Gold Rate: ആശ്വാസം കുതിപ്പിന് ഇന്ന് ഇടവേള; സംസ്ഥാനത്തെ സ്വർണവിലയിൽ ഇടിവ്|Kerala gold rate update on 12th January 2025 know the rates

ഫെബ്രുവരി മാസത്തിൽ കഴിഞ്ഞ 10 ദിവസത്തിനിടെ 2520 രൂപയോളം വര്‍ധിച്ച ശേഷമാണ് സ്വർണവില ഇടിയുന്നത്

തിരുവനന്തപുരം: സംസ്ഥാനത്ത് സ്വർണവിലയിൽ ഇടിവ്. പവന് 560 രൂപയുടെ ഇടിവാണ് രേഖപ്പെടുത്തിയിരിക്കുന്നത്. ഇതോടെ ഒരു പവൻ സ്വർണത്തിന്റെ ഇന്നത്തെ വില 63,520 രൂപയാണ്. 22 കാരറ്റ് ഗ്രാമിന് 70 രൂപ കുറഞ്ഞ് 7940 രൂപയിലെത്തി. കഴിഞ്ഞ ദിവസമാണ് സ്വർണവില ചരിത്രത്തിൽ ആദ്യമായി 64000 കടന്നത്. ചൊവ്വാഴ്ച രാവിലെ 64,480 രൂപ രേഖപ്പെടുത്തിയ സ്വർണനിരക്ക് ഉച്ചയ്ക്കു 400 രൂപ ഇടിഞ്ഞ് 64080 ൽ എത്തിയിരുന്നു. ഫെബ്രുവരി മാസത്തിൽ കഴിഞ്ഞ 10 ദിവസത്തിനിടെ 2520 രൂപയോളം വര്‍ധിച്ച ശേഷമാണ് സ്വർണവില ഇടിയുന്നത്.ജനുവരി 22നാണ് പവന്‍ വില ചരിത്രത്തില്‍ ആദ്യമായി അറുപതിനായിരം കടന്നത്. ഒരു ഗ്രാം 18 കാരറ്റ് സ്വർണത്തിന്റെ വിപണി വില 6550 രൂപയാണ്. വെള്ളിയുടെവിലയിൽ ഇന്ന് മാറ്റമില്ല. ഒരു ഗ്രാം സാധാരണ വെള്ളിയുടെ വില 106 രൂപയാണ്.

സ്റ്റീലിനും അലുമിനിയത്തിനും 25 ശതമാനം ഇറക്കുമതി തീരുവ ഏര്‍പ്പെടുത്താന്‍ ട്രംപ് ഭരണകൂടം തീരുമാനിച്ചതാണ് രണ്ടു ദിവസമായുള്ള സ്വര്‍ണ വിലയിലെ മുന്നേറ്റത്തിന് പിന്നിലെന്നാണ് വിലയിരുത്തൽ.ഇന്ന് ഒരു പവന്‍ സ്വര്‍ണം ആഭരണം വാങ്ങുമ്പോള്‍ 70000 രൂപ വരെ ചെലവ് വരാനാണ് സാധ്യത. ഒരു പവന്‍ സ്വര്‍ണത്തിന്റെ കൂടെ അഞ്ച് ശതമാനം കുറഞ്ഞ പണിക്കൂലിയും മൂന്ന് ശതമാനം ജിഎസ്ടിയും ഹാള്‍മാര്‍ക്കിങ് ചാര്‍ജും ഉപഭോക്താവ് നല്‍കണം. ഡിസൈന്‍ കൂടുതലുള്ള ആഭരണങ്ങളാണ് എങ്കില്‍ വില വീണ്ടും ഉയരും. ഈ മാസത്തെ ഏറ്റവും കുറവ് സ്വർണനിരക്ക് രേഖപ്പെടുത്തിയത് ഫെബ്രുവരി മൂന്നിനായിരുന്നു. അന്ന് ഒരു പവൻ സ്വർണത്തിന്റെ വില 61,640 രൂപയായിരുന്നു.രാജ്യാന്തര വിപണിയിലെ അനിശ്ചിതത്വം സ്വര്‍ണവിലയെ സ്വാധീനിക്കുന്നതായാണ് വിദഗ്ധരുടെ വിലയിരുത്തല്‍. 2025-ന്റെ തുടക്കത്തിൽ 57,200 രൂപയായിരുന്നു സ്വര്‍ണവില.