IPL 2019: ഐപിഎല്ലിൽ വാർണർക്ക് പുതിയ റെക്കോർഡ്

ഹൈദരാബാദ്: ഐപിഎല്ലിൽ ഏറ്റവുമധികം റൺസെടുക്കുന്നതിനുള്ള ഓറഞ്ച് ക്യാപ് മൂന്നുതവണ സ്വന്തമാക്കുന്ന ആദ്യ താരമായി ഡേവിഡ് വാർണർ. ഇത്തവണ 12 മത്സരങ്ങളിൽനിന്ന് 692 റൺസ് അടിച്ചുകൂട്ടിയാണ് വാർണർ ഓറഞ്ച് ക്യാപ് സ്വന്തമാക്കിയത്. 69.20 ആണ് ഈ സീസണിൽ വാർണറുടെ ശരാശരി.

ഇതിന് മുമ്പ് 2015ലും 2017ലും ഓറഞ്ച് ക്യാപ് നേടിയ വാർണറായിരുന്നു. 2015ൽ 562 റൺസും 2017ൽ 641 റൺസുമാണ് വാർണർ നേടിയത്.

ക്രിസ് ഗെയിൽ 2011, 2012 വർഷങ്ങളിൽ ഓറഞ്ച് ക്യാപ് സ്വന്തമാക്കിയിരുന്നു. അന്ന് യഥാക്രമം 608, 733 റൺസാണ് ഗെയിൽ അടിച്ചുകൂട്ടിയത്.

ഐപിഎല്ലിൽ ഏറ്റവുമധികം റൺസ് നേടിയവരുടെ പട്ടികയിൽ നാലാമതാണ് വാർണർ. 126 മത്സരങ്ങളിൽനിന്ന് 4706 റൺസാണ് അദ്ദേഹത്തിന്‍റെ സമ്പാദ്യം.

177 മത്സരങ്ങളിൽ നിന്ന് 5412 റൺസ് നേടിയിട്ടുള്ള വിരാട് കോഹ്ലിയാണ് ഈ പട്ടികയിൽ ഒന്നാമത്. സുരേഷ് റെയ്ന(5368), രോഹിത് ശർമ(4898) എന്നിവരാണ് രണ്ടും മൂന്നും സ്ഥാനങ്ങളിൽ.

അതേസമയം ഐപിഎല്ലിൽ ഏറ്റവും ഉയർന്ന ബാറ്റിങ് ശരാശരി വാർണറുടെ പേരിലാണ്. 43.17 ആണ് അദ്ദേഹത്തിന്‍റെ ശരാശരി. ഐപിഎല്ലിൽ നാലു സെഞ്ച്വറിയും 44 അർദ്ധസെഞ്ച്വറിയും നേടിയിട്ടുള്ള വാർണർ ഇതിനോടകം 181 സിക്സറുകലും 458 ബൌണ്ടറികളും അടിച്ചുകൂട്ടിയിട്ടുണ്ട്.