സൗത്ത് ചൈന മോർണിംഗ് പോസ്റ്റിലെ (SCMP) ഒരു റിപ്പോർട്ട് അനുസരിച്ച്, വെനും ഭാര്യ യാങ് സിയാവോഹോങ്ങും സ്‌കൂൾ കാലം മുതൽ പരിചയക്കാരാണ്. ഇരുവരും സഹപാഠികളായിരുന്നു. വിവാഹശേഷം, അവർ സിചുവാൻ പ്രവിശ്യയിലെ സ്വന്തം നാട്ടിൽ നിന്ന് ഗ്വാങ്‌ഡോങ്ങിലേക്ക് താമസം മാറി. മൂന്ന് വർഷം മുമ്പ് അവർക്ക് ആദ്യത്തെ മകൾ ജനിച്ചു. ഒരു വർഷത്തിനുശേഷം രണ്ടാമത്തെ മകളും.
കുറച്ചു കാലത്തേക്ക് ജീവിതം ലളിതവും സന്തോഷകരവുമായിരുന്നു. പക്ഷേ കഴിഞ്ഞ വർഷം എല്ലാം മാറി. ജൂണിൽ, ഇളയ മകൾ സിയാങ്ങിന് മൃദുവായ ടിഷ്യൂകളെ ബാധിക്കുന്ന അപൂർവ തരം കാൻസറായ റാബ്ഡോമിയോസാർകോമ ഉണ്ടെന്ന് കണ്ടെത്തി. വെറും ആറ് മാസത്തിന് ശേഷം, ഡിസംബറിൽ, യാങ്ങിന് സ്തനാർബുദം കണ്ടെത്തി. കുടുംബം വളരെ വേഗം രണ്ട് ഗുരുതരമായ ആരോഗ്യ പോരാട്ടങ്ങളുടെ നടുവിൽ അകപ്പെട്ടു.
advertisement
സാമ്പത്തിക സ്ഥിതിയെക്കുറിച്ച് ആശങ്കാകുലയായ യാങ്, പണം ലാഭിക്കുന്നതിനായി ചികിത്സ നിർത്താൻ ആലോചിച്ചു. എന്നാൽ വെൻ തന്റെ തീരുമാനത്തിൽ ഉറച്ചുനിന്നു. ഭാര്യയ്ക്കും മകൾക്കും സാധ്യമായ ഏറ്റവും മികച്ച പരിചരണം ലഭിക്കണമെന്ന് അദ്ദേഹം ആഗ്രഹിച്ചു. "അല്ലെങ്കിൽ, എന്റെ ഭാര്യയും പെൺമക്കളും നിസ്സഹായരാകും," അദ്ദേഹം പറഞ്ഞു.
മുഴുവൻ സമയവും അവരെ പരിപാലിക്കുന്നതിനായി വെൻ ഒരു നിർമ്മാണ സ്ഥലത്തെ ജോലി ഉപേക്ഷിച്ചു. അവർ ഗ്വാങ്‌ഡോങ്ങിൽ നിന്ന് ചോങ്‌ക്വിംഗിലേക്ക് മാറി, അവിടെ ചികിത്സാ സൗകര്യങ്ങൾ മികച്ചതായിരുന്നു. അവരുടെ മൂത്ത മകളെ മുത്തശ്ശിക്കൊപ്പം താമസിക്കാൻ സിചുവാനിലേക്ക് തിരിച്ചയച്ചു. ചോങ്‌ക്വിംഗിൽ, അവർ ഒരു ചെറിയ അപ്പാർട്ട്മെന്റ് വാടകയ്‌ക്കെടുത്തു. അവരുടെ മുഴുവൻ സമയ പരിചാരകനായി വെൻ മാറി.
യാങ്ങിനും സിയാങ്ങിനും കീമോതെറാപ്പിയും ചില സന്ദർഭങ്ങളിൽ റേഡിയോതെറാപ്പിയും ആവശ്യമായി വന്നു. ഓരോ കീമോതെറാപ്പി സെഷനും ആയിരക്കണക്കിന് യുവാൻ ചിലവാകും. റേഡിയോതെറാപ്പി ആവശ്യമായി വരുമ്പോൾ 10,000 യുവാനിൽ കൂടുതൽ (ഏകദേശം 1.19 ലക്ഷം രൂപ) ചിലവാകും. മാസങ്ങൾക്കുള്ളിൽ, കുടുംബത്തിന്റെ സമ്പാദ്യം തീർന്നു. അവർ പണം കടം വാങ്ങി, താമസിയാതെ കടം 200,000 യുവാൻ (ഏകദേശം 24 ലക്ഷം രൂപ) കവിഞ്ഞു. വെൻ ഒരു ഡെലിവറി റൈഡറായി ജോലി ചെയ്യാൻ ശ്രമിച്ചു. പക്ഷേ ഭാര്യയെയും കുട്ടിയെയും പരിപാലിക്കുന്നതിനിടയിൽ ജോലി കൈകാര്യം ചെയ്യാൻ അദ്ദേഹം പാടുപെട്ടു.
ഈ വർഷം ഏപ്രിലിൽ, പണം സ്വരൂപിക്കുന്നതിനായി വെൻ ഓൺലൈനിൽ നൃത്തം ചെയ്യാൻ തുടങ്ങി. പകൽ സമയത്ത്, അദ്ദേഹം തന്റെ കുടുംബത്തെ പരിപാലിക്കുന്നു. രാത്രിയിൽ അവർ ഉറങ്ങിക്കഴിഞ്ഞാൽ, അദ്ദേഹം തന്റെ ക്യാമറ സ്ഥാപിക്കുകയും, ഇന്റർനെറ്റിൽ അപരിചിതർക്കായി തത്സമയം നൃത്തം ചെയ്യുകയും ചെയ്യുന്നു. ഈ തീരുമാനത്തിൽ ആദ്യം ഉറപ്പില്ലായിരുന്നു എന്നദ്ദേഹം പറയുന്നു.
എന്നാൽ, രണ്ട് മാസത്തെ നൃത്തത്തിന് ശേഷം, തനിക്ക് കൂടുതൽ ആത്മവിശ്വാസം ഉണ്ടായെന്നും, ചെയ്യുന്ന ജോലിയിൽ താൻ മെച്ചപ്പെട്ടതായി തോന്നിയതായും അദ്ദേഹം പറഞ്ഞു. ചില രാത്രികളിൽ, അദ്ദേഹം ഒരു ചെറിയ തുക മാത്രമേ സമ്പാദിക്കുന്നുള്ളൂ. മറ്റ് രാത്രികളിൽ, അദ്ദേഹം ആയിരങ്ങൾ സമ്പാദിക്കുന്നു. അദ്ദേഹത്തിന്റെ കഥയെക്കുറിച്ച് അറിഞ്ഞശേഷം പലരും സംഭാവന നൽകാൻ മുന്നോട്ടു വന്നുകഴിഞ്ഞു.