Suriya | 'ഞാന്‍ ആത്മാര്‍ഥമായാണ് പ്രയത്‌നിക്കുന്നത്'; ഓവർ ആക്ടർ നടനെന്ന് വിളിക്കുന്നവരുണ്ടെന്ന് സൂര്യ

തന്നെ ചിലർ ഓവർ ആക്ടിങ് നടനാണെന്നാണ് വിളിക്കുന്നതെന്ന് തമിഴ് നടൻ സൂര്യ. ഒരുപാട് പേർക്ക് ഈ അഭിപ്രായം ഉണ്ടെങ്കിലും താൻ ആത്മാർത്ഥമായി തന്നെ പ്രയത്നിക്കുന്നുണ്ടെന്നും നടൻ പറഞ്ഞു. നടന്റെ പുതിയ ചിത്രമായ റെട്രോയുമായി ബന്ധപ്പെട്ട അഭിമുഖത്തിനിടയിലായിരുന്നു സൂര്യ ഇക്കാര്യങ്ങൾ പറഞ്ഞത്.

ഞാനൊരു മികച്ച നടനല്ല. ചിലർ എന്ന ഓവർ ആക്ടിങ് നടനെന്ന് വിളിക്കും. അതേ അഭിപ്രായമുള്ള ഒരുപാട് പേരുണ്ടാകും. പക്ഷേ ബാല സാറില്‍നിന്ന് പഠിച്ച പാഠങ്ങളില്‍ ഉറച്ചു നിൽക്കുന്നു. തന്റെ കഴിവിന്റെ പരമാവധി ചെയ്യുന്നുണ്ടെന്നും സൂര്യ പറഞ്ഞു.

കഴിവിന്റെ പരമാവധി ചെയ്താലും നന്നായി സംഭവിക്കണമെന്നില്ലെന്നും താൻ ആത്മാർത്ഥമായാണ് പ്രയത്നിക്കുന്നതെന്നും നടൻ പറഞ്ഞു. മെയ്യഴകന്‍ പോലെ ഒരു ചിത്രമെടുത്താല്‍, എനിക്ക് കാര്‍ത്തിയാവാന്‍ പറ്റില്ല. തനിക്ക് മെയ്യഴകൻ ചെയ്യാൻ കഴിയില്ലെന്നും സൂര്യ വ്യക്തമാക്കി.

ചിത്രത്തിന്റെ സംവിധായകന്‍ കാര്‍ത്തിക് സുബ്ബരാജ്, സംഗീതസംവിധായകന്‍ സന്തോഷ് നാരായണന്‍ എന്നിവരുമൊത്തുള്ള 'റെക്ടാംഗിള്‍ ടേബില്‍ ഡിസ്‌കഷനി'ലായിരുന്നു സൂര്യ തന്റെ അഭിനയത്തെ കുറിച്ച് സംസാരിച്ചത്.

കാക്ക കാക്ക, ഗജിനി, സില്ലുനു ഒരു കാതൽ തുടങ്ങിയ ചിത്രങ്ങളിൽ അഭിനയിച്ചതിനുശേഷം സൂര്യയുടെ കരിയർ എങ്ങനെയാണ് മാറിയതെന്ന് കാർത്തിക് സുബ്ബരാജും സന്തോഷ് നാരായണനും സംസാരിച്ചു.

കാർത്തിയും അരവിന്ദ് സ്വാമിയും പ്രധാനവേഷത്തിലെത്തിയ മെയ്യഴകൻ സൂര്യയും ഭാര്യ ജ്യോതികയും ചേര്‍ന്നാണ് നിർമ്മിച്ചത്. ചിത്രത്തിന് തെന്നിന്ത്യയിൽ മികച്ച പ്രതികരണം ലഭിച്ചിരുന്നു. നാലുദിവസംകൊണ്ട് ചിത്രം 41.35 കോടി കളക്ഷനാണ് നേടിയത്.