COVID19| കൈ കഴുകാതെ രക്ഷയില്ല; മാസ്കും കൈയ്യുറകളും വൈറസിനെ തടയില്ല

കോവിഡ് ബാധയിൽ ലോകം വിറങ്ങലിച്ചു നിൽക്കുകയാണ്. ലോകമെമ്പാടുമായി ഇതുവരെ ഒമ്പതിനായിരത്തോളം പേരാണ് മരണപ്പെട്ടത്.

രണ്ടേകാൽ ലക്ഷത്തോളം പേർക്ക് വൈറസ് ബാധ സ്ഥിരീകരിച്ചു. ഇറ്റലിയിൽ രോഗം മൂലം മരിച്ചവരുടെ എണ്ണം മൂവായിരമായി. ഇന്ത്യയിൽ 166 പേരാണ് ഇതുവരെ രോഗബാധ സ്ഥിരീകരിച്ചത്.

കേരളത്തിൽ വൈറസ് സാമൂഹ്യവ്യാപനത്തിന് അടുത്തെത്തിയിരിക്കുകയാണ്. ആരിൽ നിന്നും ആർക്കും രോഗം പകരാം എന്ന അവസ്ഥ.

ഈ സാഹചര്യത്തിൽ ജാഗ്രതയും ശുചിത്വവും പാലിക്കുക എന്നത് ഓരോ വ്യക്തിയുടേയും സാമൂഹിക ഉത്തരവാദിത്തമാണ്.

വൈറസ് വ്യാപനം തടയാൻ കൈകകൾ വൃത്തിയാക്കി സൂക്ഷിക്കുക എന്നത് തന്നെയാണ് ശരിയായ മാർഗം എന്നാണ് ആരോഗ്യരംഗത്തെ വിദഗ്ധർ പറയുന്നത്.

കൈകൾ കഴുകി സൂക്ഷിക്കുക, കൈകൊണ്ട് അനാവശ്യമായി മുഖം തൊടുന്നത് ഒഴിവാക്കുക, മറ്റുള്ളവരുമായി അടുത്ത് ഇടപഴകേണ്ട സാഹചര്യമുണ്ടായാൽ കൃത്യമായ അകലം പാലിക്കുക. കോവിഡിനെ നേരിടാൻ ഇതാണ് മാർഗം.

മാസ്കും കൈയ്യുറകളും എത്രത്തോളം സഹായകമാകുമെന്ന് പറയാനാകില്ലെന്ന് ലോകാരോഗ്യ സംഘടനയുടെ എമർജൻസീസ് ഡയറക്ടർ മൈക് റയാൻ പറയുന്നു.

"മാസ്കുകൾക്ക് വൈറസ് ബാധ തടയുന്നതിന് പരിധിയുണ്ട്. കൈകൾ ഇടക്കിടെ കഴുകി സൂക്ഷിക്കുക, മുഖത്ത് തൊടുന്നത് ഒഴിവാക്കുക, മറ്റുള്ളവരുമായി അകലം പാലിക്കുക, എന്നിവയാണ് ഏറ്റവും പ്രധാനപ്പെട്ട മാർഗം" - മൈക്ക് റയാന്റെ വാക്കുകൾ.

കോവിഡ് 19 കേസുകൾ നേരിടുന്ന ലോകമെമ്പാടുമുള്ള ആരോഗ്യപ്രവർത്തർക്ക് മാത്രമായി ഓരോ മാസമവും 89 ദശലക്ഷം മാസ്കുകൾ വേണ്ടിവരുമെന്നാണ് WHO യുടെ കണക്കുകൂട്ടുന്നത്.

നിലവിൽ തന്നെ മാസ്കുകൾക്ക് കടുത്ത ക്ഷാമമാണ് ലോകവ്യാപകമായി നേരിടുന്നത്. കൊറോണ വ്യാപനം തുടർന്നാൽ സ്ഥിതി കൂടുതൽ ഗുരുതരമാകും.

മാസ്ക് ധരിച്ച് പുറത്തിറങ്ങുന്നവരിൽ ഭൂരിഭാഗം പേരും കൈകൾ സ്വതന്ത്രമായി ഇട്ടിരിക്കുന്നതായാണ് കാണുന്നത്. കൈകളിലൂടെയാണ് രോഗം പെട്ടന്ന് പടരുക എന്നത് മറക്കതിരിക്കുക.

ഫ്രാൻസിലെ ആരോഗ്യ മേഖലയുടെ തലവനായ ജെറോം സാലമോണിന്റെ വാക്കുകൾ " മാസ്കുകൾ ധരിക്കുന്ന പലരും കൈ തുടർച്ചയായി കഴുകണമെന്ന നിർദേശം അവഗണിക്കുകയാണ്."

മാസ്ക് പോലെ തന്നെ കൈയ്യുറകൾ ധരിച്ചത് കൊണ്ടും വൈറസ് വ്യാപനം തടയാൻ സാധിക്കണമെന്നില്ല.

ആദ്യം ഒഴിവാക്കേണ്ടത് മൂക്കിലും വായിലും കണ്ണിലുമെല്ലാമുള്ള ഇടക്കിടെയുള്ള തൊട്ടു നോട്ടമാണ്. അത് നിർത്താതെ രോഗം വരാതിരിക്കാനുള്ള സാധ്യതയും ഇല്ലാതാകുന്നില്ല. അമേരിക്കയിലെ ജോൺ ഹോപ്കിൻസ് സർവകലാശാലയിലെ സെന്റർ ഫോർ ഹെൽത്ത് ഡിപ്പാർട്മെന്റിലുള്ള അമേഷ് അഡൽജ പറയുന്നു.

അമേരിക്കൻ ജേണൽ ഓഫ് ഇൻഫെക്ഷന്റെ 2015 ൽ പുറത്തിറങ്ങിയ പഠനം അനുസരിച്ച് ഒരു മണിക്കൂറിൽ മനുഷ്യൻ 20 പ്രാവശ്യമെങ്കിലും കൈ കൊണ്ട് മുഖം തൊടുന്നുണ്ട്.

ശ്രദ്ധിക്കുക, ഗ്ലൗസ് ധരിക്കുന്നത് കൈ കഴുകുന്നതിന് പകരമായല്ല.