എന്നെ ആവശ്യമില്ലാത്തയാൾക്കൊപ്പം പിറന്നാൾ ചിലവിടാൻ ദുബായിയിൽ പോകാൻ തോന്നിയ അബദ്ധം, ഒറ്റപ്പെടൽ; ഹൃദയസ്പർശിയായ കുറിപ്പുമായി ബിഗ് ബോസ് താരം ആര്യ

ഇക്കഴിഞ്ഞ ദിവസമാണ് ബിഗ് ബോസ് താരം ആര്യ ബാബു തന്റെ 31-ാം ജന്മദിനം ആഘോഷിച്ചത്. മകൾ റോയക്കും കൂട്ടുകാർക്കുമൊപ്പം കേക്ക് മുറിച്ച് ആഘോഷമാക്കുന്ന ചിത്രങ്ങൾ ആര്യ സോഷ്യൽ മീഡിയയിൽ പോസ്റ്റ് ചെയ്തു. പക്ഷെ ഇക്കുറി തന്റെ പിറന്നാൾ ആഘോഷ ചിത്രങ്ങൾ മാത്രമല്ല, കഴിഞ്ഞ ദിവസം മറ്റൊരു പിറന്നാളിന് കടന്നു പോയ തിക്താനുഭവങ്ങളുടെ ഓർമ്മക്കുറിപ്പും ആര്യ ജന്മദിനത്തിന് പങ്കിട്ടു

ആര്യയുടെ നീളൻ കുറിപ്പിന്റെ പരിഭാഷ വായിക്കാം: കഴിഞ്ഞ വർഷം ഇതേ ദിവസം ഞാൻ എന്റെ ജീവിതത്തിലെ വളരെ മോശമായ ഒരു ഘട്ടത്തിലൂടെയാണ് കടന്നുപോകുന്നത് .. വിഷാദം എന്നെ ഇത്രയധികം ബാധിക്കുമെന്ന് ഞാൻ ഒരിക്കലും അറിഞ്ഞിരുന്നില്ല. ഞാൻ അനുഭവിച്ച വികാരങ്ങൾ വിശദീകരിക്കാൻ പോലും ബുദ്ധിമുട്ടാണ്. യു.എ.ഇ.യിലെ ഒരു അപ്പാർട്ട്മെന്റിൽ ഒറ്റയ്ക്ക് കിടന്നു... (തുടർന്ന് വായിക്കുക)

ബാക്കി ദിവസങ്ങൾ കടന്നുപോകാൻ, എനിക്ക് ഒരു പോംവഴിയില്ലാതെ ഒരു കുപ്പി വൈനും ഒരു ദിവസത്തേക്ക് അവശേഷിക്കുന്ന ഭക്ഷണവും ആശ്രയിക്കേണ്ടിവന്നു ... എന്റെ അവസ്ഥ അത്രയ്ക്കും മോശമായിരുന്നു. പക്ഷേ എങ്ങനെയോ ഞാൻ രക്ഷപ്പെട്ടു...

വൈകുന്നേരത്തോടെ എന്തോ പന്തികേടുണ്ടെന്ന് മനസ്സിലാക്കി എന്റെ അടുക്കൽ വരാൻ തീരുമാനിച്ച ആ വ്യക്തിക്ക് നന്ദി. ഇതായിരുന്നു കഴിഞ്ഞുപോയ എന്റെ ജന്മദിനം, എനിക്ക് 30 വയസ്സ് തികഞ്ഞ ദിവസം !!!

എന്നാൽ ഇന്ന് ഞാൻ തിരിഞ്ഞുനോക്കുമ്പോൾ, ഞാൻ ശരിയായ തിരഞ്ഞെടുപ്പ് നടത്തിയിരുന്നെങ്കിൽ അത് വളരെ വ്യത്യസ്തമാകുമായിരുന്നു. എനിക്ക് എന്റെ സുന്ദരിയായ മകൾക്കും എന്റെ കുടുംബത്തിനും സുഹൃത്തുക്കൾക്കുമൊപ്പം കഴിയുകയും സന്തോഷകരമായ ജന്മദിനം ആഘോഷിക്കാമായിരുന്നു...

യു.എ.ഇ.യിലേക്കു യാത്ര ചെയ്യാനും എന്റെ ജന്മദിനം എന്നിൽ തീരെ താല്പര്യമില്ലാത്ത ഒരാളുമായി ചിലവഴിക്കാനും വേണ്ട തീരുമാനമെടുക്കാനും വേണ്ടി ഞാൻ വിഡ്ഢിയായിരുന്നു. തെറ്റായ തിരഞ്ഞെടുപ്പ് നടത്തിയത് ഞാനാണ്. അതിന് ആരെയും കുറ്റപ്പെടുത്തേണ്ടതില്ല...

ഇന്ന് എന്നെ നോക്കൂ. എനിക്ക് ഇന്ന് 31 വയസ്സ് തികഞ്ഞു, എന്റെ മുഖത്ത് ഏറ്റവും അത്ഭുതകരമായ പുഞ്ചിരിയുണ്ട്, എന്റെ ഹൃദയം സ്നേഹവും സമാധാനവും നന്ദിയും കൊണ്ട് നിറഞ്ഞിരിക്കുന്നു. നിങ്ങളുടെ ജീവിതത്തിൽ കുറച്ച് സമയമെങ്കിലും വിഷമയമായ ആളുകളുണ്ടെങ്കിൽ കുഴപ്പമില്ല, അപ്പോൾ മാത്രമേ യഥാർത്ഥ വ്യക്തികൾ ആരാണെന്ന് നിങ്ങൾക്ക് മനസ്സിലാകൂ...

ഞാൻ ഉദ്ദേശിക്കുന്നത് നിങ്ങളെ ആത്മാർത്ഥമായി സ്നേഹിക്കുന്നവർ, നിങ്ങളെ കുറിച്ചോർക്കും എന്നാണു. ഞാൻ പറയാൻ ശ്രമിക്കുന്നത് ഇത്രമാത്രം .. എല്ലാം നിങ്ങളുടെ കൈകളിലാണ് .... സന്തോഷിക്കണോ അതോ നിങ്ങളുടെ മനസമാധാനം നശിപ്പിക്കണോ ... എല്ലാം നിങ്ങളുടെ കൈകളിലാണ്. തിരഞ്ഞെടുക്കൽ നിങ്ങളുടേതാണ്...

സന്തോഷിക്കണോ അതോ നിങ്ങളുടെ ഹൃദയം തകർക്കണോ എന്ന്. എപ്പോഴും ഓർക്കുക ... നിങ്ങളുടെ സന്തോഷം നിങ്ങളുടെ കൈകളിലാണ് ... എപ്പോഴും വിവേകപൂർവ്വം തിരഞ്ഞെടുക്കാൻ സ്വയം ഓർമ്മിപ്പിക്കുക. നിങ്ങളെ നിരുപാധികമായി സ്നേഹിക്കുന്ന, എപ്പോഴും നിങ്ങളോടൊപ്പമുള്ള ആളുകളെ തിരഞ്ഞെടുക്കുക. ഇന്ന് ഞാൻ വളരെ സന്തുഷ്ടയാണ് ... എന്റെ 31 -ആം ജന്മദിനം എനിക്ക് ലഭിക്കാവുന്നതിൽ വച്ച് ഏറ്റവും മികച്ചതായിരുന്നു ...

എനിക്ക് വേണ്ടപ്പെട്ടവരിൽ ചിലരെ മിസ് ചെയ്യുന്നു എങ്കിലും, എനിക്ക് സന്തോഷവും ഏറ്റവും പ്രധാനമായി സമാധാനവുമുണ്ട് .... എന്റെ പ്രിയപ്പെട്ട കുടുംബത്തിന് ഒരു വലിയ നന്ദിയും സ്നേഹവും .. കുടുംബത്തെപ്പോലുള്ള സുഹൃത്തുക്കൾ എപ്പോഴും എപ്പോഴും ഉണ്ടായിരുന്നതിനും സന്തോഷത്തിന് എന്റെ കാരണമായതിനും... നന്ദി