ശിവകാർത്തികേയൻ ചിത്രം 'പരാശക്തി' നിരോധിക്കണമെന്ന് തമിഴ്‌നാട് യൂത്ത് കോൺഗ്രസ് ആവശ്യപ്പെടാൻ കാരണമെന്ത്?

ചിത്രത്തിലെ ചില പ്രധാന രംഗങ്ങൾക്കെതിരെ യൂത്ത് കോൺഗ്രസ്

ചരിത്രപരമായ പിശകുകൾ: 1965-ൽ പോസ്റ്റ് ഓഫീസ് ഫോമുകൾ എല്ലാ സംസ്ഥാനങ്ങളിലും ഹിന്ദിയിൽ മാത്രമേ പൂരിപ്പിക്കാവൂ എന്ന് കോൺഗ്രസ് സർക്കാർ ഉത്തരവിട്ടിട്ടില്ലെന്ന് യൂത്ത് കോൺഗ്രസ് ചൂണ്ടിക്കാട്ടി. ഇത് പാർട്ടിയെ അപകീർത്തിപ്പെടുത്താൻ മനഃപൂർവം കെട്ടിച്ചമച്ചതാണെന്ന് അവർ ആരോപിക്കുന്നു.

ഇന്ദിരാഗാന്ധി: 1965 ഫെബ്രുവരി 12-ന് ഇന്ദിരാഗാന്ധി കോയമ്പത്തൂർ സന്ദർശിച്ചിട്ടില്ലെന്നും എന്നാൽ സന്ദർശിച്ചതായി സിനിമയിൽ തെറ്റായി കാണിക്കുന്നുണ്ടെന്നും ഇവർ പറയുന്നു. കത്തുന്ന ട്രെയിനിന് മുന്നിൽ നിൽക്കുന്നതായും ഹിന്ദി അടിച്ചേൽപ്പിക്കലിനെതിരെയുള്ള ഒപ്പുകൾ അവർ സ്വീകരിക്കുന്നതായും കാണിക്കുന്നത് ചരിത്ര വിരുദ്ധമാണെന്നാണ് ആക്ഷേപം.

advertisement

ദേശീയ നേതാക്കളെ അപമാനിക്കൽ: അന്തരിച്ച ദേശീയ നേതാക്കളെ തെറ്റായ സംഭവങ്ങളിലൂടെ ചിത്രീകരിക്കുന്നത് നിയമവിരുദ്ധമാണെന്ന് യൂത്ത് കോൺഗ്രസ് പ്രസ്താവനയിൽ പറഞ്ഞു. കോൺഗ്രസ് പതാക കത്തിക്കുന്ന രംഗങ്ങളും സിനിമയിൽ കുത്തിനിറച്ചിട്ടുണ്ടെന്ന് അവർ ആരോപിച്ചു.

ചിത്രത്തിലെ ചരിത്ര വിരുദ്ധമായ രംഗങ്ങൾ ഉടൻ നീക്കം ചെയ്യണമെന്നും നിർമാതാക്കൾ പരസ്യമായി മാപ്പ് പറയണമെന്നും യൂത്ത് കോൺഗ്രസ് ആവശ്യപ്പെട്ടു. അല്ലാത്തപക്ഷം ശക്തമായ നിയമനടപടികളുമായി മുന്നോട്ട് പോകുമെന്നും അവർ മുന്നറിയിപ്പ് നൽകി.

സുധാ കൊങ്കര സംവിധാനം ചെയ്ത ചിത്രമാണ് പരാശക്തി. ശിവകാർത്തികേയൻ, രവി മോഹൻ (ജയം രവി), അഥർവ, ശ്രീലീല എന്നിവരാണ് താരങ്ങൾ. മലയാള താരം ബേസിൽ ജോസഫും ചിത്രത്തിൽ കാമിയോ റോളിൽ എത്തുന്നു.

പ്രമേയം: 1960-കളിലെ മദ്രാസിൽ നടന്ന ഹിന്ദി വിരുദ്ധ പ്രക്ഷോഭങ്ങളുടെയും സാമൂഹിക സാഹചര്യങ്ങളുടെയും പശ്ചാത്തലത്തിലുള്ള പൊളിറ്റിക്കൽ ആക്ഷൻ ഡ്രാമയാണിത്.