'കേരളം വികസിച്ചു, ബംഗാളിന് എന്തുപറ്റി?' രാഹുൽ ഗാന്ധിയോട് അതിഥി തൊഴിലാളി; മൈക്ക് തട്ടിപ്പറിച്ച് കോൺഗ്രസ് പ്രവർത്തകർ

സദസ്സിലുള്ളവർക്ക് രാഹുൽ ഗാന്ധിയുമായി സംസാരിക്കാൻ താല്പര്യമുണ്ടോ എന്ന് കെ.സി. വേണുഗോപാൽ ചോദിച്ചപ്പോഴാണ് ബംഗാൾ സ്വദേശിയായ യുവാവ് എഴുന്നേറ്റത്. 'ഹലോ രാഹുൽ സാർ' എന്ന് വിളിച്ച യുവാവിന്റെ അടുത്തേക്ക് രാഹുൽ ഗാന്ധി വേദിയുടെ മുൻഭാഗത്തേക്ക് വന്നു. "കേരളം ഇത്രയധികം വികസിച്ചിട്ടും തന്റെ നാടായ ബംഗാൾ എന്തുകൊണ്ട് പിന്നാക്കം പോയി" എന്നായിരുന്നു യുവാവ് ഹിന്ദിയിൽ ചോദിച്ചത്.

യുവാവ് ചോദ്യം തുടരുന്നതിനിടെ തൊഴിലുറപ്പുമായി ബന്ധപ്പെട്ട ചോദ്യങ്ങൾ മതി എന്ന് വേദിയിലുണ്ടായിരുന്ന ഷാഫി പറമ്പിൽ എം.പി പറയുന്നത് വീഡിയോയിൽ കേൾക്കാം. ഇതിന് പിന്നാലെ സ്ഥലത്തുണ്ടായിരുന്ന മറ്റ് കോൺഗ്രസ് നേതാക്കൾ യുവാവിന്റെ കൈയിലുണ്ടായിരുന്ന മൈക്ക് തട്ടിപ്പറിക്കുകയായിരുന്നു. തനിക്ക് ഹിന്ദി അറിയാമെന്നും രാഹുൽ പറയുന്നത് മനസ്സിലാകുമെന്നും യുവാവ് വിളിച്ചുപറഞ്ഞെങ്കിലും നേതാക്കൾ അത് ചെവിക്കൊണ്ടില്ല.