എക്സിറ്റ് പോള്‍ ഫലങ്ങൾ പരാജയപ്പെടും; ഡൽഹിയിൽ ബിജെപി തന്നെ സർക്കാർ രൂപീകരിക്കുമെന്ന് മനോജ് തിവാരി MP

ന്യൂഡൽഹി: രാജ്യതലസ്ഥാനത്ത് ആംആദ്മിക്ക് വിജയം പ്രവചിക്കുന്ന എക്സിറ്റ് പോൾ ഫലങ്ങൾ തള്ളി ബിജെപി ഡൽഹി അധ്യക്ഷൻ മനോജ് തിവാരി

എക്സിറ്റ് പോൾ ഫലങ്ങളെല്ലാം പരാജയപ്പെടുമെന്നും ഡൽഹിയിൽ ബിജെപി തന്നെ അധികാരത്തിലെത്തുമെന്നുമാണ് അഭിനേതാവ് കൂടിയായ തിവാരി അറിയിച്ചിരിക്കുന്നത്.

'എക്സിറ്റ് പോൾ ഫലങ്ങളെല്ലാം പരാജയപ്പെടും.. 48 സീറ്റുകൾ നേടി ബിജെപി തന്നെ ഡൽഹിയിൽ സർക്കാർ രൂപീകരിക്കും.. അപ്പോൾ ഇവിഎമ്മിനെ കുറ്റം പറയാൻ കാരണങ്ങൾ കണ്ടെത്തരുത്.. ' എന്നായിരുന്നു തിവാരി ട്വിറ്ററിൽ കുറിച്ചത്.

ഈ ട്വീറ്റ് സൂക്ഷ്മതയോടെ സേവ് ചെയ്ത് വയ്ക്കണമെന്നും ഇദ്ദേഹം കുറിച്ചിട്ടുണ്ട്. ഹിന്ദിയിലായിരുന്നു ട്വീറ്റ്

ഡല്‍ഹിയിൽ‌ കഴിഞ്ഞ ദിവസം നടന്ന വോട്ടെടുപ്പിന് ശേഷം പുറത്തു വന്ന എക്സിറ്റ് പോൾ ഫലങ്ങളെല്ലാം തന്നെ ആം ആദ്മിക്ക് ഭരണത്തുടർച്ച പ്രവചിക്കുന്നതായിരുന്നു.

മിക്ക ദേശീയ ചാനലുകളും ഏജൻസികളും പുറത്തുവിട്ട എക്സിറ്റ് പോളിൽ ആപ് അൻപതിലധികം സീറ്റുകൾ നേടി അധികാരത്തിലെത്തുമെന്നാണ് പ്രവചിക്കുന്നത്

ബിജെപി നില മെച്ചപ്പെടുത്തുമെന്നും കോൺഗ്രസിന് സീറ്റുകൾ നേടാനാകില്ലെന്നും ഇതുവരെ പുറത്തുവന്ന സർവ്വേകൾ പറയുന്നു.