ശ്രീപത്മനാഭസ്വാമിക്ഷേത്രത്തിലെ പൈങ്കുനിആറാട്ട്; തിരുവനന്തപുരം വിമാനത്താവളത്തിലെ റൺവേ ഏപ്രിൽ 5-ന് അടച്ചിടും

തിരുവനന്തപുരം അന്താരാഷ്ട്ര വിമാനത്താവളത്തിലെ റൺവേ ഏപ്രിൽ 5-ന് ഉച്ചയ്ക്ക് ശേഷം 4 മണി മുതൽ രാത്രി 9 മണി വരെയാണ് അടച്ചിടുക

തിരുവനന്തപുരം: ശ്രീപത്മനാഭസ്വാമി ക്ഷേത്രത്തിലെ പൈങ്കുനി ആറാട്ട് ഘോഷയാത്രയുടെ ഭാഗമായി തിരുവനന്തപുരം അന്താരാഷ്ട്ര വിമാനത്താവളത്തിലെ റൺവേ ഏപ്രിൽ 5-ന് ഉച്ചയ്ക്ക് ശേഷം 4 മണി മുതൽ രാത്രി 9 മണി വരെ അടച്ചിടും. ഈ സമയത്തുള്ള ആഭ്യന്തര, രാജ്യന്തര വിമാന സർവീസുകൾ പുന:ക്രമീകരിച്ചു. പൈങ്കുനി ഉത്സവം പ്രമാണിച്ച് ഏപ്രിൽ അഞ്ചിന് നഗരത്തിൽ പ്രാദേശിക അവധിയും കലക്ടര്‍ പ്രഖ്യാപിച്ചിട്ടുണ്ട്.

ഏപ്രില്‍ 5 ന് വൈകിട്ട് 3 മണി മുതല്‍ തിരുവനന്തപുരം നഗര പരിധിയിലെ എല്ലാ സര്‍ക്കാര്‍ സ്ഥാപനങ്ങള്‍ക്കും, വിദ്യാഭ്യാസ സ്ഥാപനങ്ങള്‍ക്കും അവധി ആയിരിക്കുമെന്ന് ജില്ലാ കലക്ടര്‍ അറിയിച്ചു. പൊതു പരീക്ഷകള്‍ക്ക് അവധി ബാധകമല്ല. മീനമാസത്തിലെ രോഹിണി നാളില്‍ കൊടിയേറി പത്താം ദിവസം അത്തം നാളില്‍ സമാപിക്കുന്ന ഈ ക്ഷേത്രത്തിലെ ഉത്സവമാണ് പൈങ്കുനി ഉത്സവം.