മഹാരാജാസിലെ പിള്ളേരെ തകർത്ത് കൊമ്പന്മാർ; പ്രീസീസൺ മത്സരത്തിൽ ബ്ലാസ്റ്റേഴ്സിന് വമ്പൻ ജയം

കൊച്ചി: ഓഗസ്റ്റ് 3നു ആരംഭിക്കുന്ന 132-ാമത് ഡ്യുറാൻഡ് കപ്പിന് മുന്നോടിയായി ഉള്ള ആദ്യ പ്രീ സീസൺ മത്സരത്തിൽ ബ്ലാസ്റ്റേഴ്സിന് വമ്പൻ ജയം.

എറണാകുളം പനമ്പിള്ളി നഗർ ഗ്രൗണ്ടിൽ നടന്ന മത്സരത്തിൽ എട്ടു ഗോളുകൾക്ക് മഹാരാജാസ് കോളേജ് ടീമിനെ തോൽപ്പിച്ചു.

4-4-2 ഫോർമേഷനിലാണ് ടീം അണിനിരന്നത്. മത്സരത്തിന്റെ തുടക്കം മുതൽ ബ്ലാസ്റ്റേഴ്സ് താരങ്ങൾ ആധിപത്യം സ്ഥാപിച്ചിരുന്നു.

ഹൈ പ്രസ്സിംഗ് ഗെയിം കാഴ്ചവച്ചതോടെ ഓരോ ഇടവേളയിലും മഹാരാജാസിന്റെ ഗോൾ വില നിറഞ്ഞു.

ആദ്യപകുതികൾ തന്നെ നാല് ഗോളുകളാണ് ബ്ലാസ്റ്റേഴ്സ് അടിച്ചുകൂട്ടിയത്. ബിദ്യാസാഗറും, ബിജോയും ആദ്യ പകുതിയിൽ തന്നെ ഇരട്ട ഗോളുകൾ നേടി.

നായകനായ റൂയിവ ഹോര്‍മിപാം പ്രതിരോധം കൃത്യതയോടെ കാത്തതോടെ മഹാരാജാസ് ടീം വിയർത്തു.

രണ്ടാം പകുതിയിൽ  നിരവധി മാറ്റങ്ങൾ കൊണ്ടുവന്നെങ്കിലും ബ്ലാസ്റ്റേഴ്സ് ആക്രമണം തുടർന്നു.

കെ പി രാഹുൽ ഇരട്ട ഗോൾ നേടി. വിദേശ താരങ്ങളായ അഡ്രിയൻ ലൂണാ, ദിമിത്രസ് എന്നിവർ ഓരോ ഗോളും നേടി. 90 മിനിറ്റ് പൂർത്തിയായപ്പോൾ 8-0 ബ്ലാസ്റ്റേഴ്സ് ആദ്യ പ്രീ സീസൺ മത്സരം ഗംഭീരമാക്കി.

ആക്രമിച്ചു കളിച്ച ബ്ലാസ്റ്റേഴ്സിന്റെ മുന്നേറ്റ നിരയ്ക്കൊപ്പം, ഹോര്‍മിപാം, പ്രഭീർ ദാസ്, ബിജോയ്,മാര്‍ക്കോ ലെസ്‌കോവിച്ച്  അടങ്ങിയ പ്രതിരോധനിര എതിരാളികളുടെ ആക്രമണത്തിന്റെ മൂർച്ച കുറച്ചു.

രണ്ടാം പകുതിയിൽ ബ്ലാസ്റ്റേഴ്സിന്റെ പുതിയ മുഖം പ്രീതം കോട്ടൽ പ്രതിരോധനിര കാത്തു. വരും ദിവസങ്ങളിൽ കൂടുതൽ പ്രീ സീസൺ മത്സരങ്ങൾ കേരള ബ്ലാസ്റ്റേഴ്സ് കളിക്കും.

കഴിഞ്ഞ മൂന്നാഴ്ചയായി കേരള ബ്ലാസ്റ്റേഴ്സ് കൊച്ചിയിൽ പരിശീലനം നടത്തുന്നുണ്ട്.