Miss Universe 2023| നിക്കരാഗ്വയുടെ ഷെനീസ് പ്ലാസിയോസ് പുതിയ വിശ്വസുന്ദരി

72-ാമത്  മിസ് യൂണിവേഴ്സ് കിരീടം നിക്കരാഗ്വന്‍ സുന്ദരി ഷെനീസ് പ്ലാസിയോസ് സ്വന്തമാക്കി.

90 രാജ്യങ്ങളില്‍ നിന്നുള്ള മത്സരാര്‍ത്ഥികള്‍ മാറ്റുരച്ച വിശ്വസുന്ദരി പട്ടത്തിനായുള്ള പോരാട്ടത്തിനൊടുവിലാണ് ഷെനീസ് പ്ലാസിയോസ് കിരീടം നേടിയത്.

നിക്കരാഗ്വയിലിൽ നിന്ന് ആദ്യമായി വിശ്വസുന്ദരി പട്ടം നേടുന്നയാളാണ് ഷെനീസ് പ്ലാസിയോസ് .

തായ്‌ലൻഡിന്റെ അന്റോണിയ പോർസ്‌ലിഡ് രണ്ടാം സ്ഥാനവും ഓസ്ട്രേലിയയുടെ മൊറയ വിൽസൺ മൂന്നാം സ്ഥാനവും നേടി.

ഇന്ത്യയുടെ  ശ്വേതാ ശർദ അവസാന 20ൽ എത്തിയെങ്കിലും മുന്നോട്ട് പോകാനാകാതെ പുറത്തായി.  പാക്കിസ്ഥാനിൽ നിന്നുള്ള എറിക്ക റോബിനും  ആദ്യമായി അവസാന 20ൽ ഇടംനേടി.

എൽസാൽവദോറിലെ സാൻ സാൽവഡോറിൽ നടന്ന ഗംഭീര ചടങ്ങിൽ കഴിഞ്ഞ വർഷത്തെ വിശ്വസുന്ദരിയായ യുഎസിന്റെ ആർബോണി ഗബ്രിയേൽ പുതിയ വിശ്വസുന്ദരിയെ കിരീടമണിയിച്ചു.

മാനസികാരോഗ്യ പ്രവർത്തകയും ഓഡിയോ വിഷ്വൽ പ്രോഡ്യൂസറുമാണ് നിക്കരാഗ്വന്‍ സുന്ദരി ഷെനീസ് പ്ലാസിയോസ്.

കോളജ് വിദ്യാർഥിയായിരിക്കെ, ബിസിനസ് നശിച്ച് അമ്മ നാടുവിട്ടതോടെ അനിയനെയും മുത്തശ്ശിയെയും സംരക്ഷിക്കേണ്ട ചുമതല ഏറ്റെടുത്ത തനിക്ക് നേരിടേണ്ടി വന്ന ജീവിതസമ്മർദങ്ങളാണ് മാനസികാരോഗ്യ മേഖല തെരഞ്ഞെടുക്കുവാൻ പ്രേരിപ്പിച്ചതെന്നു ഷെനീസ് മത്സരത്തിനിടെ പറഞ്ഞു