‘എൻ്റെ കേരളം’ മേള കൊല്ലത്ത് ഉദ്ഘാടനം ചെയ്ത് മന്ത്രി കെ എൻ ബാലഗോപാൽ

സംസ്ഥാന സർക്കാരിൻ്റെ വാർഷികാഘോഷത്തിൻ്റെ ഭാഗമായി എൻ്റെ കേരളം പ്രദർശനം കൊല്ലം ആശ്രമം മൈതാനിയിൽ ആരംഭിച്ചു. ധനമന്ത്രി കെ എൻ ബാലഗോപാൽ പ്രദർശനം ഉദ്ഘാടനം ചെയ്തു. മന്ത്രി ചിഞ്ചുറാണി ചടങ്ങിന് അധ്യക്ഷത വഹിച്ചു.

ഇടതു സർക്കാർ കഴിഞ്ഞ 9 വർഷക്കാലയളവിൽ ജില്ലയിൽ നടപ്പിലാക്കിയ വികസന ജനക്ഷേമ സേവന പ്രവർത്തനങ്ങൾ അവതരിപ്പിക്കുന്ന മേളക്കാണ് കൊല്ലം ആശ്രമം മൈതാനിയിൽ തുടക്കമായത്. വിജ്ഞാന വിനോദപ്രദമായ കാഴ്ചകളും വേറിട്ട രുചികളുടെ ഫുഡ് കോർട്ടുകളും പ്രദർശന നഗരിയിൽ ഉണ്ട്. വിസ്മയ കൗതുക കാഴ്ചകൾക്കൊപ്പം വേറിട്ട കലാപരിപാടികളും ഉൾപ്പെടുത്തിയിട്ടുണ്ട്.

മന്ത്രി ജെ ചിഞ്ചു റാണി അധ്യക്ഷയായ ചടങ്ങിൽ മന്ത്രി കെ എൻ ബാലഗോപാൽ പ്രദർശനത്തിൻ്റെ ഉദ്ഘാടനം നിർവഹിച്ചു. അടുത്ത നവംബർ ഒന്നിന് അതിദരിദ്രരില്ലാത്ത സംസ്ഥാനമായി കേരളത്തെ പ്രഖ്യാപിക്കും എന്ന് മന്ത്രി ഉദ്ഘാടന വേളയിൽ അറിയിച്ചു.

രാവിലെ 10 മുതൽ രാത്രി 10 വരെയാണ് സൗജന്യമായ പ്രദർശനം ഒരുക്കിയിരിക്കുന്നത്. സർക്കാരിൻ്റെ ജനക്ഷേമ പ്രവർത്തനങ്ങളും സൗജന്യ സേവനങ്ങളും 156 സ്റ്റാളുകളിൽ ഉൾപ്പെടുത്തിയിട്ടുണ്ട്. 96 കൊമേഴ്സ്യൽ സ്റ്റാളുകളിൽ വിവിധ വകുപ്പുകളുടെയും സർക്കാർ ഏജൻസികളുടെയും ഉത്പന്ന പ്രദർശനവും വില്പനയുമാണ് ഒരുക്കിയിരിക്കുന്നത്. ഈ മാസം 20ന് പ്രദർശന വിൽപ്പന മേള സമാപിക്കും.

എല്ലാ ദിവസവും വൈകീട്ട് ഏഴുമുതൽ മുഖ്യവേദിയിൽ കലാപരിപാടികൾ അരങ്ങേറും. രമേശ് നാരായൺ, മധുശ്രീ നാരായൺ എന്നിവർ അവതരിപ്പിക്കുന്ന സംഗീതവിരുന്ന് സമാപനദിനമായ 20-ന് ഉണ്ടാകും.