തിരുവനന്തപുരം മേയറും സംഘവും ഡൽഹിയിൽ; ആവേശോജ്ജ്വല സ്വീകരണം നൽകി BJP പ്രവർത്തകർ

സന്ദർശനത്തിന്റെ ഭാഗമായി ഇന്ന് പാർട്ടി ദേശീയ അധ്യക്ഷൻ നിതിൻ നബീനുമായി സംഘം കൂടിക്കാഴ്ച നടത്തും. നാളെ രാഷ്ട്രപതി ദ്രൗപദി മുർമു, പ്രധാനമന്ത്രി നരേന്ദ്ര മോദി എന്നിവരുമായി ജനപ്രതിനിധികൾ സംവദിക്കും. പുതിയ പാർലമെന്റ് മന്ദിരം സന്ദർശിക്കുന്ന സംഘത്തിന് നാളെ രാത്രി കേന്ദ്രമന്ത്രി ജോർജ് കുര്യന്റെ വസതിയിൽ അത്താഴ വിരുന്നും ഒരുക്കിയിട്ടുണ്ട്. പ്രധാനമന്ത്രിയെ നേരിൽ കാണാൻ കഴിയുന്നതിന്റെ ആവേശത്തിലാണെന്നും തിരുവനന്തപുരത്തിന്റെ വികസന ആവശ്യങ്ങൾ അദ്ദേഹത്തിന്റെ ശ്രദ്ധയിൽപ്പെടുത്തുമെന്നും മേയർ വി.വി. രാജേഷ് അറിയിച്ചു.

കേന്ദ്രമന്ത്രിമാരായ അമിത് ഷാ, മനോഹർ ലാൽ ഖട്ടാർ എന്നിവരുമായും സംഘടനാ സെക്രട്ടറി ബി.എൽ. സന്തോഷുമായും സംഘം ചർച്ചകൾ നടത്തും. തിരുവനന്തപുരത്തെ ബിജെപിയുടെ വിജയം ദേശീയതലത്തിൽ വലിയ സ്വാധീനമുണ്ടാക്കിയെന്ന് ലഭിച്ച സ്വീകരണങ്ങളിൽ നിന്ന് വ്യക്തമാണെന്ന് മേയർ പറഞ്ഞു. അതേസമയം, ഈ യാത്രയ്ക്കായി കോർപറേഷന്റെ ഫണ്ട് ഉപയോഗിച്ചിട്ടില്ലെന്നും മുഴുവൻ ചെലവും പാർട്ടിയാണ് വഹിക്കുന്നതെന്നും അദ്ദേഹം കൂട്ടിച്ചേർത്തു.

advertisement