സോളാർ കേസിലെ വിവാദ നായികയയായും പിന്നീട് മിനിസ്ക്രീനിൽ അവതാരകയായും എത്തി പ്രേക്ഷകരെ ഞെട്ടിച്ച സരിത എസ്. നായരുടെ പുതിയ സിനിമയാണ് വയ്യാവേലി. യൂട്യൂബിൽ റിലീസ് ചെയ്ത സിനിമ ഇതിനോടകം നാലരലക്ഷത്തോളം പേർ കണ്ടുകഴിഞ്ഞിരുന്നു. കഴിഞ്ഞ മാസം 11ന് റിലീസ് ചെയ്ത സിനിമ ഇതുവരെ കണ്ടത് കൃത്യമായി പറഞ്ഞാൽ 4,40,076 പേരാണ്. ഒരു മണിക്കൂറും 58 മിനിറ്റുമുള്ള സിനിമയിൽ പൊലീസ് വേഷത്തിലാണ് സരിത എത്തുന്നത്. അന്ത്യകൂദാശ എന്ന ചിത്രത്തിലാണ് ഇതിന് മുൻപ് സരിത അഭിനയിച്ചത്.
advertisement
Also Read- Rana Miheeka Wedding| 'സിംപിൾ ആൻഡ് ഹമ്പിൾ' ലുക്കിൽ താരമായി സാമന്ത
സിനിമ എത്തിയത് ട്രോളന്മാർക്കും ചാകരയായിട്ടുണ്ട്. സന്തോഷ് പണ്ഡിറ്റ് സിനിമകളോടാണ് ട്രോളന്മാര്‍ സരിതയുടെ സിനിമയെയും താരതമ്യം ചെയ്യുന്നത്. ചിത്രത്തിലെ സരിത ഉൾപ്പെടെയുള്ളവരുടെ അഭിനയത്തെ ട്രോളാനാണ് സോഷ്യൽമീഡിയയിലെ ട്രോൾ വിരുതന്മാര്‍ക്ക് താൽപര്യം. എന്നാൽ, സിനിമ ഇതിനോടകം വൈറലായി കഴിഞ്ഞു. സിനിമയിൽ സരിത അഭിനയിച്ച പലഭാഗങ്ങളുടെയും ക്ലിപ്പുകളും മറ്റും സോഷ്യൽ മീഡിയയിൽ പ്രചരിക്കുന്നുണ്ട്.
നാല് വർഷങ്ങൾക്ക് മുൻപാണ് സരിത പൊലീസ് വേഷത്തിൽ എത്തുന്ന ചിത്രത്തെ സംബന്ധിച്ച വാർത്തകൾ സോഷ്യൽ മീഡിയയിലും മറ്റുമായി നിറയുന്നത്. ലോക്ക്ഡൗണിനിടെ കഴിഞ്ഞ മാസം 11ന് ചിത്രം യൂട്യൂബിൽ പ്രത്യക്ഷപ്പെടുകയായിരുന്നു. ചിത്രം ഇറങ്ങി അധികം താമസിയാതെ വിഡിയോ ട്രോളുകളും പുറത്തിറങ്ങുകയായിരുന്നു. ശിവജി ഗുരുവായൂർ, കൊച്ചുപ്രേമൻ, വിനോദ് കോവൂർ എന്നിവരും ചിത്രത്തിൽ വേഷമിടുന്നുണ്ട്.
വി.വി. സന്തോഷ് ആണ് സിനിമയുടെ സംവിധാനം. തിരക്കഥ എഴുതിയത് അശോക് നായര്‍. ഇദ്ദേഹം തന്നെയാണ് സിനിമയുടെ നിര്‍മാതാവും.