തമിഴ്നാട് പിൻവലിച്ച രൂപയുടെ ചിഹ്നം ഡിസൈൻ ചെയ്തത് ഡിഎംകെ എംഎൽഎയുടെ മകൻ

"സർക്കാരാണ് തീരുമാനമെടുത്തത്. ഞാൻ ഇപ്പോഴാണ് വാർത്ത കേട്ടത്. പലപ്പോഴും, നിങ്ങളുടെ എല്ലാ ഡിസൈനുകളും വിജയിച്ചെന്നുവരില്ല, അത് മാറിയേക്കാം. സർക്കാരിന്റെ തീരുമാനമായതിനാൽ അതിനോട് എങ്ങനെ പ്രതികരിക്കണമെന്ന് എനിക്കറിയില്ല. കേന്ദ്രസർക്കാർ, ചിഹ്നം അതേപടി നിലനിർത്താൻ ശ്രമിക്കുകയാണ്... എനിക്ക് ഇതിനെക്കുറിച്ച് അഭിപ്രായം പറയാൻ കഴിയില്ല; ഇതിനെക്കുറിച്ച് എന്ത് പറയണമെന്ന് എനിക്കറിയില്ല." - സിഎൻഎൻ-ന്യൂസ് 18നോട് സംസാരിക്കവെ ഉദയ കുമാർ പ്രതികരിച്ചു.

രൂപ ചിഹ്നം (₹)

ഐക്കണിക് രൂപ ചിഹ്നത്തിന് (₹) 2010 മുതൽ ഒരു ചരിത്രമുണ്ട്. അന്ന് ഐഐടി ബോംബെയിൽ ബിരുദാനന്തര ബിരുദ വിദ്യാർത്ഥിയായിരുന്ന ഉദയ കുമാർ ഐഐടി ഗുവാഹത്തിയിലെ ഡിസൈൻ വിഭാഗത്തിൽ ചേരാനുള്ള ഒരുക്കത്തിലായിരുന്നു, ഇന്ത്യയുടെ ഔദ്യോഗിക കറൻസി ചിഹ്നം സൃഷ്ടിക്കുന്നതിനുള്ള ഒരു ദേശീയ മത്സരത്തിൽ അദ്ദേഹം വിജയിച്ചു, മറ്റ് നൂറുകണക്കിന് എൻട്രികളെ പിന്തള്ളി.

advertisement

2010 ജൂലൈ 15 ന്, മൻമോഹൻ സിംഗ് നയിച്ച യുപിഎ സർക്കാർ ഔദ്യോഗികമായി ചിഹ്നം അവതരിപ്പിച്ചു, ഇത് ഇന്ത്യയുടെ സാമ്പത്തിക ചരിത്രത്തിലെ ഒരു സുപ്രധാന നിമിഷമായി അടയാളപ്പെടുത്തി.

ആരാണ് ഉദയ കുമാർ?

തമിഴ്നാട്ടിലെ തിരുവണ്ണാമലയ്ക്കടുത്തുള്ള മാരൂരിൽ ജനിച്ച ഉദയ, മുൻ ഡിഎംകെ എംഎൽഎയായ എൻ ധർമ്മലിംഗത്തിന്റെ മകനാണ്. ചരിത്രത്തിൽ ഇടംനേടിയ ചിഹ്നം താൻ എങ്ങനെ കണ്ടുപിടിച്ചുവെന്ന് ഉദയ വിശദീകരിച്ചു. ₹ ചിഹ്നം രൂപകൽപ്പന ചെയ്യാൻ ദേവനാഗരി, റോമൻ ലിപികളിൽ നിന്നുള്ള ഘടകങ്ങൾ എടുത്തതായി അദ്ദേഹം വെളിപ്പെടുത്തി.

അന്തിമ രൂപകൽപ്പനയിൽ രൂപയിൽ നിന്ന് ദേവനാഗരി 'ര' യും രൂപയിൽ നിന്ന് റോമൻ 'ആർ' യും സുഗമമായി സംയോജിപ്പിച്ച് ഇന്ത്യയുടെ പൈതൃകവും സാർവത്രിക സ്വത്വവും ഉൾക്കൊള്ളുന്ന ഒരു ചിഹ്നം സൃഷ്ടിക്കുകയായിരുന്നുവെന്നും അദ്ദേഹം വിശദീകരിച്ചു.

‌ഐഐടി-ഹൈദരാബാദ്, നാഷണൽ ടെസ്റ്റിംഗ് ഏജൻസി (എൻ‌ടി‌എ) എന്നിവയുൾപ്പെടെ വിവിധ സ്ഥാപനങ്ങൾക്കായി ഉദയ ഇതുവരെ ലോഗോകൾ രൂപകൽപ്പന ചെയ്തിട്ടുണ്ട്. ഇപ്പോൾ അദ്ദേഹം ഐഐടി ഗുവാഹത്തിയിലെ ഡിസൈൻ വിഭാഗത്തിന്റെ തലവനാണ്.

Also Read- തമിഴ്നാട് ബജറ്റിന്റെ ലോഗോയിൽനിന്ന് രൂപയുടെ ചിഹ്നം ഒഴിവാക്കി

അതേസമയം, സംഭവത്തിൽ തമിഴ്‌നാട് സർക്കാരിനെതിരെ ബിജെപി രൂക്ഷ വിമർശനം ഉന്നയിച്ചു. ഇത് ഒരു 'മണ്ടത്തരമായ' നടപടിയാണെന്ന് ബിജെപി തമിഴ്നാട് അധ്യക്ഷൻ കെ അണ്ണാമലൈ പ്രതികരിച്ചു. "2025-26 ലെ ഡിഎംകെ സർക്കാരിന്റെ സംസ്ഥാന ബജറ്റ് ഒരു തമിഴൻ രൂപകൽപ്പന ചെയ്ത രൂപ ചിഹ്നത്തെ മാറ്റിക്കൊണ്ടുള്ളതാണ്. ഭാരതം മുഴുവൻ സ്വീകരിക്കുകയും നമ്മുടെ കറൻസിയിൽ ഉൾപ്പെടുത്തുകയും ചെയ്ത ചിഹ്നത്തെയാണ് ഇത്തരത്തിൽ ഒഴിവാക്കിയത്. നിങ്ങൾക്ക് എത്രത്തോളം മണ്ടനാകാൻ കഴിയും,. സ്റ്റാലിൻ?" അണ്ണാമലൈ എക്‌സിൽ കുറിച്ചു.