രോഗമുള്ള ആന നടന്നുപോകവേ ചെരിഞ്ഞു; രണ്ടു പാപ്പാന്മാരടക്കം നാലു പേർക്ക് പരിക്ക്

പാലക്കാട്: ചികിത്സയ്ക്കായി നടത്തിക്കൊണ്ടുപോയ ആന ചരിഞ്ഞു. പട്ടാമ്പി തിരുവേഗപ്പുറയിലാണ് സംഭവം. എരണ്ട കെട്ടിനെ തുടർന്ന് ചികിത്സയിലായിരുന്ന ആനയെ പരിശോധനയ്ക്കായി മാറ്റുന്നതിനിടെ കുഴഞ്ഞ് വീണ് ചരിയുകയായിരുന്നു.

ഈ സമയം ആനപ്പുറത്ത് ഉണ്ടായിരുന്ന പാപ്പാൻ ഉൾപ്പടെ നാലാൾക്ക് പരിക്കേറ്റു.

ആന കുഴഞ്ഞ് വീഴുന്നതിനിടെ ഓടി രക്ഷപ്പെടാൻ ശ്രമിയ്ക്കുന്നതിനിടെയാണ് അപകടമുണ്ടായത്. 

തിരുവേഗപ്പുറ സ്വദേശികളായ ശ്രീരാഗ്, സനൽ, രാജേഷ്, ശ്രീജിത്ത് എന്നിവർക്കാണ് പരിക്കേറ്റത്. ഇവരെ വളാഞ്ചേരി നടക്കാവ് ആശുപത്രിയിൽ പ്രവേശിപ്പിച്ചു. 

ആനയുടെ ആരോഗ്യസ്ഥിതി വളരെ മോശമായിരുന്നതായി ഡോ. രാജീവ് വ്യക്തമാക്കി. തിരുവേഗപ്പുറ പി.പി നമ്പൂതിരിയുടെ ഉടമസ്ഥതയിലുള്ള ആനയാണ് തിരുവേഗപ്പുറ പത്മനാഭൻ. 

എരണ്ടകെട്ട്  അസുഖത്തെ തുടര്‍ന്ന് ഏറെ കാലം  ചികിത്സയിലായിരുന്നു.  

സംഭവസ്ഥലത്ത് പോലീസ് വനം വകുപ്പ് ഉദ്യോഗസ്ഥരെത്തി, പോസ്റ്റ് മോര്‍ട്ടം നടപടികള്‍ക്ക് ശേഷം സംസ്‌കാരം നടക്കും.