2014-നു ശേഷം 86 പുതിയ വിമാനത്താവളങ്ങൾ; ഇന്ത്യ വ്യോമയാന മേഖലയിൽ ഉയർന്നു പറക്കുന്നു: പ്രധാനമന്ത്രി

'ഭാരത് മാതാ കീ ജയ്' വിളികളോടെയാണ് പ്രധാനമന്ത്രി നരേന്ദ്ര മോദി നോയിഡ അന്താരാഷ്ട്ര വിമാനത്താവളത്തിലെ പ്രസം​ഗം ആരംഭിച്ചത്. സദസ്സിലുണ്ടായിരുന്ന ആയിരക്കണക്കിന് ആളുകളോട് തങ്ങളുടെ ഫോണിലെ ടോർച്ചുകൾ തെളിയിച്ച് ഈ ചരിത്ര നിമിഷത്തിന്റെ ഭാഗമാകാൻ അദ്ദേഹം ആഹ്വാനം ചെയ്തു. ആവേശഭരിതമായ അന്തരീക്ഷത്തിൽ പ്രധാനമന്ത്രി നടത്തിയ പ്രസംഗത്തിലെ ശ്രദ്ധേയമായ ഭാഗങ്ങൾ താഴെ നൽകുന്നു:

ഉത്തരേന്ത്യയുടെ വാണിജ്യ-വ്യവസായ മേഖലകളുടെ മുഖച്ഛായ മാറ്റുന്ന ലോജിസ്റ്റിക് ഗേറ്റ്‌വേയായി നോയിഡ അന്താരാഷ്ട്ര വിമാനത്താവളം മാറുമെന്നും, ലക്ഷക്കണക്കിന് യുവാക്കൾക്ക് തൊഴിലവസരങ്ങൾ സൃഷ്ടിക്കുന്നതിനൊപ്പം അവരുടെ ഉന്നമനത്തിന് പുതിയ പാതകളും തുറക്കുമെന്ന് അദ്ദേഹം പ്രസം​ഗത്തിൽ പറഞ്ഞു. (ചിത്രം: ന്യൂസ് 18/ ഉമേഷ് ശർമ്മ)

"വികസിത് ഭാരതത്തിന്റെയും വികസിത് ഉത്തർപ്രദേശിന്റെയും വികസന ചരിത്രത്തിൽ പുതിയൊരു അധ്യായത്തിന് ഇന്ന് തുടക്കമിടുകയാണ്. രാജ്യാന്തര വിമാനത്താവളങ്ങളുടെ എണ്ണത്തിൽ രാജ്യത്തെ മുൻനിര സംസ്ഥാനമായി യുപി ഇന്ന് മാറിയിരിക്കുന്നു."- മോദി പറഞ്ഞു. കഴിഞ്ഞ ദിവസമാണ് നോയിഡ അന്താരാഷ്ട്ര വിമാനത്താവളത്തിന്റെ ഉദ്ഘാടനം കഴിഞ്ഞത്. (ചിത്രം: X)

ആഗ്ര, മഥുര, അലിഗഡ്, ഗാസിയാബാദ്, മീററ്റ്, ഇറ്റാവ തുടങ്ങിയ നഗരങ്ങൾക്ക് ഈ വിമാനത്താവളം വലിയ വികസന സാധ്യതകൾ തുറന്നുനൽകും. മേഖലയിലെ ചെറുകിട സംരംഭകർക്കും കർഷകർക്കും യുവാക്കൾക്കും പുതിയ അവസരങ്ങൾ ലഭ്യമാക്കുന്നതിനൊപ്പം ഈ പദ്ധതി വലിയൊരു സാമ്പത്തിക മുന്നേറ്റത്തിന് വഴിയൊരുക്കുകയും ചെയ്യുമെന്ന് പ്രധാനമന്ത്രി പ്രസം​ഗത്തിൽ വ്യക്തമാക്കി.

യാത്രക്കാരുടെ തിരക്ക് കുറയ്ക്കാൻ സഹായിക്കുന്ന രീതിയിൽ, ഓരോ രണ്ട് മിനിറ്റിലും ഇവിടെ നിന്ന് വിമാനങ്ങൾ പുറപ്പെടുമെന്നും അദ്ദേഹം ചൂണ്ടിക്കാണിച്ചു. (Image: X)

രാജ്യത്തിന്റെ പുരോഗതിയുടെ അടയാളങ്ങളാണ് വിമാനത്താവളങ്ങളെന്ന് പ്രധാനമന്ത്രി നരേന്ദ്ര മോദി. 2014-ന് മുൻപ് 74 വിമാനത്താവളങ്ങൾ മാത്രമുണ്ടായിരുന്ന സ്ഥാനത്ത് ഇന്ന് 160-ലധികം വിമാനത്താവളങ്ങളുമായി ഇന്ത്യ കുതിക്കുകയാണ്. വൻനഗരങ്ങളിൽ മാത്രം ഒതുങ്ങിനിന്നിരുന്ന വ്യോമയാന സൗകര്യങ്ങൾ ഇന്ന് സാധാരണക്കാരുടെ പട്ടണങ്ങളിലേക്കും എത്തിച്ചേർന്നിരിക്കുന്നു. ചുരുങ്ങിയ കാലയളവിൽ 86 പുതിയ വിമാനത്താവളങ്ങളാണ് വന്നതെന്നും അദ്ദേഹം പറഞ്ഞു.

കഴിഞ്ഞ കുറച്ച് വർഷങ്ങൾക്കിടയിൽ 1.60 കോടിയിലധികം ആളുകളാണ് ഉഡാൻ പദ്ധതിയുടെ സഹായത്തോടെ കുറഞ്ഞ ചിലവിൽ വിമാനത്തിൽ യാത്ര ചെയ്തതെന്നും അദ്ദേഹം കൂട്ടിച്ചേർത്തു.