വിദേശത്തുള്ള മലയാളി കുട്ടികൾക്ക് സ്വന്തം നാടിനെ അറിയാനും നാട്ടിലെ കുട്ടികൾക്ക് ആഗോള കാഴ്ചപ്പാടുകൾ നേടാനും ലക്ഷ്യമിട്ട് 'Roots & Wings' എന്ന പേരിൽ ഒരു സാംസ്കാരിക കൈമാറ്റ ക്യാമ്പ് സംഘടിപ്പിക്കുന്നു. വേൾഡ് മലയാളി അസോസിയേഷൻ, നോർക്ക (NORKA), L2 കാട്ടാൽ എഡ്യൂകെയർ എന്നിവയുടെ സംയുക്ത ആഭിമുഖ്യത്തിലാണ് ഈ പദ്ധതിക്ക് രൂപം നൽകിയിരിക്കുന്നത്. 8 മുതൽ 14 വയസ്സുവരെയുള്ള കുട്ടികളെയാണ് ഈ പഞ്ചദിന ക്യാമ്പ് ലക്ഷ്യമിടുന്നത്. ലോകത്തിൻ്റെ വിവിധ ഭാഗങ്ങളിൽ ജീവിക്കുന്ന നമ്മുടെ കുട്ടികൾക്ക് കേരളത്തിൻ്റെ തനിമയും പാരമ്പര്യവും നേരിട്ടറിയാനും സാംസ്കാരികമായി കൂടുതൽ അടുക്കാനും ഇത് വഴിയൊരുക്കും.
advertisement
അതോടൊപ്പം, നാട്ടിലെ കുട്ടികൾക്ക് വിദേശത്തുനിന്നുള്ള സമപ്രായക്കാരുമായി ഇടപഴകുന്നതിലൂടെ ആഗോള സൗഹൃദങ്ങൾ സ്ഥാപിക്കാനും ആംഗലേയ ഭാഷാശേഷി വർദ്ധിപ്പിക്കാനും അവസരം ലഭിക്കും.
ക്യാമ്പിൻ്റെ പ്രധാന ലക്ഷ്യങ്ങൾ:
* സാംസ്കാരിക ഏകീകരണം: വിദേശത്തും സ്വദേശത്തുമുള്ള കുട്ടികൾക്ക് ഒരുമിച്ച് ചേരാനും പരസ്പരം പരിചയപ്പെടാനും സൗഹൃദങ്ങൾ സ്ഥാപിക്കാനുമുള്ള ഒരു വേദിയൊരുക്കുക. ഇത് സാംസ്കാരിക കൈമാറ്റത്തിന് പുതിയ ദിശാബോധം നൽകും.
* ഭാവിക്ക് മുതൽക്കൂട്ട്: ഈ സൗഹൃദങ്ങൾ നാട്ടിലെ കുട്ടികൾക്ക് ഭാവിയിൽ വിദ്യാഭ്യാസപരമായും തൊഴിൽപരമായും പുതിയ അവസരങ്ങൾ സൃഷ്ടിച്ചേക്കാം. ആഗോള ബന്ധങ്ങൾ കെട്ടിപ്പടുക്കുന്നതിനുള്ള ആദ്യ ചുവടുവെപ്പാണിത്.
* അറിവും ആസ്വാദനവും: പഠനം, വിനോദം, ഫീൽഡ് ട്രിപ്പുകൾ എന്നിവയെല്ലാം ഉൾപ്പെടുത്തി അഞ്ചുദിവസം നീണ്ടുനിൽക്കുന്ന ഒരു കുട്ടികളുടെ ആഘോഷമായിരിക്കും ഈ ക്യാമ്പ്. അറിവ് നേടുന്നതിനൊപ്പം പുതിയ അനുഭവങ്ങളിലൂടെ മാനസിക ഉല്ലാസം കണ്ടെത്താനും ഇത് സഹായിക്കും.
കാട്ടാക്കട എംഎൽഎ ഐ.ബി. സതീഷ് ആണ് ഇത്തരമൊരു ക്യാമ്പ് എന്ന ആശയത്തിന് പ്രാവർത്തികമാക്കാൻ വേണ്ട അവസരം നൽകുന്നത്.