'പെപ്സി കി കസം': സോനം കപൂറിനൊപ്പം ആടിപ്പാടി ദുൽഖർ; ട്രെൻഡിംഗ് ആയി സോയാ ഫാക്ടറിലെ ഗാനം

പുറത്ത് വന്ന് മണിക്കൂറുകൾക്കുള്ളിൽ യൂട്യൂബ് ട്രെൻഡിംഗ് ആയിരിക്കുകയാണ് ബോളിവുഡ് ചിത്രം സോയാ ഫാക്ടറിലെ പുതിയ ഗാനം.

മലയാളികളുടെ പ്രിയ താരം ദുൽഖർ സൽമാനും സോനം കപൂറും ആകര്‍ഷകമായ നൃത്തച്ചുവടുകളുമായെത്തുന്ന 'പെപ്സി കി കസം' എന്ന ഗാനമാണ് ട്രെൻഡിംഗ് ചാർട്ടിൽ ഇടം നേടിയിരിക്കുന്നത്.

ബോളിവുഡ് മസാല ചേരുവകളെല്ലാം ഉള്ള പാർട്ടി മൂഡിലുളള ഗാനം രചിച്ചത് അമിതാഭ് ഭട്ടചാര്യയാണ്. ശങ്കർ‌-ഇഹ്സാന്‍-ലോയുടെ സംഗീത സംവിധാനത്തിൽ ബെന്നി ദയാൽ പാടിയ ഗാനം ഒറ്റ ദിവസം കൊണ്ട് രണ്ടര മില്യൺ ആളുകളാണ് കണ്ടത്.

ദുല്‍ഖറിന്റെ രണ്ടാമത്തെ ബോളിവുഡ് ചിത്രമാണ് സോയാ ഫാക്ടർ. കാര്‍വ എന്ന ചിത്രത്തിൽ ഇര്‍ഫാൻ ഖാനൊപ്പമായിരുന്നു താരത്തിന്റെ ബോളിവുഡ് അരങ്ങേറ്റം.

അനുജ ചൗഹാന്റെ ദ സോയ ഫാക്ടർ എന്ന നോവലിനെ ആസ്പദമാക്കിയൊരുങ്ങുന്ന അതേ പേരിലൊരുങ്ങുന്ന ചിത്രത്തിൽ ഇന്ത്യൻ ക്രിക്കറ്റ് ടീം ക്യാപ്റ്റനായാണ് ദുൽഖർ എത്തുന്നത്. ടൈറ്റിൽ കഥാപാത്രമായ സോയ ആയി സോനം കപൂറും.

ചിത്രത്തിന്റെ ട്രെയിലർ നേരത്തെ തന്നെ ജനശ്രദ്ധ നേടിയിരുന്നു. ട്രെയിലർ കണ്ട ശേഷം ക്രിക്കറ്റ് ഇതിഹാസം സച്ചിൻ ടെണ്ടുൽക്കർ അടക്കം ഇരുതാരങ്ങളെയും അഭിനന്ദിച്ച് രംഗത്തെത്തിയിരുന്നു. സെപ്റ്റംബർ 20 നാണ് സോയ ഫാക്ടർ തിയറ്ററുകളിലെത്തുന്നത്.