ഐപിഎൽ 2024ന് ആവേശ തുടക്കം; ആദ്യമത്സരത്തിൽ സിഎസ്കെയും ആർസിബിയും നേർക്കുനേർ

ഐപിഎല്ലിലെ നിലവിലെ ജേതാക്കളായ ചെന്നൈ ഇതുവരെ ലീഗിൽ അഞ്ച് കിരീടങ്ങളാണ് നേടിയിട്ടുള്ളത്. ഏറ്റവും കൂടുതൽ ഐപിഎൽ കിരീടങ്ങളെന്ന നേട്ടം ടീം മുംബൈ ഇന്ത്യൻസുമായി പങ്കുവെക്കുകയാണ്. ഇന്ത്യയുടെ മുൻ നായകൻമാരായ വിരാട് കോഹ്ലിയും എംഎസ് ധോണിയും തമ്മിലാണ് മത്സരത്തിൽ നേർക്കുനേർ വരുന്നത്.

മത്സരത്തിന് തലേദിവസം തന്നെ തങ്ങളുടെ പുതിയ ക്യാപ്റ്റനെ ചെന്നൈ സൂപ്പർ കിങ്സ് പ്രഖ്യാപിച്ചിട്ടുണ്ട്. എംഎസ് ധോണിക്ക് പകരം റുതുരാജ് ഗെയ്ക്വാദാണ് ഇനി ചെന്നൈയെ നയിക്കാൻ പോകുന്നത്. ഇത്തവണത്തേത് ധോണിയുടെ അവസാന ഐപിഎൽ സീസൺ ആയിരിക്കുമെന്നും ഇതോടെ ഉറപ്പായിരിക്കുകയാണ്.

advertisement

Also read-CSK ക്യാപ്റ്റൻ സ്ഥാനം ഒഴിയുമെന്ന് ധോണി നേരത്തെ സൂചന നൽകി; ആരാധകർക്ക് മനസ്സിലായില്ലെന്ന് റുതുരാജ്

കാവേരി ഡെർബിയെന്നും സതേൺ ഡെർബിയെന്നുമെല്ലാം ചെന്നൈ – ആർസിബി പോരാട്ടം അറിയപ്പെടുന്നുണ്ട്. മുൻ ചെന്നൈ ഓപ്പണർ ഫാഫ് ഡുപ്ലെസിസാണ് ആർസിബിയെ നയിക്കുന്നത്. ധോണിയും കോഹ്ലിയും രോഹിത് ശർമയുമൊന്നും ക്യാപ്റ്റനല്ലാത്ത ഐപിഎല്ലാണ് ഇത്തവണ നടക്കുന്നതെന്ന പ്രത്യേകത കൂടിയുണ്ട്. സീസൺ തുടങ്ങുന്നതിന് മുമ്പ് തന്നെ ഹാർദിക് പാണ്ഡ്യയെ ട്രേഡിങ്ങിലൂടെ മുംബൈ ടീമിലെത്തിച്ച് പുതിയ ക്യാപ്റ്റനായി പ്രഖ്യാപിച്ചിട്ടുണ്ട്.

സ്വന്തം തട്ടകത്തിൽ ചെന്നൈ കൂടുതൽ കരുത്ത് കാണിക്കുന്ന ടീമാണ്. പുത്തൻ താരങ്ങളെയും ടീമിലെത്തിച്ചാണ് ഇത്തവണ സിഎസ്കെ തുടങ്ങുന്നത്. കഴിഞ്ഞ സീസണിലെ മിന്നും താരം ഓപ്പണർ ഡെവോൺ കോൺവെ ഇല്ലാത്തത് ടീമിന് തിരിച്ചടിയായിട്ടുണ്ട്. എങ്കിലും കിവീസ് താരങ്ങളായ ഡാരിൽ മിച്ചലും രചിൻ രവീന്ദ്രയും ടീമിൻെറ ബാറ്റിങ് നിരയ്ക്ക് മുതൽക്കൂട്ടാവും. ബംഗ്ലാദേശ് പേസർ മുസ്തഫിസുർ റഹ്മാൻ, ഇന്ത്യൻ താരങ്ങളായ ശാർദുൽ താക്കൂർ, സമീർ റിസ്വി, അവിനാഷ് ആരവല്ലി എന്നിവരെയെല്ലാം ടീം ഇത്തവണത്തെ താരലേലത്തിൽ എത്തിച്ചിട്ടുണ്ട്.

പുതിയ കളിക്കാരെ ആർസിബിയും ലേലത്തിൽ ടീമിലെത്തിച്ചിട്ടുണ്ട്. വിൻഡീസ് പേസർ അൽസാരി ജോസഫ്, കിവീസ് പേസർ ലോക്കി ഫെർഗൂസൻ, ഇംഗ്ലീഷ് ഓൾറൌണ്ടർ ടോം കറൻ, ഇന്ത്യൻ താരങ്ങളായ യഷ് ദയാൽ, സ്വപ്നിൽ സിങ്, സൌരവ് ചൌഹാൻ എന്നിവരെല്ലാം ആർസിബിക്കായി ആദ്യ സീസൺ കളിക്കാൻ ഒരുങ്ങുകയാണ്. ഐപിഎല്ലിൽ ഇതുവരെ ചെന്നൈയും ആർസിബിയും 31 തവണ ഏറ്റുമുട്ടിയപ്പോൾ 20 മത്സരത്തിലും ചെന്നൈയാണ് വിജയിച്ചത്.

മത്സരം എപ്പോൾ: മാർച്ച് 22ന് വെകിട്ട് 7.30ന്

എവിടെ: എംഎ ചിദംബരം സ്റ്റേഡിയം ചെപ്പോക്ക്, ചെന്നൈ

എങ്ങനെ കാണാം: ജിയോ സിനിമ ആപ്പിലും വെബ്സൈറ്റിലും

ടീമിലെ മാറ്റങ്ങൾ: കോൺവെയ്ക്ക് പകരം രചിൻ രവീന്ദ്രയെ ചെന്നൈ ഓപ്പണറായി പരീക്ഷിച്ചേക്കും. നാലാം നമ്പറിൽ ഡാരിൽ മിച്ചലിനെ കളിപ്പിക്കാനാണ് സാധ്യത. വിരാട് കോഹ്ലിയും ക്യാപ്റ്റൻ ഡുപ്ലെസിസും ചേർന്ന് ആർസിബി ഇന്നിങ്സ് ഓപ്പൺ ചെയ്യും.