തമിഴകം പിടിക്കാനൊരുങ്ങി ദളപതി; വിജയ് രാഷ്ട്രീയത്തില്‍ ഇറങ്ങണോ? സര്‍വേ ആരംഭിച്ച് ആരാധകര്‍

സിനിമയും രാഷ്ട്രീയവും ഒരു നാണയത്തിന്‍റെ രണ്ട് വശങ്ങള്‍ പോലെയാണ് തമിഴകത്ത്. അധികാര കസേരയില്‍ പലകുറി പയറ്റി തെളിഞ്ഞ കലൈജ്ഞര്‍ എം.കരുണാനിധിയും മക്കള്‍ തിലകം എംജിആറും, പുരട്ചി തലൈവി ജയലളിതയും ക്യാപ്റ്റന്‍ വിജയകാന്തും പോരാടിയ തട്ടകതിലേക്ക് മത്സരത്തിനിറങ്ങുകയാണ് ദളപതി വിജയ്

വിജയുടെ രാഷ്ട്രീയ പ്രവേശനത്തെ ചുറ്റിപറ്റിയുള്ള ചര്‍ച്ചകള്‍ തമിഴകത്ത് കേള്‍ക്കാന്‍ തുടങ്ങിയിട്ട് കാലമേറെയായി. സിനിമകളിലൂടെ നിരന്തരം രാഷ്ട്രീയം പറയുന്ന വിജയ് ഒരു പടികൂടി കടന്ന് തെരഞ്ഞെടുപ്പ് രാഷ്ട്രീയത്തിലേക്ക് കടക്കുന്നു എന്ന സൂചനയാണ് ഉയരുന്നത്. 2026 നിയമസഭ തെരഞ്ഞെടുപ്പ് മുന്നില്‍ കണ്ട് തന്‍റെ ആരാധക സംഘടനായ വിജയ് മക്കള്‍ ഇയക്കം പ്രവര്‍ത്തകര്‍ തമിഴ്നാട്ടിലെ വീടുകള്‍ തോറും സര്‍വേ ആരംഭിച്ചതായാണ് വിവരം.

സംസ്ഥാനത്തെ എല്ലാ നിയമസഭാ മണ്ഡലങ്ങളിലും ബൂത്ത് തലത്തിലാണ് സർവേ നടത്തുന്നത്. ഒരോയിടത്തെയും നിലവിലെ രാഷ്ട്രീയ സാഹചര്യം, ജനങ്ങളുടെ പ്രശ്നങ്ങൾ, നിർണായക സ്വാധീനമുള്ള വ്യക്തികൾ, കഴിഞ്ഞ അഞ്ചു വർഷമായി തിരഞ്ഞെടുപ്പിൽ വിജയികളായവരുടെ വിവരങ്ങൾ തുടങ്ങിയവയാണ് ശേഖരിക്കുന്നത്

പ്രത്യേക ഫോം നൽകി അവ മുഖേനയാണ് സംഘടനാംഗങ്ങൾ വിവരങ്ങൾ ശേഖരിക്കുന്നത്. ആരാധക സംഘടനയെ ശക്തിപ്പെടുത്തി പാർട്ടിയാക്കി മാറ്റുന്നതിനുള്ള സാധ്യതകളാണ് തേടുന്നത്. ഇതിനായി വിജയ് മക്കൾ ഇയക്കം ജനറൽ സെക്രട്ടറി ബുസി ആനന്ദിന്റെ നേതൃത്വത്തിൽ സംഘടനയുടെ ജില്ലാ യോഗങ്ങൾ തുടങ്ങി.

വിജയ് മക്കൾ ഇയക്കം നേരത്തേയും സന്നദ്ധ പ്രവർത്തങ്ങൾ നടത്താറുണ്ടായിരുന്നുവെങ്കിലും അംബേദ്കർ ജയന്തി പോലെയുള്ള ആഘോഷങ്ങൾ നടത്തിയിരുന്നില്ല. എന്നാൽ, ഇത്തവണ അംബേദ്കർ ജയന്തി വ്യാപകമായി ആചരിച്ചു. റംസാൻ മാസത്തിൽ ഇഫ്താർ വിരുന്നും നടത്തി.

പിന്നാക്ക, ന്യൂനപക്ഷ വിഭാഗങ്ങളെ പ്രധാനമായും ലക്ഷ്യമാക്കിയുള്ള നടപടിയായിട്ടാണ് ഇതിനെ വിലയിരുത്തുന്നത്. തമിഴ്‌നാട്ടിൽ വേരുറപ്പിക്കാൻ ബി.ജെ.പി. തീവ്രശ്രമം നടത്തുമ്പോഴാണ് വിജയ്‌യും രാഷ്ട്രീയ സാധ്യത തേടുന്നത്.

കേന്ദ്ര സർക്കാരിന്റെ നയങ്ങളെ സിനിമയിലൂടെ വിമർശിച്ചതിനെത്തുടർന്ന് ബി.ജെ.പി.യിൽനിന്ന് രൂക്ഷമായ എതിർപ്പ് വിജയ് നേരിട്ടിരുന്നു. അതിനാൽ കമൽഹാസനെപ്പോലെത്തന്നെ ബി.ജെ.പി.യെ എതിർത്തു കൊണ്ടുതന്നെയാകും വിജയ്‌യുടെയും രംഗപ്രവേശമെന്നാണ് കരുതപ്പെടുന്നത്. എന്നാൽ, സർവേയുടെയും തുടർന്നുള്ള രാഷ്ട്രീയസാഹചര്യത്തെയും ആശ്രയിച്ചാകും രാഷ്ട്രീയ പ്രവേശത്തിൽ വിജയ് അന്തിമ തീരുമാനമെടുക്കുകയെന്നും വിവരമുണ്ട്.

ലോകേഷ് കനകരാജ് സംവിധാനം ചെയ്യുന്ന ലിയോ എന്ന ചിത്രത്തിന്‍റെ ഷൂട്ടിങ്ങിലാണ് വിജയ് ഇപ്പോഴുള്ളത്. സിനിമകളിലൂടെ ഇക്കാലം കൊണ്ട് നേടിയ ജനപ്രീതിയും ആരാധകസമ്പത്തും വോട്ടായിമാറിയാല്‍ തമിഴകത്തെ രാഷ്ട്രീയ സാഹചര്യങ്ങള്‍ മാറ്റിമറിക്കാന്‍ പോന്ന ശക്തിയായി വിജയ് മാറും എന്നാണ് എതിര്‍ചേരിയില്‍ ഉള്ളവരുടെ കണക്കുകൂട്ടല്‍