വലിയ തെറ്റ് ചെയ്തു ! ആദിപുരുഷില്‍ നിന്ന് പാഠം പഠിച്ചെന്ന് തിരക്കഥാകൃത്ത് മനോജ് ശുക്ല

പ്രഖ്യാപനം മുതല്‍ ഇന്ത്യന്‍ സിനിമാലോകം ഏറെ പ്രതീക്ഷയോടെ കാത്തിരുന്ന സിനിമയായിരുന്നു ആദിപുരുഷ്. ഇതിഹാസകൃതിയായ രാമായണത്തെ ആസ്പദമാക്കി ഓം റൗട്ട് സംവിധാനം ചെയ്ത ചിത്രം പക്ഷെ ബോക്സ് ഓഫീസില്‍ പരാജയപ്പെട്ടു.

സിനിമയുടെ ടീസര്‍ പുറത്തുവന്നത് മുതലെ ആദിപുരുഷിനെതിരെ വ്യാപകമായ വിമര്‍ശനം ഹൈന്ദവ സംഘടനകളില്‍ നിന്നടക്കം ഉയര്‍ന്നു. നിലവാരമില്ലാത്ത വിഎഫ്കസും കഥാപാത്രങ്ങളുടെ വേഷവിധാനങ്ങളും സംഭാഷണങ്ങളും വരെ വിമര്‍ശിക്കപ്പെട്ടു.

 ശ്രീരാമനായി പ്രഭാസ് എത്തിയ ചിത്രത്തില്‍ സെയ്ഫ് അലിഖാനാണ് രാവണനായി വേഷമിട്ടിരിക്കുന്നത്. കൃതി സനോണ്‍ ആണ് സീതയെ അവതരിപ്പിച്ചത്, സണ്ണി സിംഗ്, ദേവ്ദത്ത് നാഗേ എന്നിവരായിരുന്നു ചിത്രത്തിലെ പ്രധാന താരങ്ങള്‍.

ടി-സീരിസ്, റെട്രോഫൈല്‍ ബാനറില്‍ ഭൂഷണ്‍ കുമാറും കൃഷ്ണകുമാറും ഓം റൗട്ടും ചേര്‍ന്നാണ് ചിത്രം നിര്‍മിച്ചത്. 700 കോടിയോളമായിരുന്നു ചിത്രത്തിന്റെ മുതല്‍ മുടക്ക്. 450 കോടി മാത്രമാണ് ബോക്‌സ് ഓഫീസില്‍ നിന്ന് നേടാനായത്. 

ടീസറും ട്രെയിലര്‍ പുറത്തുവന്നപ്പോള്‍ ഉണ്ടായ ട്രോള്‍ മഴ റിലീസ് ശേഷവും തുടര്‍ന്നു. ആദ്യ ദിനം മുതലുണ്ടായ നെഗറ്റീവ് റിവ്യു സിനിമയുടെ മൊത്തത്തിലുള്ള പ്രകടനത്തെ കാര്യമായി ബാധിച്ചു. 

ഇപ്പോഴിതാ സിനിമയുടെ പരാജയത്തില്‍ നിന്ന് പാഠം പഠിച്ചെന്ന അഭിപ്രായം പങ്കുവെച്ചിരിക്കുകയാണ് ആദിപുരുഷിന്‍റെ തിരക്കഥാകൃത്തായ മനോജ് ശുക്ല. ആജ് തക്കിന് നല്‍കിയ അഭിമുഖത്തിലാണ് മനോജ് ശുക്ലയുടെ ഏറ്റുപറച്ചില്‍.

സിനിമയുടെ റിലീസിന് ശേഷം തനിക്ക് വധഭീഷണി നേരിടാൻ തുടങ്ങിയപ്പോൾ തന്റെ സുരക്ഷയെക്കുറിച്ച് കുടുംബം ആശങ്കാകുലരായെന്ന് മനോജ് പറഞ്ഞു.

സിനിമ എഴുതിയത് തെറ്റായിപ്പോയെന്നും എന്നാൽ ഹിന്ദുമത വിശ്വാസികളുടെ വികാരം വ്രണപ്പെടുത്താൻ താൻ ഒരിക്കലും ഉദ്ദേശിച്ചിട്ടില്ലെന്നും അദ്ദേഹം പറഞ്ഞു. 

"ഒരു തെറ്റ് സംഭവിച്ചു, ഒരു വലിയ തെറ്റ് സംഭവിച്ചു ... ഈ അപകടത്തിൽ നിന്ന് ഞാൻ ഒരുപാട് കാര്യങ്ങൾ പഠിച്ചു, അതൊരു മികച്ച പഠന പ്രക്രിയയായിരുന്നു. ഇനി മുതൽ ഞാൻ വളരെ ശ്രദ്ധാലുവായിരിക്കും,” അദ്ദേഹം പറഞ്ഞു.

സിനിമയുടെ റിലീസിന്  ആളുകള്‍ വളരെ ദേഷ്യത്തോടെ നില്‍ക്കുമ്പോള്‍ ഞാന്‍ വിശദീകരണം നല്‍കാന്‍ ശ്രമിക്കരുതായിരുന്നു. അവരുടെ വികാരത്തെ മാനിക്കണമായിരുന്നു.ഇന്നെനിക്ക് സംഭവിച്ച തെറ്റ് മനസ്സിലാകുന്നു- മനോജ് ശുക്ല കൂട്ടിച്ചേര്‍ത്തു.