Fire Accident| തെലങ്കാനയിലെ തടി ഗോഡൗണിൽ വൻ തീപിടിത്തം; 11 തൊഴിലാളികൾ മരിച്ചു

11 പേരുടെ മൃതദേഹങ്ങളും ഒന്നാം നിലയിൽ നിന്നാണ് കണ്ടെത്തിയതെന്ന് പൊലീസ്, അഗ്നിശമന സേനാംഗങ്ങൾ പറഞ്ഞു. തിരിച്ചറിയാനാകാത്ത വിധം ശരീരം കത്തിക്കരിഞ്ഞ നിലയിലാണ്. പുലർച്ചെയാണ് തീപിടിത്തമുണ്ടായെന്ന വിവരം അഗ്നിശമന സേനയ്ക്ക് ലഭിക്കുന്നത്. നാലു മണിക്കൂർ നേരത്തെ പരിശ്രമത്തിനൊടുവിലാണ് തീ നിയന്ത്രണവിധേയമാക്കാൻ സാധിച്ചത്. ''ഷോർട്ട് സർക്യൂട്ടാകാം അപകട കാരണം. സംഭവത്തിൽ അന്വേഷണം നടന്നുവരികയാണ്''- ഗാന്ധിനഗർ എസ് എച്ച് ഒ മോഹൻ റാവു പറഞ്ഞു.

സെക്കന്തരാബാദിലെ ഭോയിഗുഡ തടി ഡിപ്പോയിലുണ്ടായ തീപിടിത്തത്തിൽ ബിഹാറിൽ നിന്നുള്ള തൊഴിലാളികൾ മരിച്ച സംഭവത്തിൽ തെലങ്കാന മുഖ്യമന്ത്രി കെ ചന്ദ്രശേഖർറാവു ദുഃഖം രേഖപ്പെടുത്തി. മരിച്ചവരുടെ ബന്ധുക്കൾക്ക് അഞ്ചു ലക്ഷം രൂപാ വീതം ധനസഹായവും മുഖ്യമന്ത്രി പ്രഖ്യാപിച്ചു. മരിച്ചവരുടെ മൃതദേഹങ്ങൾ നാട്ടിലെത്തിക്കുന്നതിനുള്ള ഒരുക്കങ്ങൾ വേഗത്തിലാക്കാൻ ചീഫ് സെക്രട്ടറിയോട് മുഖ്യമന്ത്രി നിർദേശിച്ചു.

advertisement

രാവിലെ നാലു മണിയോടെയാണ് തീപിടിത്തമുണ്ടായത്. ഉടൻ തന്നെ അഗ്നിശമന സേനാ യൂണിറ്റുകൾ സ്ഥലത്തെത്തി തീയണക്കാനുള്ള ശ്രമമാരംഭിച്ചു. 11 പേർ മരിച്ചു. ഒരാൾ രക്ഷപ്പെട്ടു. അന്വേഷണത്തിന് ശേഷമേ അപകട കാരണം വ്യക്തമാകൂ- ഹൈദരാബാദ് ജില്ലാ കളക്ടർ എൽ ശർമൻ പറഞ്ഞു.

Also Read- Accident| മലപ്പുറം കൊണ്ടോട്ടിയിൽ ബസും ലോറിയും കൂട്ടിയിടിച്ച് ഒരു മരണം; നിരവധി പേർക്ക് പരിക്ക്

കൊല്ലപ്പെട്ട 11 പേരും ഒന്നാം നിലയിൽ ഉറങ്ങുകയായിരുന്നു. അകത്തുകൂടിയുള്ള സ്പൈറൽ സ്റ്റെയർ കേസ് മാത്രമേ ഉണ്ടായിരുന്നുള്ളൂവെന്നതിനാൽ ഇവർക്ക് എളുപ്പത്തിൽ പുറത്തേക്ക് കടക്കാൻ കഴിഞ്ഞില്ല.