ആറ്റുകാൽ ഒരുങ്ങി; ഭക്തിസാന്ദ്രമായ പൊങ്കാല ഉത്സവത്തിന് തുടക്കം; കലാപരിപാടികളുടെ ഉദ്ഘാടനം മോഹൻലാൽ

ചടങ്ങിൽ വെച്ച് ഈ വർഷത്തെ അംബ പുരസ്കാരം മോഹൻലാലിന് സമർപ്പിക്കും. വൈകിട്ട് 5:30-ന് ക്ഷേത്രം തന്ത്രിയുടെ കാർമ്മികത്വത്തിൽ ദേവിയെ കാപ്പുകെട്ടി കുടിയിരുത്തുന്നതോടെയാണ് ഉത്സവ ചടങ്ങുകൾക്ക് ഔദ്യോഗികമായി തുടക്കമാകുന്നത്.

വരും ദിവസങ്ങളിൽ തോറ്റംപാട്ട്, വിവിധ കലാപരിപാടികൾ എന്നിവ ക്ഷേത്ര പരിസരത്ത് നടക്കും. ഫെബ്രുവരി 25-ന് രാവിലെ 8:45-ന് കുത്തിയോട്ട വ്രതം ആരംഭിക്കുന്നതോടെ ആയിരക്കണക്കിന് ബാലന്മാർ വ്രതശുദ്ധിയിലേക്ക് കടക്കും. ഉത്സവത്തിൻ്റെ പ്രധാന ചടങ്ങായ ആറ്റുകാൽ പൊങ്കാല മാർച്ച് 3, ചൊവ്വാഴ്ചയാണ് നടക്കുന്നത്.

ഈ വർഷം പൊങ്കാല ദിനത്തിൽ വൈകിട്ട് ചന്ദ്രഗ്രഹണം ഉള്ളതിനാൽ ചടങ്ങുകളുടെ സമയത്തിൽ പ്രത്യേക ക്രമീകരണം വരുത്തിയിട്ടുണ്ട്. മാർച്ച് 3-ന് രാവിലെ 9:45-ന് അടുപ്പുവെട്ടും ഉച്ചയ്ക്ക് 2:15-ന് പൊങ്കാല നിവേദ്യവും നടക്കും. ഗ്രഹണം പ്രമാണിച്ച് വൈകിട്ട് 3:10 മുതൽ രാത്രി 7 മണി വരെ ക്ഷേത്രനട അടച്ചിടുന്നതിനാൽ താലപ്പൊലി നേർച്ചയുള്ളവർ ഉച്ചയ്ക്ക് 1:30-ന് മുൻപായി ക്ഷേത്രത്തിൽ എത്തിച്ചേരണമെന്ന് അധികൃതർ അറിയിച്ചിട്ടുണ്ട്.

advertisement

മാർച്ച് 4-ന് പുലർച്ചെ 1:15-ന് മണക്കാട് ശാസ്താ ക്ഷേത്രത്തിലേക്കുള്ള എഴുന്നള്ളത്ത് നടക്കും. തുടർന്ന് മാർച്ച് 5-ന് രാത്രി 9:15-ന് കുരുതി തർപ്പണത്തോടെ ഉത്സവം സമാപിക്കും. ഭക്തജനത്തിരക്ക് പ്രമാണിച്ച് കെ.എസ്.ആർ.ടി.സി. പ്രത്യേക സർവീസുകളും ആരോഗ്യവകുപ്പും പോലീസും വിപുലമായ സുരക്ഷാ സജ്ജീകരണങ്ങളും നഗരത്തിൽ ഒരുക്കിയിട്ടുണ്ട്.