കാസർഗോഡ് വന്‍ കഞ്ചാവ് വേട്ട; അപ്പാര്‍ട്ട്‌മെന്റില്‍ സൂക്ഷിച്ച 18.5 കിലോ കഞ്ചാവ് പിടികൂടി

കാസര്‍ഗോഡ്: മഞ്ചേശ്വരം വോര്‍ക്കാടിയിൽ അപ്പാര്‍ട്ട്‌മെന്റില്‍ വിൽപ്പനക്കായി എത്തിച്ച കഞ്ചാവ് ശേഖരം എക്‌സൈസ് അധികൃതര്‍ പിടികൂടി. 18.5 കിലോ കഞ്ചാവാണ് കണ്ടെത്തിയത്. സംഭവവുമായി ബന്ധപ്പെട്ട് ഒരാള്‍ അറസ്റ്റിലായി.

മൊറാത്തണ സ്വദേശി ജാബിർ(32) ആണ് അറസ്റ്റിലായത്. വോര്‍ക്കാടി മൊറാത്തണയിലെ കേരള ഹൗസ് എന്ന അപ്പാര്‍ട്‌മെന്റിന്റെ മൂന്നാം നിലയില്‍ നിന്നാണ് കഞ്ചാവ് കണ്ടെത്തിയത്.

കുമ്പള റേഞ്ച് എക്‌സൈസ് ഇന്‍സ്‌പെക്ടര്‍ എന്‍. നൗഫലിന്റെ നേതൃത്വത്തിലുള്ള സംഘമാണ് കഞ്ചാവ് ശേഖരം പിടികൂടിയത്. കാസര്‍ഗോഡ് ഡെപ്യൂട്ടി എക്‌സൈസ് കമ്മീഷണര്‍ക്ക് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് അപ്പാര്‍ട്ട്‌മെന്റില്‍ പരിശോധന നടത്തിയത്.

റെയ്ഡില്‍ രണ്ട് വലിയ ചാക്കുകളിലായി സൂക്ഷിച്ച കഞ്ചാവ് കണ്ടെത്തുകയായിരുന്നു. പിന്നീട് യുവാവിനെ വിളിച്ചു വരുത്തി അറസ്റ്റു ചെയ്തു. കുമ്പളയിലും പരിസരത്തും വില്‍പന നടത്താന്‍ കര്‍ണാടകയില്‍ നിന്നും എത്തിച്ചതായിരുന്നു കഞ്ചാവ്.

പ്രിവന്റീവ് ഓഫീസര്‍മാരായ പി. മോഹനന്‍, പി സുരേശന്‍, സിവില്‍ എക്‌സൈസ് ഓഫീസര്‍മാരായ സുധീഷ്,  കണ്ണന്‍കുഞ്ഞി, നസറുദീന്‍, ഹസ്രത് അലി, വനിത സിവില്‍ എക്‌സൈസ് ഓഫീസര്‍ മെയ്‌മോള്‍ ജോണ്‍ എന്നിവരും പരിശോധനയിൽ പങ്കെടുത്തു.