Brad Pitt| ആണുങ്ങൾക്ക് പാവാട ധരിച്ചൂടെ; റെഡ് കാർപറ്റിൽ പാവാട ധരിച്ചെത്തി ഹോളിവുഡ് താരം ബ്രാഡ് പിറ്റ്

സ്ത്രീകൾ ജീൻസും പാന്റും ധരിക്കുന്നതു പോലെ പുരുഷന്മാർ സാരിയും പാവാടയുമൊക്കെ ധരിക്കുമോ എന്നൊക്കെയുള്ള ചോദ്യങ്ങളും ചർച്ചകളുമൊക്കെ നടക്കുകയാണല്ലോ, അതിനിടയിലാണ് അങ്ങ് ഹോളിവുഡിൽ (Hollywood)ഒരു സൂപ്പർ താരം പാവാട ധരിച്ച് പൊതുവേദിയിൽ കൂളായി എത്തുന്നത്. (Image: Instagram)

മറ്റാരുമല്ല, സാക്ഷാൽ ബ്രാഡ് പിറ്റ് (Brad Pitt)തന്നെ. തന്റെ പുതിയ ചിത്രം 'ബുള്ളറ്റ് ട്രെയിനിന്റെ' പ്രീമിയറിനാണ് എല്ലാവരേയും അത്ഭുതപ്പെടുത്തിക്കൊണ്ട് പാവാടയൊക്കെ ധരിച്ച് ചിരിച്ചു കൊണ്ട് ബ്രാഡ് പിറ്റ് എത്തിയത്. (image: Instagram)

രണ്ടാഴ്ച്ച മുമ്പ് ബെർലിനിലാണ് ആക്ഷൻ അഡ്വഞ്ചർ ചിത്രമായ ബുള്ളറ്റ് ട്രെയിനിന്റെ പ്രീമിയർ നടന്നത്. ഹോളിവുഡിലെ പ്രമുഖരെല്ലാം പങ്കെടുത്ത പ്രീമയിറിൽ മുട്ടറ്റമുള്ള പാവാടയും ലൂസ് ഫിറ്റ് ലിനൻ ഷർട്ടും ജാക്കറ്റും ബൂട്ട്സും ധരിച്ചുള്ള ബ്രാഡ് പിറ്റിന്റെ സ്റ്റൈൽ സ്റ്റേറ്റ്മെന്റ്. (image: Instagram)

പാവാടയും ധരിച്ചുള്ള താരത്തിന്റെ ചിത്രങ്ങൾ സോഷ്യൽമീഡിയയിൽ വൈറലായിരുന്നു. പല കോണുകളിൽ നിന്ന് പല അഭിപ്രായങ്ങൾ ഉയർന്നെങ്കിലും ബ്രാഡ് പിറ്റ് മാത്രം തന്റെ വസ്ത്രധാരണത്തെ കുറിച്ച് ഒന്നും പറഞ്ഞില്ല.

പക്ഷേ, ലോസ് ഏഞ്ചൽസിൽ നടന്ന പ്രീമിയറിൽ മറ്റൊരു സ്റ്റൈലിൽ എത്തിയ താരത്തിനോട് മീഡിയയ്ക്ക് ചോദിക്കാനുണ്ടായിരുന്നത് സിനിമയെ കുറിച്ചല്ലായിരുന്നു, എന്തുകൊണ്ട് അന്ന് പാവാട ധരിച്ചു വന്നു? ഒടുവിൽ താരം തന്നെ അതിന് മറുപടിയും നൽകി. (Image: twitter)

നിയോൺ ഗ്രീൻ സ്യൂട്ടാണ് ലോസ് ഏഞ്ചൽസിലെ പ്രീമിയറിന് ബ്രാഡ് പിറ്റ് ധരിച്ചത്. വറൈറ്റിക്ക് നൽകിയ അഭിമുഖത്തിലാണ് പാവാടയെ കുറിച്ചുള്ള ചോദ്യത്തിന് താരം മറുപടി നൽകിയത്. (Image: Instagram)

ലളിതമായിരുന്നു ബ്രാഡ് പിറ്റിന്റെ മറുപടി. 'എനിക്കറിയില്ല, എല്ലാവരും ഒരു ദിവസം മരിക്കും, അതുകൊണ്ട് ഇങ്ങനെയക്കെയങ്ങ് ചെയ്യാം'. തോളുകുലുക്കി ചിരിച്ചു കൊണ്ട് ബ്രാഡ് പിറ്റിന്റെ മറുപടി ഇതായിരുന്നു. (image: Instagram)

ജപ്പാനീസ് നോവൽ 'മരിയ ബീറ്റിൽ' നെ ആസ്പദമാക്കിയാണ് സംവിധായകൻ ഡേവിഡ് ലീച്ച് ബുള്ളറ്റ് ട്രെയിൻ ഒരുക്കിയിരിക്കുന്നത്. ബ്രാഡ് പിറ്റിന് പുറമേ, സാന്ദ്ര ബുള്ളോക്ക്, ജോയി കിംഗ്, ആരോൺ ടെയ്‌ലർ-ജോൺസൺ, ബ്രയാൻ ടൈറി ​​ഹെൻ‌റി, ആൻഡ്രൂ കോജി, ഹിരോയുക്കി സനദ, മൈക്കൽ ഷാനൻ, ബെനിറ്റോ എ മാർട്ടിനെസ് എന്നീ താരങ്ങളും ചിത്രത്തിൽ വേഷമിടുന്നുണ്ട്. (image: Instagram)

ഓഗസ്റ്റ് നാലിനാണ് ചിത്രം ആഗോള തലത്തിൽ റിലീസ് ചെയ്യുന്നത്. ടോക്കിയോയിൽ നിന്ന് ക്യോട്ടോയിലേക്കുള്ള ബുള്ളറ്റ് ട്രെയിനിലെ അഞ്ച് വ്യത്യസ്‌ത കൊലയാളികളിലൂടെയാണ് ചിത്രത്തിന്റെ കഥ മുന്നോട്ടുപോകുന്നത്. തങ്ങളുടെ ദൗത്യങ്ങൾ പരസ്പരം ബന്ധപ്പെട്ടിരിക്കുന്നുവെന്നും വലിയ അപകടം കാത്തിരിക്കുന്നുണ്ടെന്നും അഞ്ച് പേരും തിരിച്ചറിയുന്നു.