണ സ്ഥാപനങ്ങളിലേക്ക് തെരഞ്ഞെടുപ്പ് നടക്കുന്നത്. ഡിസംബർ 8, 10, 14 തീയതികളിലായാണ് തെരഞ്ഞെടുപ്പ്. കോവിഡ് സാഹചര്യം ആയതിനാലാണ് മൂന്ന് ഘട്ടമായി തെരഞ്ഞെടുപ്പ് നടത്തുന്നത്.

തെരഞ്ഞെടുപ്പ് വിജ്ഞാപനം നവംബർ 12ന് പുറപ്പെടുവിക്കും. നാമനിർദ്ദേശപത്രിക സമർപ്പിക്കാനുള്ള അവസാന തിയതി നവംബർ 19 ആണ്. നവംബർ 20നാണ് നാമനിർദ്ദേശ പത്രികകളുടെ സൂക്ഷ്മ പരിശോധന. ഡിസംബർ 16നാണ് വോട്ടെണ്ണൽ.