ചൈനയിൽ പിടിമുറുക്കി ബിഎഫ്.7; പുതിയ കോവിഡ് വകഭേദത്തെ ഇന്ത്യ പേടിക്കേണ്ടതുണ്ടോ? ലക്ഷണങ്ങൾ എന്തെല്ലാം?

ഒമിക്രോണിന്റെ ഒരു ഉപവിഭാഗമാണ്. ബിഎഫ്.7. ഇത് നിരവധി ചൈനീസ് നഗരങ്ങളിൽ വ്യാപിച്ചിട്ടുണ്ട്. പ്രതിരോധശേഷിയുടെ കുറവും പലരും വാക്സിനേഷൻ സ്വീകരിക്കാത്തതുമാണ് ഉയർന്ന വ്യാപനത്തിനു കാരണമായി വിലയിരുത്തുന്നത്.‌ വാക്സിനേഷൻ എടുത്തവരെയും ബാധിക്കാൻ ഈ വകഭേദത്തിനു കഴിയും എന്നാണ് റിപ്പോർട്ടുകൾ. അമേരിക്ക, ഇം​ഗ്ലണ്ട്, ബെൽജിയം, ജർമ്മനി, ഫ്രാൻസ്, ഡെൻമാർക്ക് തുടങ്ങിയ യൂറോപ്യൻ രാജ്യങ്ങളിലും ബിഎഫ്.7 കണ്ടെത്തിയിട്ടുണ്ട്. ബിഎഫ്.7 വകഭേദം ബാധിച്ച ഒരാൾ ശരാശരി 10 മുതൽ 18.6 വരെ ആളുകളിലേക്ക് വൈറസ് പകരുമെന്നും ശാസ്ത്രജ്ഞർ പറയുന്നു. ബിഎഫ്.7 ന് ഉയർന്ന വ്യാപനശേഷി ഉള്ളതിനാൽ, ചൈനയിൽ കോവിഡ് കേസുകൾ അതിവേഗം വർദ്ധിച്ചുകൊണ്ടിരിക്കുകയാണ്.

മറ്റ് ഒമിക്രോൺ വകഭേദങ്ങൾക്ക് സമാനമായ ലക്ഷണങ്ങളാണ് ബിഎഫ്.7 നും ഉള്ളത്. പനി, ക്ഷീണം, ചുമ, തൊണ്ടവേദന, മൂക്കൊലിപ്പ് തുടങ്ങിയവയെല്ലാം അവയിൽ ഉൾപ്പെടുന്നു. ചിലരിൽ ഛർദ്ദി, വയറിളക്കം തുടങ്ങിയ ലക്ഷണങ്ങളും കാണപ്പെടാം. പ്രതിരോധശേഷി കുറഞ്ഞവരെ ബിഎഫ്.7 ​ഗുരുതരമായി ബാധിച്ചേക്കാം എന്നും ശാസ്ത്രജ്ഞർ മുന്നറിയിപ്പ് നൽകുന്നു.

SARS-CoV-2 ന്റെ സ്പൈക്ക് പ്രോട്ടീനിലെ R346T എന്ന ഘടകത്തിന് മ്യൂട്ടേഷൻ സംഭവിച്ചാണ് ബിഎഫ്. 7 ഉണ്ടായത്. ഇതേ മ്യൂട്ടേഷൻ BA.5-ലും കണ്ടെത്തിയിരുന്നു.

ചില വിദഗ്ധരുടെ അഭിപ്രായത്തിൽ, ബിഎഫ്.7 നെ അധികം ഭയപ്പെടേണ്ട ആവശ്യമില്ല. പക്ഷേ മുൻകരുതലുകൾ ആവശ്യമാണ്. മാഹാമാരിയെ നേരിടാൻ ചൈന ആദ്യം മുതൽ സീറോ കോവിഡ് നയമാണ് സ്വീകരിച്ചു പോരുന്നത്. ഒരു പരിധിവരെ രോഗത്തോടൊപ്പം ജീവിക്കേണ്ടിവരുമെന്ന് അംഗീകരിച്ച മറ്റ് രാജ്യങ്ങളിൽ നിന്ന് വ്യത്യസ്തമായ സമീപനമാണ് ചൈന സ്വീകരിച്ചത്. കോവിഡ് റിപ്പോർട്ട് ചെയ്യുന്ന സ്ഥലങ്ങളെല്ലാം പൂർണമായും അടച്ച് ലോക്ക്ഡൗൺ പ്രഖ്യാപിക്കുന്ന നയമാണത്. പ്രായമായവരെയും മറ്റ് ദുർബലരായ വിഭാ​ഗങ്ങളെയും കോവിഡ് അപകടത്തിലാക്കുന്നതിനാൽ ഈ നയം പലരുടെയും ജീവൻ രക്ഷിക്കുന്നുവെന്ന് ചൈനീസ് സർക്കാർ അവകാശപ്പെടുന്നു.