നിലമ്പൂർ തേക്ക് മ്യൂസിയം: തേക്കിൻ്റെ പാരിസ്ഥിതിക പ്രാധാന്യം വിളിച്ചോതുന്ന ഇന്ത്യയിലെ ഏക മ്യൂസിയം

മലപ്പുറം ജില്ലയിലെ നിലമ്പൂരിൽ സ്ഥിതി ചെയ്യുന്ന നിലമ്പൂര്‍ തേക്ക് മ്യൂസിയം തേക്ക് മരത്തിൻ്റെ ചരിത്രവും സവിശേഷതകളും ആഴത്തിൽ പകര്‍ത്തുന്ന ഇന്ത്യയിലെ ഏക തേക്ക് മ്യൂസിയമാണ്. നിലമ്പൂര്‍-ഗൂഡല്ലൂര്‍ പാതയിൽ സ്ഥിതി ചെയ്യുന്ന ഈ മ്യൂസിയം കേരള ഫോറസ്റ്റ് റിസർച്ച് ഇൻസ്റ്റിറ്റ്യൂട്ടിൻ്റെ (KFRI) കീഴിലാണ് പ്രവർത്തിക്കുന്നത്.

നിലമ്പൂർ റെയിൽവേ സ്റ്റേഷനിൽ നിന്ന് 3 കിലോമീറ്റർ അകലെയും കോഴിക്കോട് ഇൻ്റർനാഷണൽ എയർപ്പോർട്ടിൽ നിന്ന് 36 കിലോമീറ്റർ അകലെയുമാണ് മ്യൂസിയം സ്ഥിതി ചെയുന്നത്. നിലമ്പൂർ പട്ടണത്തിൽ നിന്ന് ഏകദേശം നാല് കിലോമീറ്റർ അകലെയാണ് ഇതിൻ്റെ സ്ഥാനം.

ഏകദേശം 160 വര്‍ഷം പഴക്കമുള്ള, ലോകത്തിലെ ഏറ്റവും പഴക്കം ചെന്ന തേക്ക് മരം നിലമ്പൂരിലാണ് കണ്ടെത്തിയത്. ഈ മണ്ണിൻ്റെ തേക്ക് കൃഷിയുടെ ചരിത്രത്തിന് സാക്ഷിയായാണ് മ്യൂസിയം നിലകൊള്ളുന്നത്.

മ്യൂസിയത്തിൻ്റെ പ്രവേശന കവാടത്തിൽ, ഏറ്റവും വലിയ തേക്ക് മരത്തിൻ്റെ വേരിൻ്റെ ഭാഗം പ്രദര്‍ശിപ്പിച്ചിരിക്കുന്നു. തേക്കിൻ്റെ വിവിധ രൂപങ്ങളും ശാസ്ത്രീയ വിവരങ്ങളും ഇവിടെ കാണാം.

തേക്ക് മരത്തിൻ്റെ വിവിധ ഇനങ്ങള്‍, തടി വ്യവസായ ചരിത്രം, തേക്ക് മരങ്ങളെ ബാധിക്കുന്ന രോഗങ്ങൾ, വനവല്‍ക്കരണ രീതികള്‍ എന്നിവയെല്ലാം മ്യൂസിയം വിശദീകരിക്കുന്നു. വിദ്യാർത്ഥികൾക്കും ഗവേഷകർക്കും വനശാസ്ത്രം, തടി വ്യവസായം, പാരിസ്ഥിതിക സംരക്ഷണം എന്നിവയെക്കുറിച്ച് ആഴത്തിൽ മനസ്സിലാക്കാൻ മ്യൂസിയം സഹായിക്കുന്നു.

1995-ൽ സ്ഥാപിച്ച ഈ മ്യൂസിയം വളപ്പിൽ തന്നെ ഔഷധ സസ്യങ്ങളും പലതരം മരങ്ങളും നിറഞ്ഞ ഒരു ഹരിത ഉദ്യാനവും, തേക്കിൻ്റെ കുഞ്ഞുതൈകളും കാണാനാകും.

തേക്കിൻ്റെ സാമ്പത്തിക, പാരിസ്ഥിതിക പ്രാധാന്യം മനസ്സിലാക്കാൻ മ്യൂസിയം സഹായിക്കും. ചരിത്രത്തെയും പ്രകൃതിയെയും അടുത്തറിയാനുള്ള ഒരു അവസരം കൂടി ഇവിടെ നിന്ന് ലഭിക്കും. നിലമ്പൂരിൻ്റെ 'തേക്കിൻ്റെ തലസ്ഥാനം' എന്ന ഖ്യാതിക്ക് അടിവരയിടുന്ന ഒരു പ്രധാന വിനോദസഞ്ചാര-വിദ്യാഭ്യാസ കേന്ദ്രം കൂടിയാണ് ഈ മ്യൂസിയം.