Coffee Benefits: ആള് ചില്ലറക്കാരനല്ല! ഈ ​ഗുണങ്ങൾ ലഭിക്കണമെങ്കിൽ കാപ്പി ഇങ്ങനെ കുടിക്കണം

എല്ലാവരും കഴിക്കാൻ ഇഷ്ടപ്പെടുന്ന ഒരു പാനീയമാണ് കാപ്പി. ചായയേക്കാൽ പലപ്പോഴും ആളുകൾ കുടിക്കുവാനായി തിരഞ്ഞെടുക്കുന്നത് കാപ്പിയാണ്. മനം മയക്കുന്ന അതിന്റെ സൗരഭ്യം തന്നെയാണ് അതിന്റെ പ്രധാന കാരണം. മണം മാത്രമല്ല ​ഗുണം കൊണ്ടും അതിവിശിഷ്ടമായ ഒരു പാനീയമാണ് കാപ്പി.

എണ്ണിയാലൊടുങ്ങാത്ത ​ഗുണങ്ങളാണ് കാപ്പിക്കുള്ളത്. നമ്മുടെ ശരീരത്തിന്റെ ഊർജ്ജം വർദ്ധിപ്പിക്കൽ, മെച്ചപ്പെട്ട വൈജ്ഞാനിക പ്രവർത്തനം, ടൈപ്പ് 2 പ്രമേഹ സാധ്യത കുറയ്ക്കൽ, കരൾ, ഹൃദ്രോഗങ്ങൾ എന്നിവയിൽ നിന്നുള്ള സംരക്ഷണം എന്നിവയാണ് ഇവയിലെ ഹൈലൈറ്റ്.

ഒപ്പം സൗന്ദര്യം വർദ്ധിപ്പിക്കുക ശരീരത്തിന്റെ മെറ്റബോളിസം വർദ്ധിപ്പിക്കുക തുടങ്ങിയവയിലും കാപ്പി കേമനാണ്. പ്രകൃതിദത്തമായ ഒരു ആൻറി-ഡിപ്രസന്റായും കാപ്പി പ്രവർത്തിക്കുന്നു. ശരീരഭാരം നിയന്ത്രിക്കാനും കാപ്പി കഴിക്കുന്നത് നല്ലതാണ്. ഇങ്ങനെ ഒക്കെ ആണെങ്കിലും ഈ കാപ്പി കുടിക്കുന്നതിന് ഒരു രീതിയുണ്ട്. പാലും പഞ്ചസാരയും ചേർത്താണ് കാപ്പി കുടിക്കുന്നതെങ്കിൽ ഈ ​ഗുണത്തിൽ പലതും നിങ്ങൾക്ക് ലഭിക്കില്ല.

കാപ്പി ഇവയൊന്നും ചേർക്കാതെ ചെറു ചൂടോടെ കുടിക്കുന്നതാണ് ഉത്തമം. കാപ്പിയിലെ കഫീൻ കേന്ദ്ര നാഡീവ്യവസ്ഥയെ ഉത്തേജിപ്പിക്കുന്നു. അതിലൂടെ നമ്മുടെ ജാഗ്രത വർദ്ധിപ്പിക്കുക, ശ്രദ്ധ കേന്ദ്രീകരിക്കൽ മെച്ചപ്പെടുത്തുക തുടങ്ങിയ ​ഗുണങ്ങൾ നൽകുന്നു. കരളിന്റെ ആരോ​ഗ്യം വർദ്ധിപ്പിക്കാൻ കാപ്പി കഴിക്കുന്നത് വളരെ നല്ലതാണ്.

രക്തസമ്മർദ്ദം കുറയ്ക്കാനും ഹൃദ്രോഗം, പക്ഷാഘാതം എന്നിവയ്ക്കുള്ള സാധ്യത കുറയ്ക്കാനും കാപ്പി സഹായിച്ചേക്കാം. പതിവ് കാപ്പി ഉപഭോഗം ടൈപ്പ് 2 പ്രമേഹം വരാനുള്ള സാധ്യത കുറയ്ക്കുന്നുതായി പല പഠനങ്ങളും പറയുന്നു.കഫീൻ മെറ്റബോളിസം വർദ്ധിപ്പിക്കുകയും ശരീരത്തിൽ അമിതമായി അടിഞ്ഞു കൂടിയ കൊഴുപ്പ് കത്തിക്കാൻ സഹായിക്കുകയും ചെയ്യും.

ശരീരത്തിലെ കോശങ്ങളെ നാശത്തിൽ നിന്ന് സംരക്ഷിക്കാനും ചിലതരം കാൻസറുകളുടെ സാധ്യത കുറയ്ക്കാനും സഹായിക്കുന്ന ആന്റിഓക്‌സിഡന്റുകളുടെ നല്ലൊരു ഉറവിടമാണ് കാപ്പി. അൽഷിമേഴ്‌സ്, പാർക്കിൻസൺസ് തുടങ്ങിയ നാഡീനാശന രോഗങ്ങളുടെ സാധ്യത കുറയ്ക്കാൻ കാപ്പിയ്ക്ക് കഴിയുമെന്ന് ചില ഗവേഷണങ്ങൾ സൂചിപ്പിക്കുന്നു.