Mallika Sukumaran | തിരുവനന്തപുരത്ത് പരിപാടിയുണ്ട് എന്ന് പറഞ്ഞ് ലൊക്കേഷനിൽ നിന്നുമെത്തി മല്ലികയെ വിവാഹം ചെയ്ത സുകുമാരൻ

മലയാള സിനിമയിൽ ഏറെ ചർച്ചചെയ്യപ്പെട്ട ആദ്യകാല താര വിവാഹങ്ങളിൽ ഒന്നായിരുന്നു സുകുമാരനും (Sukumaran) മല്ലികയും (Mallika) തമ്മിലേത്. ഇന്നത്തെപ്പോലെ സോഷ്യൽ മീഡിയ യുഗം ആരംഭിച്ചിട്ടില്ലാത്തതിനാലും, ആഘോഷങ്ങൾ ഇത്രകണ്ട് സജീവമല്ലാതിരുന്നതിനാലും ആ വിവാഹമൊക്കെ ഏറെ കൊട്ടിഘോഷിക്കപ്പെട്ടിട്ടില്ല എന്നത് വാസ്തവം. ഇന്നിപ്പോൾ രണ്ടുമക്കളും, മരുമക്കളും, കൊച്ചുമക്കളും ഉൾപ്പെടുന്ന മലയാള സിനിമയിലെ താരകുടുംബമാണ് മല്ലിക സുകുമാരന്റേത്. പൃഥ്വിരാജിന്റെ മകൾ അല്ലി മാത്രമാണ് ഇനി സിനിമയിലെത്താനുള്ളത്

ചില ബ്ലാക്ക് ആൻഡ് വൈറ്റ് ചിത്രങ്ങൾക്കപ്പുറം മല്ലികയുടെയും സുകുമാരന്റെയും വിവാഹക്കഥ പലർക്കും അത്രകണ്ട് പരിചിതമല്ല. എന്നാൽ അടുത്തിടെ ഒരു യുട്യൂബ് ചാനലിന് നൽകിയ അഭിമുഖത്തിൽ പതിറ്റാണ്ടുകൾക്ക് മുൻപുള്ള തന്റെ വിവാഹത്തെക്കുറിച്ചുള്ള രസകരമായ കാര്യങ്ങൾ മല്ലിക പങ്കിട്ടു. സുകുമാരൻ പരമ രഹസ്യമായാണ് ആ വിവാഹച്ചടങ്ങ്‌ സൂക്ഷിച്ചത്. അതേക്കുറിച്ച് മല്ലിക സുകുമാരൻ വെളിപ്പെടുത്തുന്നു (തുടർന്ന് വായിക്കുക)

തോപ്പിൽ ഭാസിയുടെ സിനിമാ ലൊക്കേഷനിൽ നിന്നും അത്യാവശ്യമായി തിരുവനന്തപുരത്ത് ഒരു പരിപാടിയുണ്ട് എന്നും, തന്നെ ആറ് മണിക്ക് പോകാൻ അനുവദിക്കണമെന്നുമായിരുന്നു സുകുമാരന്റെ ആവശ്യം. വിവാഹമാണ് എന്ന് ആരോടും പറഞ്ഞില്ല

വിവാഹദിവസം രാവിലെ 7.40നായിരുന്നു താലികെട്ട്. ശേഷം ഒരു ലുങ്കിയും ഷർട്ടും ധരിച്ച് സുകുമാരൻ വീണ്ടും ലൊക്കേഷനിലേക്ക്. അവിടെയെത്തിയതും ചിലർക്കെങ്കിലും എവിടുന്നോ വാർത്ത എത്തിക്കഴിഞ്ഞിരുന്നു

കൊല്ലത്തു നടന്നുകൊണ്ടിരുന്ന നീലാകാശം സിനിമയുടെ ലൊക്കേഷനിലേക്കാണ് സുകുമാരൻ പോയത്. അവിടെയെത്തിയതും നടി മീന ചോദ്യമെടുത്തിട്ടു: 'സുകുമാരാ, നിന്റെ കല്യാണമായിരുന്നോ ഇന്ന്? മല്ലികയെ കെട്ടി എന്ന് ആരോ പറഞ്ഞു' എന്നായി മീന

'ഒന്ന് പോ ചേച്ചി, മല്ലികയെ രാവിലെ കെട്ടിയിട്ട് ഞാനിങ്ങോട്ടു ഓടിവരികയല്ലോ' എന്ന് പറഞ്ഞ് സുകുമാരൻ ആ ചോദ്യത്തിൽ നിന്നും അങ്ങ് വഴുതി

രണ്ടാഴ്ച ആരോടും മിണ്ടാതെ സുകുമാരൻ വിവാഹക്കാര്യം സൂക്ഷിച്ചു. 1978ലായിരുന്നു, സുകുമാരന്റെയും മല്ലികയുടെയും വിവാഹം