കഴിഞ്ഞ അഞ്ച് വർഷത്തിനിടയിൽ രാഹുൽ 16 തവണ വിദേശയാത്ര നടത്തി. കഴിഞ്ഞ തവണ അമേഠിയെ പ്രതിനിധീകിച്ച രാഹുൽ സ്വന്തം മണ്ഡലത്തിലേക്ക് നടത്തിയതിനേക്കാൾ കൂടുതൽ യാത്രകളാണ് വിദേശത്തേക്കുള്ളതെന്നാണ് ആരോപണം. മുഖ്യ ശത്രുവായ ബിജെപി തന്നെയാണ് ആരോപണം ഉന്നയിക്കുന്നത്.
രാഹുൽ വിദേശത്ത് എന്തെങ്കിലും രഹസ്യപ്രവർത്തനത്തിൽ ഏർപ്പെട്ടിട്ടുണ്ടോയെന്ന് ബിജെപി വക്താവ് ജിവിഎൽ നരസിംഹറാവു ചോദിക്കുന്നു.
രാഹുലിന്റെ 16 യാത്രകളിൽ ഒൻപതെണ്ണം എവിടേക്കാണെന്ന് ആർക്കും അറിയില്ല. പാർലമെന്‍റ് അംഗങ്ങൾ സ്വകാര്യ ആവശ്യങ്ങൾക്ക് വിദേശയാത്ര നടത്തിയാലും വിവരങ്ങൾ സഭയെ മുൻകൂട്ടി അറിയിക്കണമെന്നാണ് ചട്ടം. ഇത് രാഹുൽ പാലിക്കുന്നില്ലെന്നും റാവു ആരോപിച്ചു.
advertisement
രാഹുലിൻറെ യാത്രയുടെ ഭാരിച്ച ചിലവുകൾ വഹിക്കുന്നത് ആരെന്നും ബിജെപി ചോദിക്കുന്നു. മഹാരാഷ്ട്ര, ഹരിയാന നിയമസഭാ തെരഞ്ഞെടുപ്പ് പ്രചാരണം കൊടുമ്പിരികൊള്ളുമ്പോഴും രാഹുൽ വിദേശത്തേക്ക് പറന്നിരുന്നു. ഇതിനെതിരെ തെരഞ്ഞെടുപ്പ് ഫലം വന്നതിനുശേഷം കോൺഗ്രസിനുള്ളിൽ തന്നെ വിമർശനം ഉയർന്നു. ഇരു സംസ്ഥാനങ്ങളിലും പ്രതീക്ഷിക്കാത്ത മെച്ചപ്പെട്ട പ്രകടനം കോൺഗ്രസ് കാഴചവെച്ചിരുന്നു. നേതൃത്വം ശ്രദ്ധിച്ചിരുന്നുവെങ്കിൽ കൂടുതൽ മെച്ചപ്പെട്ട പ്രകടനം കാഴചവയ്ക്കാമായിരുന്നുവെന്നാണ് വിമർശകർ ചൂണ്ടിക്കാട്ടുന്നത്.