ഉത്തര മലബാറിലെ കാവുകളിൽ പൂരോത്സവ ലഹരി; മാടായിക്കാവിൽ സഹസ്രദീപ സമർപ്പണത്തോടെ തുടക്കം

പൂരോത്സവത്തിൻ്റെ താളത്തിലാണ് മലബാറിലെ ക്ഷേത്രങ്ങളും കാവുകളും. മാടായി തിരുവര്‍ക്കാട്ട് കാവിലെ അഥവാ മാടായിക്കാവിലെ പൂരോത്സവമാണ് ഇതില്‍ ഏറ്റവും പ്രസിദ്ധം. സഹസ്രദീപം സമര്‍പ്പണത്തോടെയാണ് പൂരോത്സവത്തിന് തുടക്കമായത്. ഉത്തര മലബാറിലെ ഭദ്രകാളി ക്ഷേത്രങ്ങളുടെ മാതൃ ക്ഷേത്രമാണ് മാടായിക്കാവ്.

മാടായി തിരുവര്‍ക്കാട്ട് കാവിലെ പൂരോത്സവത്തിൻ്റെ ഭാഗമായി നടന്ന തിടമ്പ് എഴുന്നള്ളത്ത് കാണാന്‍ ഭക്തജന പ്രവാഹം. പുലര്‍ച്ചെ 3ന് തിരുവത്താഴ പൂജയോടെ ആരംഭിക്കുന്ന ചടങ്ങുകള്‍. തുടര്‍ന്ന് തിടമ്പ്, കാവില്‍ നിന്ന് ഒരു കിലോമീറ്റര്‍ അകലെയുള്ള തെക്കിനാക്കല്‍ കോട്ടയിലേക്ക് എഴുന്നള്ളിക്കും. ക്ഷേത്രം മൂത്ത പിടാരര്‍ ഉണ്ണിക്കൃഷ്ണനാണ് തിടമ്പേറ്റുന്നത്.

പ്രത്യേകം തയാറാക്കിയ തീപ്പന്തത്തിൻ്റെയും കൈവിളക്കിൻ്റെയും പരിവാരത്തിൻ്റെയും സാന്നിധ്യത്തിലാണ് തിടമ്പ് എഴുന്നള്ളത് നടക്കുന്നത്. പൂരോത്സവ നാളുകളില്‍ എല്ലാ ദിവസവും തിടമ്പ് എഴുന്നള്ളിക്കല്‍ നടക്കും. ദേവിയും പരിവാരങ്ങളും പുറപ്പെടുന്നു എന്നാണ് വിശ്വാസം.

തിടമ്പ് തെക്കിനാക്കല്‍ കോട്ടയിലെത്തുന്നതോടെ ഇവിടെ പ്രത്യേക പൂജകള്‍, വാള്‍പയറ്റ്, അപ്പനിവേദ്യം എന്നിവ നടന്നു വരുന്നു. ഇതില്‍ പുരുഷുന്മാരുടെ പൂരക്കളി കണ്ടു നിന്നവരില്‍ ആവേശം നിറയ്ക്കും. ഇതിനുശേഷമാണ് കാവിലേക്ക് തിരിച്ചെഴുന്നള്ളത്ത്.

തിരിച്ച് മാടായിക്കാവിലെത്തിയ തിടമ്പ് എഴുന്നള്ളത്ത് ആല്‍ത്തറയ്ക്ക് മുന്നില്‍ നിന്ന് ഭക്തര്‍ക്ക് ദര്‍ശനം നല്‍കിയതിനുശേഷം ക്ഷേത്രങ്കണത്തിലും ദര്‍ശനം നല്‍കും. മൂന്ന് തവണ ദര്‍ശനം നല്‍കിയതിനുശേഷം ശ്രീകോവിലിലേക്ക് പ്രവേശിക്കും.

മാര്‍ച്ച് 31 ന് തെക്കിനാക്കല്‍ കോട്ടയിലെ പൂജകള്‍ക്ക് ശേഷം രാവിലെ 8 ഓടെ തിടമ്പെഴുന്നളളത്ത് വടുകുന്ദ ശിവക്ഷേത്രത്തില്‍ എത്തിച്ചേരും. തുടര്‍ന്ന് വടുകുന്ദ തടാകത്തില്‍ പൂരം കുളി നടക്കുന്നതോടെ ക്ഷേത്രോത്സവത്തിന് സമാപനമാകും.